shadow
Diocese de Dili > NOTÍCIAS > LETURA DIÁRIA > Sábado, XII Semana Tempo Comum

Sábado, XII Semana Tempo Comum

ANO B

 

Primeira Leitura                                                                              Lam. 2. 2, 10-14, 18-19

Lia housi segundo livro Lamentações nian.

Na’i la sadi’a Jacob hodi sobu rahun nia hôrik fatin hotu; ho hirus harahun kota sira Judá nia oan feto nian; hamonu no halakon reino no liurai oan sira.

Katuas sira housi Sião nia oan feto tur nonok hela iha rai, sira tau rai-rahun iha sira ulun no hatais-an ho karon. Fetoran sira Jerusalém nian hakru’uk ulun to’o rai.

Ha’u matan nakonu ho mata uen, ha’u laran susar tebges ha’u horun nakfakar iha rai, tan ha’u povo mohu lakon: Labarik oan sira no kosokoan sira be sei susu, mate hamlaha iha fatin luan iha cidade laran.

Sira husu ba nia inan sira: “Aihan no tua iha nebe?” sira lakon biit hanesan ema ho kanek atu mate, hakilar hodi hasai iis mate nian iha inan sira nia hitin.

Ba sá ha’u tanesan ó ba, Jerusalém nia oan feto? Ba sé ha’u sei tanesan ó ba, Sião nia oan fetora? Ho sé ha’u sei tanesan ó, no ó nia ksolok? Ó nia sorti áat boot tebes hanesan tasi: sé mak sei bele sadi’a ó?

Ó nia profeta sira hato’o ba ó buat sira be folin laek no bosok nian. Sira la hatudu ó nia salan ba ó, atu ó bele sai housi dalan aat; lia sira kona ba buat aban-bainrua nian nebe sira hato’o ba ó, mesak bosok no lohi nian.

Kota sira Sião nia oan feto nian, ho neon no laran tomak hakilar ba Na’i. Kalan  loron tanis maka’as halo mata-uen suli hanesan mota. Tanis ba nafatin hodi la maran mata-uen iha ó matan. Hamriik ba hodi hakilar iha kalan, iha oras hahu harohan nian. Hatudu ó fuan hanesan ué iha Na’i futar oin. Halolo ó liman ba Na’i, tan ó oan sira nia moris nebe hela iha lidun sira luron nian hodi takrabat ba rai tan hamlaha.

Maromak Futar Lia.

 

Salmo Responsorial                                                                                                                                                       Sal. 73(74). 1-7, 20-21 (R. 29ª)   

Refrão : Na’i, hanoin ba nafatin ema kiak sira nia moris. Repete-se

Na’i, tansá Ita hakribi nafatin ami,

Ita laran nakali hasouru bibi sira Ita luhan nian?

Hanoin Ita povo nebe uluk ita hili,

Housi foho Sião Ita hôrik fatin. Refrão

 

Ita la’o ba fatin sira be rahun nian ona ne’e,

Funu baluk sira harahun tiha ona Ita kadunan.

Ita nia funu baluk sira hakilar iha Ita templo,

Hasa’e sira bandeira hanesan sinal manan nian. Refrão

 

Hanesan ema sira be fera ai, halian baliu iha ai-laran,

Sira halo mós nune’e ba odamatan sira templo nian.

Sira tau ahi ba Ita santúario hodi sunu mohu,

Sira hafo’er no hamoe Ita naran nia hôrik fatin . Refrão

 

Hamatan no haré ba ita moruk;

Lidun sira nação nian sai uma hahalok áat nian;

Atu ema sira be haraik-an keta sai neon beik,

Atu ema kiak no mukit sira bele hahi Ita naran. Refrão

 

Aclamação                                                                                                                                                                                                                     Mt. 8. 17

Refrão : Aleluia, Aleluia! Repete-se

                  Cristo simu ita nia terus hotu ba Nia leten,

                  lori ita nia moras tomak. Refrão

 

Evangelho                                                                                                                                                                                                                  Mt. 8. 5-17

Na’i Jesus Cristo nia Evangelho tuir São Mateus:

Iha tempo neba, Jesus tama iha cafarnaun, centurião ida hakbesik ba Nia hodi harohan: “Na’i, ha’u nia atan toba iha uma, isin mate, terus áat liu.” Jesus dehan ba nia; “Ha’u sei ba fó isin di’ak ba nia.” Centurião simu fali Na’i, ha’u la soi katak Ita boot tama iha ha’u nia uma laran, maibe Ita boot ko’alia liafuan ida de’it, ha’u nia atan sei hetan fali isin di’ak; basá ha’u mós tuir sira nebe ukun ha’u, no mós iha soldadu sira nebe tuir ha’u. Ha’u dehan ba ida: ‘Ó ba, ‘Nia ba; ba ida seluk: ‘Halo ne’e, nia halo.” Rona tiha nia, Jesus hakfodak hodi dehan ba sira nebe tuir Nia: “Tebes, Ha’u dehan ba imi, Ha’u seidauk hetan ema ida ho fiar boot hanesan ne’e iha Israel. Ha’u dehan ba imi katak ema barak sei mai housi lorosa’e no loromonu tur iha mesa  ho Abraão, Isaac no Jacob iha reino Lalehan; maibe ema sei soe reino nia oan sira ba nakukun iha liur, iha neba sira sei tanis hodi ruun nehan.” Hafoin nia dehan ba centurião: “ La’o ona ba, buat hotu sei sai tuir ó nia fiar.” Iha duni oras neba, atan hetan fali isin di’ak.

Tuir mai, Jesus tama iha Pedro nia uma no haré Pedro nia banin feto moras isin manas, toba hela. Uainhira Jesus káer nia liman, isin manas husik kedas nia. Nia hamrik hodi hahu serbi nia.

Iha lokraik, sira lori mai to’o Nia ema barak ho diabo iha laran. Nia duni sai diabo sira ho Nia liafuan hodi fó isin di’ak ba sira hotu nebe moras. Nune’e halo tuir duni buat nebe profeta Isaias dehan: ‘Nia sei simu ita nia moras hodi lori ita nia moras hotu.’

Lia Maksoyn.

Leave a Reply

Your email address will not be published. Required fields are marked *