shadow
Diocese de Dili > NOTÍCIAS > LETURA DIÁRIA > Segunda-Feira, XVIII Semana Tempo Comum

Segunda-Feira, XVIII Semana Tempo Comum

TRANSFIGURAÇÃO DO SENHOR

ANO B

 

Primeira Leitura                                                                Dan. 7. 9-10, 13-14

Lia housi Profecia Daniel nian:

Uanhira ha’u haré daudaun hela, trono balu hatur-an tiha, no katuas lulik ida ba hatodan-an tiha. Nia hatais mutin hanesan kalohan, Nia fúuk lahan hanesan lan mós nian. Nia trono mesak ahi lakan, ho roda nabilan ahi moris nian. Housi nia oin, suli sai mai hanesan ué nabilan ahi lakan nian.  Ema rihun ba rihun serbi Nia, ema tokon ba tokon hôrik hela iha Nia oin. Hahu hala’o tribunal, livro sira mós hahu nakloke. Ha’u hatéke hela ba buat nebe mosu iha kalan, ha’u haré, mosu mai housi kalohan laran, Ida hanesan Mane-Maksoin. Nia lao daudaun, sira lori Nia ba Katuas lulik futar oin. Nia simu biit atu ukun nu’udar Liurai. Povo tomak, nação hot-hotu, ema tomak iha mundo rai-klaran hakru’uk hodi serbi Nia. Ninia biit rohan laek sei la lakon. Ema ida sei la sobu Nia Reino.

Maromak Futar Lia.

 

Salmo Responsorial                                                                                                                            Sal. 96(97). 1-25-6, 9 (R. 1ª, 9ª)

Refrão : Na’i mak Liurai, Leten áas liu rai tomak!!! Repete-se

 

Na’i mak liurai, rai tomak haksolok ba;

Nusa lub-lubun haksolok ba.

Nia hatais kalohan no nakukun,

Justiça no direito mak Nia trono nia hun. Refrão

 

Foho sira naben hanesan lilin,

Iha Na’i rai tomak nia oin.

Lalehan haklaken Nia justiça,

Povo tomak haré Nia glória. Refrão

 

Na’i, Ita mak áas liu rai tomak,

Áas liu maromak hot-hotu.

Haksolok iha Na’i ba, ema justo sira,

Hahi ba Nia naran santo. Refrão

 

Segunda Leitura                                                                                                                                                                       2Ped. 1. 16-19

Lia housi São Pedro nia segunda Surat:

Doben sira: Ami la buka buat kmanek falso atu fó hatene imi kona ba Na’i Jesus Cristo Nia biit nia Nia fila hikas mai; maibe tan ami haré Nia kmanek ho ami nia matan rasik. Basá Nia simu housi Aman Maromak naran boot no glória, uanhira housi glória lalehan tun ba Nia lian ne’e: “Ida ne’e mak Ha’u Oan, Ha’u Oan doben tebes; iha Nia Ha’u tau Ha’u neon tomak”. Ami rona tiha lian ne’e, nebe tun ba Nia housi lalehan, uanhira ami hamutuk hela ho Nia iha foho santo.

Nune’e, profeta sira nia mensagem haraik barani liu tan mai ami; imi halo di’ak hodi sée tilun ba Nia hanesan ahi-oan nebe nabilan iha fatin nakukun, to’o rai loron, to’o moris iha imi fuan fitun dader nian.

Maromak Futar Lia.

 

Aclamação

Refrão : Aleluia, Aleluia! Repete-se

                  Ida ne’e mak Ha’u Oan doben, iha Nia Ha’u tau Ha’u neon tomak.

                  Imi rona nia ba. Refrão

 

Evangelho                                                                                                                                                                                        Mc. 9. 2-10

Na’i Jesus Cristo nia Evangelho nu’udar São Marcos haktuir:

 Iha tempo neba, Jesus lori Pedro, Tiago no João, lori sira mesak ba foho áas tebes ida. Nia nakfilak-an iha sira oin: Nia hena sira nabilan, mutin teb-tebes, ema ida iha rai ne’e labele halo mutin liu. Hafoin, Moisés ho Elias mosu ba sira, ko’alia daudaun ho Jesus. Pedro hahu ko’alia dehan ba Jesus “Mestre, di’ak oinsá ita hôrik ona iha ne’e! Ita halo takabaluk tolu: Ida ba Ita, ida ba Moisés, ida seluk ba Elias”. Tebes, nia lahatene atu dehan sáida lós, tan sira ta’uk teb-tebes. Kalohan ida tun mai, taka tiha sira, housi kalohan ne’e, rona lian ida: “Ida ne’e Ha’u Oan doben. Imi rona Nia ba”. Teki-tekir, hateke hale’u sira la haré tan ema ida; Jesus mesak hamutuk ho sira.

Tun housi foho mai, Jesus dehan ba sira atu keta haktuir ba ema ida buat nebe sira haré, uanhira Mane-Maksoi la dauk moris hi’as housi mate. Ne’e duni, sira rai nonok buat ne’e ba sira, maibe, sira haksesuk malu, moris hi’as housi mate katak sá ne’e.

Lia Maksoyn.

Leave a Reply

Your email address will not be published. Required fields are marked *