shadow
Diocese de Dili > NOTÍCIAS > LETURA DIÁRIA > Quarta-Feira, XVIII Semana Tempo Comun

Quarta-Feira, XVIII Semana Tempo Comun

Ano B

 

Primeira Leitura                                                                      Jer. 31. 1-7

Lia housi livro Jeremias nian:

Na’i dehan: “Iha tempo ne’e, Ha’u sei sai nu’udar Maromak, ba tribo hotu Israel nian; sira sei sai Ha’u Nia povo”.

Na’i ko’alia nune’e:  “Povo nebe seidau’k mate, hetan Maromak Nia laran di’ak iha rai fuik maran; Israel atu ba to’o ona iha nia tur fatin”. Housi dook, Na’i mosu ba sira hodi dehan: “Ha’u hadomi ó ho domin rohan laek; tan ne’e, Ha’u rai Ha’u Nia di’ak ba ó. Ha’u sei hari hikas fali ó: “Fetorá Israel nian, ó sei sai foun hikas fali. Ó sei ba hikas fali, hafutar-an ho ó nia tamborin sira atu hola parte iha dansa ksolok nian. Ó sei ba kuda ai uvas sira iha foho Samaria nian; sira nebe kuda ai hirak ne’e sei ku’u nia fuan. Basá,  sei mai loron ida iha nebe  senatinela sira hakilar iha foho Efraim nian: ‘Imi hamriik ba! Ita sa’e ba Sião ba hasouru Na’i, Ita Maromak!”’

Na’i dehan nune’e: “Tan Jacob, imi hakilar ho ksolok maka’as ba, hahi ida be uluk liu nação sira hotu. Halo, atu ema hotu rona imi nia hahi sira! Haklaken ba: ‘Na’i soi tiha ona Nia povo, resto housi Israel oan sira”.

Maromak Futar Lia.

 

Salmo Responsorial                                                                                                                         Jer. 31. 10, 11-12ab, 13 (R. cf. 10d)

Refrão : Hanesan bibi-atan hein nia bibi sira,

                 Nune’e mós Na’i hein ita. Repete-se

 

Nação sira, rona didi’ak Na’i nia liafuan ba,

Haklaken ba nusa sira be dook:

“Ida nebe halo namkari Israel, sei halibur fali nia,

Sei tau matan ba nia hanesan

Bibi-atan ida, ba nia bibi sira.” Refrão

 

Na’i soi tiha ona Jacob,

Hasai nia housi ema nebe ukun nia, nia liman.

Sira sei fila hikas ho ksolok ua’in ba foho Sião,

Hodi ba simu Na’i nia bensa. Refrão

 

Fetorá sei dansa ho ksolok,

Foin sa’e no katuas sira sei hahi.

Ha’u sei nakfila nia lutu ba ksolok,

Nia laran susar sei nakfila ba hamnasa. Refrão

 

Aclamação

Refrão : Aleluia, Aleluia! Repete-se

                 Profeta boot ida mosu tiha iha ita nia leet:

                  Maromak mai haré tiha Nia povo. Refrão

 

Evangelho                                                                                                                                                                                     Mt. 15. 21-28

Na’i Jesus Cristo nia Evangelho nu’udar São Mateus haktuir:

Iha tempo neba, Sai tiha housi neba, Jesus liu ba rai Tiro no Sidonia nian. iha oras neba feto cananeia ida nebe mai housi rai neba hahu hakilar dehan: “Na’i, David nia Oan, sadi’a ha’u: diabo fó terus boot ba ha’u nia oan feto.” Maibe Nia la hatan liafuan ida. Escolante sira hakbesik ba Nia hodi husu: “Hatan tiha ba nia ba, basá nia hakilar bei-beik tuir ita. “Nia hatan: “Ha’u mai de’it ba bibi sira nebe lakon housi umakain Israel nian.” Maibe feto ne’e mai hakneak iha Nia oin dehan: “Na’i, tulun ha’u!” Nia simu: “La di’ak hasai oan sira nia aihan  hodi soe fali ba asu oan sira!” Feto ne’e dehan fali: “Ne’e lós duni, Na’i; maibe asu oan sira mós han etu mumun nebe monu housi sira na’in nia mesa.” Jesus hatan ba nia: “Feto, ó nia fiar boot tebes! Halo duni tuir ó hakarak ba.” Iha oras neba, nia oan feto hetan fali isin di’ak.

Lia Maksoyn.

Leave a Reply

Your email address will not be published. Required fields are marked *