shadow
Diocese de Dili > NOTÍCIAS > LETURA DIÁRIA > XIII Domingo Tempo Comum

XIII Domingo Tempo Comum

Ano B

 

Primeira Leitura                                                                             Sab. 1, 13-15; 2, 23-25

Lia Husi Livro Sabedoria:

Laós Maromak mak haki’ak mate. Maromak la haksolok hodi haré mate, tan Maromak haki’ak buat hotu atu moris. Maromak haki’ak buat hotu ba di’ak. Buat hirak Maromak haki’ak, la fo mate. Mate nia kbiit la ukun rai, basá, justiça la mate. Maromak haki’ak ema atu la bele mate. Maromak haki’ak ema tuir Nia ilas rasik. Mate tama rai klaran, tan diabo laran moras, diabo nia emar sira de’it mak hetan terus ne’e.

Maromak Futar Lia.

 

Salmo Resposorial                                                                                                                                                          Sal. 29 (30), 2. 4. 5-6. 11-12ª. 13b

Refrão :  Na’i Maromak, ha’u liban Ita Boot,

                  Tan Ita Boot soy ha’u atan!!! Repete-se

 

Na’i Maromak, ha’u atan hakarak haliban Ita Boot,

Tan Ita Boot mak haraik liberdade mai ha’u atan;

Ita la husik ha’u funu baluk sira hamnasa ha’u

Ita hasai ha’u klamar housi mate;

Ita halo ha’u moris housi mate sira leet. Refrão

 

Imi sira hotu be hadomi Maromak,

Fo agradece ba Nia naran Santo.

Maromak hirus la kleur de’it;

Nia hatudu laran luak iha ita moris tomak.

Ita tanis karik loro-kraik,

Dader ita hamnasa hikas. Refrão

 

Maromak rona netik ha’u,

Sadia netik ha’u

Hodi Ita Boot nia graça,

Mai tulun ha’u.

Ha’u nia susar nakfila tiha ba ksolok.

Ha’u sei hawelok Ita Boot ba nafatin. Refrão

 

Segunda Leitura                                                                                                                                                                                      2 Cor. 8, 7-9. 13-15

Lia husi S. Paulo nia surat ba sarani sira iha Corinto:       

Maun-alin sira: Tan imi riku teb-tebes, riku tuir imi nia fiar, riku tuir imi nia lia-fuan, riku tuir imi nia matenek, riku tuir imi nia serviço, riku tuir imi nia laran di’ak nebé imi simu housi ami, tan ne’e, imi sei hatudu mos katak, imi riku iha imi laran luak: Nia ema riku, halo-An ba ema ki’ak, tanba imi, atu hodi nia ki’ak imi sai riku. Ne’e laós katak halo imi moris iha susar laran, atu ema seluk sira bele moris ho skolok; maibé atu halo ema hot-hotu iha hanesan-hanesan. Ohin lorn, hodi imi nia riku, imi fo tulun ba ema seluk, atu aban-bain-rua sira nia riku bele halo di’ak mos ba imi. Nune’e, ema hot-hotu bele moris  ho ksolok hanesan-hanesan, nu’udar Biblia hateten: “La resin liu bas é iha barak, la kuran liu bas é iha wituan de’it”.

Maromak Futar Lia. 

 

Aclamação

Refrão : Aleluia. Aleluia! Repete-se

                  Jesus Cristo, ita Maksoyn sobu mate hodi

                  Evangelho halo moris nabilan. Refrão

 

 Evangelho                                                                                                                                                                                                              Mc. 5, 21-43

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus  sa’e ro, liu fali ba tasi sorin. Ema lubun boot hale’u tiha Nia, halo Nia hela iha tasi ibun. Iha oran ne’e, chefe sinagoga nian ida, naran Jairo, to’o daudaun mai. Haré tiha Jesus, nia monu-ain hodi husu nune’e: “Ha’u nia oan feto besik atu mate. Ita hit-an mai tau liman iha nia, atu soy nia, atu nia bele moris”. Jesus ba hamutuk ho nia. Ema lubun boot ba hamutuk ho Nia, habit Nia. Feto ida, liu ona tinan sanulu resin rua mak fakar ran. Nia terus teb-tebes ho douror barak. Nia lakon mohu riku-soin hotu, la hetan di’ak ida; aat liu tan ba daudaun. Tan nia rona ko’alia kona ba Jesus, nia mai housi kotuk iha ema lubun sira leet, hodi kona Jesus nia hena.  Basá, nia dehan ba nia-an rasik: “ Ha’u kona de’it nia hena mos, ha’u sei hetan di’ak ba ha’u moras”.

Iha oras ne’e kedas, nia ran la fakar, nia isin lolon tomak hetan di’ak. Jesus hatene kedas katak: kbiit ida sai housi Nia. Nia fila ba ema lubun boot husu: “Ema sé mak kona Ha’u nia hena?” Escolante sira dehan ba Nia: “ Ema lubun habit daudaun ita, Ita sei husu: sé mak kona daudaun Ha’u hena?” Maibé, Jesus hateke hale’u, hodi haré ema nebé halo buat ne’e. Feto ne’e, nakdedar ho tauk, tan hatene buat sá mosu ba nia; tan ne’e, nia mai hakne’ak iha Jesus ain, hodi dehan sai lialós hotu. Jesus dehan ba nia: “Ha’u oan feto, ó nia fiar mak soy ó! Ó bele ba ona; ó hetan fali isin di’ak”. Nia sei ko’alia hela, ema sira housi chefe sinagoga nia uman mai dehan: “Chefe, ita oan feto mate ona. Haterus tan mestre atu halo sá ida?” maibé, rona liafuan hirak ne’e, Nia dehan ba chefe sinagoga: “ó keta ta’uk, husu katak ó fiar”. Nia la husik ema ida tuir Nia; Nia lori de’it Pedro, Tiago, ho João, Tiago nia alin. Sira to’o iha chefe Sinagoga nia uman. Jesus hetan ema rungu-ranga: balu tanis, balu hakilar. Nia tama hodi husu ba sira: “Tan sá imi tanis hanesan ne’e? Labarik la mate, nia toba!” sira hasara Nia. Jesus haruka sira sai hotu tiha, Nia lori labarik nia aman no inan, ho tan sira nebe mai hamutuk ho Nia, sira tama ba fatin nebé labarik hela ba. Nia kaer labarik nia liman, hodi dehan: “Menina, Ha’u haruka ó, hamriik tiha”,, nia hamriik kedas, hahu la’o, basá, nia iha ona tinan sanulu resin rua. Ema hotu hakfodak. Jesus lia tun ba sira hodi bandu atu ema ida la bele hateten buat ne’e; hafoin Nia haruka fo han labarik. 

Lia Maksoyn.

Leave a Reply

Your email address will not be published. Required fields are marked *