shadow
Diocese de Dili > NOTÍCIAS > Notícias > Cruz Sinal Salvação

Cruz Sinal Salvação

DCDD, Terca-feira loron 7 fulan Agosto 2018, Paroquiano São Francisco Xavier Dare ho antusiasmo no nakonu ho oração hodi reza no hananu acompanha hikas Ilas Cruz Jovem no Ilas São Francisco Xavier fila hikas ba Paróquia, iha ne’ebe durante tinan ida nia laran lao hadulas Estação, bairos, comunidade sira ne’ebe pertence ba iha Paróquia Dare. Atividade espiritual ne’e halao iha lorokraik tuku 3;00 otl. Hafoin sarani sira entrega tiha Ilas Cruz Jovem no Ilas São Francisco Xavier ba Paróquia hodi continua kedas ho Eucaristia Santa ne’ebe preside husi Pe. Giovani de Souza Melo iha ressinto Paróquia Dare. Relaciona ho evento inportante ne’e, iha homilia Pe. Giovani de Souza Melo haklaken katak, Durante tinan ida nia laran presença Cruz iha ita nia le’et hamutuk ho ita nia mahein Ilas São Francisco Xavier sae foho tun foho hodi tama iha ita ida-idak nia knua, aldeia no bairos. No ohin Cruz fila hikas fali mai iha Paróquia atu nune’e ita bele entrega fila fali Cruz ida ne’e ba ita nia maluk sarani sira paróquia Ilomar Diocese Baucau nian. Tanba nee, durante tinan ida nia laran ita koko tiha ona oinsa midar no moruk, ksolok no terus, hamnasa no triste husi ida-idak nia experiência ho presença Cruz Jovem iha ita nia família, comunidade, sociadade no mos iha ita ida-idak nia an. Iha realidade moris ohin loron nian ita hasoru desafio, dificuldade no obstâculo oi-oin nu’udar inan-aman, nu’udar jovem adulucénte no kikoan hodi halo ita la fiar ba presença Na’i Maromak ninian iha ita nia moris. Tanba ne’e Jesus bolu fali ita liu husi ita nia fiar. Dala ruma ita nia fiar ne’e nakdoko tanba laloran moris ne’ebe mak bo’ot tebes. Maibe hakasan nafatin fiar ba Jesus.

Pe. Giovani de Souza Melo dehan tan,Durante tinan ida ha’u hanoin katak, Cruz nia presença iha ita nia le’et, Cruz ne’e haraik mai ita salvação liu-liu ba sarani paroquiano São Francisco Xavier. Cruz ida ne’e mai transforma duni ita no muda ita nia moris husi moris ida ne’ebe tuan, moris ida ne’ebe lori ita ba mate atu bele hetan fila fali moris foun no lori ita ba salvação. Tanba ne’e maske Cruz ne’e bele hiitan sai husi ita nia paróquia, maibe sinal cruz lori sinal salvação, lori mudança, lori tranformação mai ita ida-idak nia moris sei halo mudança bo’ot ida mai ita sarani paroquiano São Francisco Xavier Dare. Ita espera katak durante tinan ida nia laran cruz ne’e lori duni ita ba iha graça no transformação ida. (Alin/Leo)

Leave a Reply

Your email address will not be published. Required fields are marked *