shadow
Diocese de Dili > NOTÍCIAS > REFLEXÃO > JESUS, PÃO MORIS TUN HUSI LALEHAN

JESUS, PÃO MORIS TUN HUSI LALEHAN

REFLEXÃO & LEITURA DOMINGO COMUM XVIII/Ano B/2018

Ex 16,2-4.12-15   Ef 4,17.20-24   Jo 6,24-35

 

Primeira Leitura                                                                                                                                                            Ex.  16,  2-4.   12-15

Lia Housi Livro Êxodo:

Iha loron hirak nebá, iha rai-fuik maran, Israel oan sira hotu hahú hamúu Moisés no Aarão. Israel oan sira hateten ba sira na’in rua:”Ami mate tiha karik iha rai Egipto, iha Maromak nia Liman, kala di’ak liu; wainhira ami tur hein hela na’an iha sanan, wainhira ami sei han pão tuir ami nia hakarak! Imi dada ami mai iha rai-fuik maran ida ne’e atu halo povo ida ne’e mate hotu tan hamlaha”. Tan ne’e, Maromak lia tun ba Moisés: “Ha’u sei halo ai-han namkari housi lalehan ba imi. Povo sei sai ba hili ai-han ne’e natón de’it ba loron ida-ida nian. Nune’e, Ha’u hakarak haré povo ne’e tuir eh la tuir Ha’u nia ukun. Ha’u rona Israel oan sira hamúu Ha’u. Tan ne’e, ó sei hateten ba sira: Ohin loro-kraik imi sei han na’an. Aban dader imi sei han pão to’o bosu. Nune’e, imi hatene katak Ha’u mak Na’i, imi nia Maromak”. Iha loron ne’e, mosu duni kiu-kai barak teb-tebes, to’o taka metin sira nia ai-hun. Iha fali dadersán, maha-wén labis ida hadulas tiha sira nia  ai-hun. Maha-wén ne’e maran tiha, mosu kedas iha rai-leten buat oak ida hanesan wé furin mak taka rai. Haré tiha ne’e, Israel oan sira husu ba malu: “ Man-hu? Katak sa mak ne’e”.- Basá, sira la hatene buat ne’e. Moisés hateten ba sira: “ Ne’e ai-han Maromak haraik ba imi atu han”.

Maromak Futar Lia.

 

Salmo Responsorial                                                                                                                      Sal. 77(78),  3,  4bc.  23-24.  25.  54

Refrão : Na’i haraik ai-han lalehan ba sira!!! Repete-se

           

  • Ami rona dehan,ami aman sira haktuir mai

          Na’i kbiit no buat foun Nia halo. Refrão

           

  • Nia lia tun ba kalohan sira iha lalehan,

          Nia loke odamatan lalehan;

          Nia hamonu maná hodi fo han ba sira,

          Nia haraik ai-han lalehan ba sira. Refrão

           

  • Ema ida-idak bele han kbiit Na’in sira nia ai-han;

           Maromak haraik ai-han wa’in ba sira.

           Nia lori sira ba nia rain santa

           Lori ba foho nebé nia manán. Refrão

 

Segunda Leitura                                                                                                                                                                    Ef. 4, 17. 20-24

Lia housi São paulo nia surat ba sarani sira iha Êfeso:

Maun-alin sira: Hodi Maromak nia naran, Ha’u hateten sai ba imi: hodi hanourin ida ne’e ba imi: Gentio sira moris tuir sira moris folin laek. Imi la bele moris hanesan sira. Imi rona ema hanourin lolós karik kona ba Jesus, imi sei  haré katak laós nune’e mak imi hahú  hatene Cristo. Imi sei husik imi nia moris uluk nian, imi la bele sai tan hanesan uluk wainhira imi halo tuir de’it imi nia hakarak aat. Imi halo didi’ak imi laran, imi haki’ak hahalok di’ak ema foun, Maromak  ílas nian, tuir justiça no moris santo lolós.

Maromak Futar Lia.

 

Aclamação

Refrão : Aleluia, Aleluia! Repete-se

                  Ema la moris de’it ho ai-han,

                   Maibé, ho lia-fuan hotu nebé

                   Mai housi Maromak futar ibun. Refrão

 

Evangelho                                                                                                                                                                                      Jo.  6, 24-35

Na’i Jesus Cristo Nia Evangelho Nu’udar São João haktuir:

Iha tempo nebá, ema sira haré katak Jesus ho nia Escolante sira la iha ona tasi ibun. Tan ne’e, sira sa’e hotu ba ró, he’an to’o Cafarnaum atu buka Jesus. Hetan tiha Jesus iha tasi sorin balu ba, sira dehan ba Nia: “ Mestre, Ita to’o iha ne’e houri bain hira?” Jesus lia tun ba sira: “ Ha’u dehan tebes ba imi: Imi buka Ha’u, laós tan imi haré milagre sira,maibé, tan imi han pão to’o bosu didi’ak. Imi sei kaer serviço, laós tamba ai-han nebé mohu, maibé, tan ai-han nebé la mohu tinan ba tinan. Ai-han ne’e mane maksoyn mak sei haraik ba imi. Ba Mane Maksoyn ne’e duni, mak Aman lós sá atu kaer Maromak tau marca. Sira hasa’e lia ba Nia dehan: “ Ami sei halo lós sá atu kaer Maromak nia serviço?” Jesus lia tun ba sira: “ Maromak nia serviço mak ida ne’e: Imi fiar ema ida nebé Nia haruka mai”. Sira hasa’e fali lia ba Nia: “ Ita halo milagre sá, atu ami haré hodi fiar? Ita halo buat foun sá? Iha rai-fuik maran ami nia bei-ala sira han maná, nu’udar escritura hateten: Sira han pão ida tun housi lalehan”. Jesus lia tun ba sira: “ Ha’u dehan tebes ba imi: Laós Moisés mak fo ba imi pão be tun housi lalehan. Maromak nia ai-han mak tun housi lalehan, atu fo moris ba mundo”. Sira dehan ba Nia: “Na’i, haraik nafatin ai-han ne’e mai ami!” Jesus hatán ba sira: “Ha’u mak ai-han moris nian: Ema nebé hakbesik mai Ha’u, niasei la hamlaha ta; ema nebé fiar Ha’u, nia sei la hamrook tan”.

Lia Maksoyn.

 

Reflexão :

JESUS, PÃO MORIS TUN HUSI LALEHAN

Leitura sira nebe ita rona eh le iha Domingo semana nee fo imagem geral kona ba condição sociedade judaica nebe diferente. Maibé, conteudo mensagem leitura hirak nee iha relação ba malu no nakonu ho sentido. Iha relação ba malu tanba mensagem nee actual tebtebes ba moris sarani nian. Mensagem eh Lia menon Evangelho nian nee relevante tanba nudar criatura sarani, ita precisa rona hodi moris tuir Maromak nia Futar Liafuan. Maneira nebe halo ita besik liu ba Maromak no comunica bebeik ho Maromak mak oração. Iha Evangelho, Jesus rasik facilita comunicação ema ho Maromak liu husi oração Ami Aman. Oração nee halo ita considera Maromak hanesan aman ida no husu bebeik graça (ai-han) lorloron nian mai ita.

Iha semana kotuk ita acompanha ona relato Evangelho kona ba multiplicação pão nebe Jesus halo hodi fo han ema rihun lima resin. Iha Domingo semana nee, Evangelho sei lori ita ba compreende didiak será que ema sira han pão nee sai fiar nain eh sira keta rame-rame tuir deit Jesus tan pão karik? Iha Timor, ita ema barak lalin-an ba tuir campanha qualquer partido tanba enche mina gratis no han Nasi kotak mos gratis.

Iha Evangelho, São João hakarak loke ita nia neon katak; tan deit Jesus fo han sira to bosu, sira hakarak foti Jesus sai sira nia liurai nebe sira especta (harapkan). Jesus nia reação ba ema wain nia desejo nee mak; Jesus dada-an husi sira leet. Iha loron tuir mai wainhira Jesus fila hodi hetan hikas sira, Jesus crítica sira hodi dehan:”Ha’u dehan tebes ba imi: Imi buka Ha’u, laós tan imi haré milagre sira, maibé, tan imi han pão to’o bosu didi’ak. Imi sei kaer serviço, laós tamba ai-han nebé mohu, maibé, tan ai-han nebé la mohu tinan ba tinan. Ai-han ne’e mane maksoyn mak sei haraik ba imi.  

Ita nobun no ita ida-idak certamente precisa duni ai-han ba kabun no hetan mos graça husi Maromak. Sente hamlaha no hamrook indica katak ita nia isin precisa duni ai-han. Maibé, nudar ema fiar nain, ita mos precisa hatene nodi fiar katak isin nia necessidade refelcta mos klamar nia necessidade bs’a, moris aban bainrua nian hahu dadaun ona husi saida mak ita halo agora. Sacramento Baptismo ho Sacramento sira seluk halo ita hatene katak sei iha mos moris loron aban nebe ita fiar maibé, ita la bele hatene tuir (mistério da fé).

Sacramento baptismo possibilta ita hodi ba too Aman Maromak tuir Jesus hatete nanis. Bsá, Cristo rasik hola ilas/Natureza ema ao mesmo tempo Maromak nafatin. Dala ida tan ita precisa hanoin hikas Jesus nia lian makas ba demónio iha deserto/rai fuik maran be tenik katak; ema laos moris deit ho pão maibé, ema mos precisa moris ho Maromak nia futar Lia Fuan. Tanba nee mak Jesus tenik katak; hau mak pão moris be tun husi lalehan (Eucaristia)…..ema se han ai han (comunga bebeik), se hetan moris ba nafatin. Ema se mai too Hau, nia sei la hamlaha tan. 

Desafio boot ida ba ita nobun nudar sarani católico ohin loron mak; progresso tecnologia informatica halo sarani sira nia moris dúvida ho saida mak ita fiar iha Nia Jesus Cristo nia hanorin sira. Sarani barak ohin loron indiferença (cuek) ho moris sarani nian. Desenvolvimento mundo halo ita sente Maromak la importante ba ita nia vida. Até que ita haluha katak moris laos ohin deit……moris loron aban nian sei malahuk hela ba ita. Até que matan dook mos la bele siik saida mak sei acontece iha tempo sira mai….até que Elen White, fundadora igreja prostestante adventista sabatical mos halo visãi oioin kona ba fim do mundo maibé, nem ida acontece tuir ninia calculação. Nudar sarani, Jesus hanorin ita hodi halo balanço ba moris mundo no moris aban bain rua nian. Ora et Labora…oração no serviço….isin no klamar…..físico no espiritual…..buat hirak nee precisa sarani ida-idak halo balanço. Fo impotância ba isin, la bele haluha fo mos importância ba klamar.

Jesus rasik saran moris too mate hodi liberta ita husi hanoin nakukun rai nee nian….Jesus nia hanorin sira…Jesus nia futar isin iha Eucaristia halo ita hatene taka liman hodi hateke ba lalehan aas katak Maromak fo nafatin biban atu ita fila ba dalan diak. Iha tempo uluk bei ala sira han maná no mate…ohin loron Cristo saran Ninia isin rasik atu ita hetan moris be la nahas. Fiar, Esperança no Caridade mak sai base fundamental atu ita bele cumpri didiak knaar sarani iha mundo nee.

Maske ita sei hasoru desafio moris sarani iha tempo hirak be mai maibé, ita nia fiar sarani la bele namlele hasoru lalaok hirak nee. Jesus rasik tenik atu se ita hakarak moris completamente hanesan ema, ita precisa deposita ita nia fiar ba Maromak iha Jesus Cristo ho Ninia hanorin sira. Keta haluha katak Jesus hanorin ita oração Ami Aman atu ita hatene taka liman husu harohan nafatin ba Maromak atu la bele kuran buat ida. Ita la precisa fiar Jesus tanba ita han pão mundo nian maibé, ita fiar Jesus tanba nia mak pão moris rohan laek amen. Al bele dúvida ho saida mak ita fiar. Amen assim Seja.   (ignaslopes)

Leave a Reply

Your email address will not be published. Required fields are marked *