shadow
Diocese de Dili > NOTÍCIAS > LETURA DIÁRIA > DOMINGO XIX TEMPO COMUM

DOMINGO XIX TEMPO COMUM

ANO B

 

Primeira Leitura                                                                    1 Rs. 19, 4-8

Lia housi Livro Liurai sira nian:

Iha loron hirak nebá, Elias la’o loron tomak ida, iha rai fuik maran. Hafoin, nia tur tiha iha ai oan ida nia hun, hodi hein de’it ona atu mate. Nia dehan: “Na’i, natoon ona ba! Halo ha’u mate tiha ba! Basá, ha’u laós di’ak liu ha’u aman sira!” Elias latan-an ba rai, dukur tiha iha ai-hun oan ne’e nia mahan. Maibé, Anjo ida mai fanu nia, hodi dehan: “Hader atu han!” Elias loke matan, haré, besik nia ulun, pão fuan ida, tunu de’it iha áhi klaak, haré mos wé, iha buli ida. Elias han no hemu tiha, nia toba hikas. Na’i Maromak nia Anjo mai fanu nia dala ida tan, hodi hateten ba nia: “Hader atu han, basá, dalan ó atu la’o, sei naruk”. Elias hadér tiha, nia han, nia hemu. Hafoin, nia hamriik la’o loron hatnulu no kalan hatnulu, to’o Horeb, katak Maromak nia foho.

Maromak Futar Lia.

 

Salmo Responsorial                                                                                                                                  Sal. 33(34), 2-3. 4-5. 6-7. 8-9

Refrão : Imi koko ba hodi haré, Na’i nia di’ak oin sá!!! Repete-se

Hahí Maromak loron kalan;

ha’u ibun hahí nafatin Nia.

Maromak mak ha’u nia glória.

Ema kiik sira rona Nia ho ksolok. Refrão

 

Hamutuk ho ha’u, imi haklaken Na’i nia kmanek,

hamutuk, ita hahí Nia naran.

Ha’u buka Maromak, Nia rona ha’u,

Nia hasai ha’u housi susar laran. Refrão

 

Imi fihir Nia, imi laran sei haksolok;

imi oin sei la nakraik.

Ki’ak oan ida hakilar, simu duni tulun,

nia simu kman ba nia terus tomak. Refrão

 

Maromak Anjo tau matan ba nia emar sira,

atu soy sira.

Imi koko to’ok ba, hodi haré, Na’i di’ak oin sá,

rahun-di’ak ba ema nebé halai buka Nia. Refrão

 

Segunda Leitura                                                                                                                                                                         Ef. 4, 30-5, 2

Lia housi São Paulo nia surat ba sarani sira iha Êfeso:

Maun alin sira: Keta halo Maromak nia Espírito Santo laran susar, basá, Nia tau hela ona sinal ba imi, atu to’o loron, Nia soy imi. Halakon tiha housi imi leet imi nia hirus, imi nia laran nakali, imi nia lian maka’as, imi nia hotar malu. Imi halakon tiha housi imi leet, imi nia laran aat tomak. Imi buka laran di’ak ba malu, sadia malu. Imi perdua malu, nu’udar Maromak perdua imi tan Cristo. Ne’e duni, imi haka’as-an banati tuir Maromak,  nu’udar  Maromak  nia oan doben tebes.  Imi buka  hadomi malu di’ak liu tan, hanesan Cristo hadomi ita, to’o saran-an ba Maromak tan ita, hodi hasa’e-An ba Maromak, nu’udar mutun ida kmanek liu, iha Maromak futar oin.

Maromak Futar Lia.

 

Aclamação

Refrão : Aleluia, Aleluia! Repete-se

                  Na’i lia tun dehan:

                  Ha’u ai-han moris tun housi lalehan;

                  Ema sée han ai-han ne’e,

                  Sei moris tinan ba tinan. Refrão

 

Evangelho                                                                                                                                                                         Jo. 6, 41-52 (41-51)

Na’i Jesus Cristo nia Evangelho nu’udar São João haktuir:

Iha tempo nebá, ema judeu sira hamúu Jesus, tamba Nia dehan: “Ha’u, ai-han tun housi lalehan”. Sira hateten: “Nia laós Jesus, José nia oan? Ita la hatene nia inan no aman? Nusá, mak oras ne’e Nia hateten: Ha’u tun mai housi lalehan?” Jesus lia tun ba sira: “Imi keta múmuk iha imi leet. Ha’u Aman, nebé haruka Ha’u mai, la dada karik, ema ida la bele hakbesik mai Ha’u, Ha’u sei halo nia, moris hias iha loron ikus. Profeta sira hakerek nanis ona, dehan: “Maromak rasik sei hanourin ema hotu”. Ema tomak nebé fo laran ba Aman Maromak no rona nia hanourin, ema ne’e mak hakbesik mai Ha’u. Ne’e laós katak, ema ruma haré ona Aman Maromak; ema nebé Maromak haruka mai, mak haré Aman Maromak. Ha’u dehan tebes ba imi: Ema nebé fiar, ema ne’e hetan duni moris rohan laek. Ha’u mak ai-han moris nian. Iha rai fuik maran, imi bei-ala sira han Maná, sira mate hotu ona. Maibé, ai-han tun mai housi lalehan, mak Ida ne’e. Ema nebé han ai-han ne’e, nia sei la  mate. Ha’u rasik mak ai-han moris nian, tun mai housi lalehan. Ema nebé han ai-han ne’e, nia sei moris ba nafatin. Ai-han Ha’u atu fo, mak Ha’u nia isin, saran ba rai-klaran nia moris.

Lia Maksoyn.

Leave a Reply

Your email address will not be published. Required fields are marked *