shadow
Diocese de Dili > NOTÍCIAS > REFLEXÃO > SILU FAHE PÃO

SILU FAHE PÃO

REFLEXÃO & LEITURAS DOMINGO COMUM XIX/Ano B/2018

 1Rs 19,4-8  Ef 4,30-5:2  Jo 6,41-52

 

Primeira Leitura                                                                                                                                                                         1 Rs. 19, 4-8

Lia housi Livro Liurai sira nian:

Iha loron hirak nebá, Elias la’o loron tomak ida, iha rai fuik maran. Hafoin, nia tur tiha iha ai oan ida nia hun, hodi hein de’it ona atu mate. Nia dehan: “Na’i, natoon ona ba! Halo ha’u mate tiha ba! Basá, ha’u laós di’ak liu ha’u aman sira!” Elias latan-an ba rai, dukur tiha iha ai-hun oan ne’e nia mahan. Maibé, Anjo ida mai fanu nia, hodi dehan: “Hader atu han!” Elias loke matan, haré, besik nia ulun, pão fuan ida, tunu de’it iha áhi klaak, haré mos wé, iha buli ida. Elias han no hemu tiha, nia toba hikas. Na’i Maromak nia Anjo mai fanu nia dala ida tan, hodi hateten ba nia: “Hader atu han, basá, dalan ó atu la’o, sei naruk”. Elias hadér tiha, nia han, nia hemu. Hafoin, nia hamriik la’o loron hatnulu no kalan hatnulu, to’o Horeb, katak Maromak nia foho.

Maromak Futar Lia.

 

Salmo Responsorial                                                                                                                                  Sal. 33(34), 2-3. 4-5. 6-7. 8-9

Refrão : Imi koko ba hodi haré, Na’i nia di’ak oin sá!!! Repete-se

Hahí Maromak loron kalan;

ha’u ibun hahí nafatin Nia.

Maromak mak ha’u nia glória.

Ema kiik sira rona Nia ho ksolok. Refrão

 

Hamutuk ho ha’u, imi haklaken Na’i nia kmanek,

hamutuk, ita hahí Nia naran.

Ha’u buka Maromak, Nia rona ha’u,

Nia hasai ha’u housi susar laran. Refrão

 

Imi fihir Nia, imi laran sei haksolok;

imi oin sei la nakraik.

Ki’ak oan ida hakilar, simu duni tulun,

nia simu kman ba nia terus tomak. Refrão

 

Maromak Anjo tau matan ba nia emar sira,

atu soy sira.

Imi koko to’ok ba, hodi haré, Na’i di’ak oin sá,

rahun-di’ak ba ema nebé halai buka Nia. Refrão

 

Segunda Leitura                                                                                                                                                                         Ef. 4, 30-5, 2

Lia housi São Paulo nia surat ba sarani sira iha Êfeso:

Maun alin sira: Keta halo Maromak nia Espírito Santo laran susar, basá, Nia tau hela ona sinal ba imi, atu to’o loron, Nia soy imi. Halakon tiha housi imi leet imi nia hirus, imi nia laran nakali, imi nia lian maka’as, imi nia hotar malu. Imi halakon tiha housi imi leet, imi nia laran aat tomak. Imi buka laran di’ak ba malu, sadia malu. Imi perdua malu, nu’udar Maromak perdua imi tan Cristo. Ne’e duni, imi haka’as-an banati tuir Maromak,  nu’udar  Maromak  nia oan doben tebes.  Imi buka  hadomi malu di’ak liu tan, hanesan Cristo hadomi ita, to’o saran-an ba Maromak tan ita, hodi hasa’e-An ba Maromak, nu’udar mutun ida kmanek liu, iha Maromak futar oin.

Maromak Futar Lia.

 

Aclamação

Refrão : Aleluia, Aleluia! Repete-se

                  Na’i lia tun dehan:

                  Ha’u ai-han moris tun housi lalehan;

                  Ema sée han ai-han ne’e,

                  Sei moris tinan ba tinan. Refrão

 

Evangelho                                                                                                                                                                         Jo. 6, 41-52 (41-51)

Na’i Jesus Cristo nia Evangelho nu’udar São João haktuir:

Iha tempo nebá, ema judeu sira hamúu Jesus, tamba Nia dehan: “Ha’u, ai-han tun housi lalehan”. Sira hateten: “Nia laós Jesus, José nia oan? Ita la hatene nia inan no aman? Nusá, mak oras ne’e Nia hateten: Ha’u tun mai housi lalehan?” Jesus lia tun ba sira: “Imi keta múmuk iha imi leet. Ha’u Aman, nebé haruka Ha’u mai, la dada karik, ema ida la bele hakbesik mai Ha’u, Ha’u sei halo nia, moris hias iha loron ikus. Profeta sira hakerek nanis ona, dehan: “Maromak rasik sei hanourin ema hotu”. Ema tomak nebé fo laran ba Aman Maromak no rona nia hanourin, ema ne’e mak hakbesik mai Ha’u. Ne’e laós katak, ema ruma haré ona Aman Maromak; ema nebé Maromak haruka mai, mak haré Aman Maromak. Ha’u dehan tebes ba imi: Ema nebé fiar, ema ne’e hetan duni moris rohan laek. Ha’u mak ai-han moris nian. Iha rai fuik maran, imi bei-ala sira han Maná, sira mate hotu ona. Maibé, ai-han tun mai housi lalehan, mak Ida ne’e. Ema nebé han ai-han ne’e, nia sei la  mate. Ha’u rasik mak ai-han moris nian, tun mai housi lalehan. Ema nebé han ai-han ne’e, nia sei moris ba nafatin. Ai-han Ha’u atu fo, mak Ha’u nia isin, saran ba rai-klaran nia moris.

Lia Maksoyn.

 

Reflexão :

SILU FAHE PÃO

 

Ha’u mak ai-han moris nian. Ema nebé han ai-han ne’e, nia sei moris ba nafatin. Ema nebé fiar, ema neee hetan duni moris rohan laek. Ha’u mak ai-han moris nian. Imi buka hadomi malu di’ak liu tan, hanesan Cristo hadomi ita, to’o saran-an ba Maromak tan ita, hodi hasa’e-an ba Maromak, nu’udar mutun ida kmanek liu, iha Maromak futar oin. Jesus lia tun  ba sira: “Imi keta múmuk iha imi leet. Ha’u aman nebé haruka ha’u mai, la dada karik, ema ida la bele besik mai Ha’u, Ha’u sei halo nia, moris hias iha loron ikus.

Semana hirak tutuir malu, relato Evangelho koalia kona ba pão no ai-han moris ema nian. Semana nee, ita contempla nafatin Jesus nia lia fuan be tenik:”Hau mak pão moris tun husi lalehan. Ema se han pão nee, nia sei moris ba nafatin”. Saída mak Jesus hatete no halao kona ba pão moris nee, Igreja halo explicação base aba experiência profeta Elias nebe fiel no forte hodi cumpri nia knaar too remata. Bas’a, Maromak mak haruka, Maromak mos prepara ai-han moris ba hirak nebe halao missão nee.  

Elias nudar profeta ida nebe resiste contra profeta falsu sira nebe hasoru Javé (laos testemunha jeova) no sira haklaken doutrina falso ho maromak falso sira. Profeta falso hirak nee dala barak la sucesso hasoru Elias tan Maromak hamutuk ho Elias. Iha momento balu, Elias deseperado (lakon esperança), laran taridu too hakarak atu mate deit. Elias dehan; “Na’i, natoon ona ba! Halo ha’u mate tiha ba! Basá, ha’u laós di’ak liu ha’u aman sira!”

Elias enfrenta difuculdade moris durante estadia eh viagem liu husi deserto (rai fuik maran). Maibé, afinal Maromak nebe haruka nia, sempre tulun Elias. Maromak haraik ba nia pão ho we fresco hodi fo força ba nia halao missão santa nee. Basá, maromak hatene katak; Elias sei la buka diak ba nia-an rasik maib’e, cumpri duni Maromak nia ordem sira. Tanba nee mak Maromak sempre protege no tulun nia maske Elias too ponto balu sente deseperado ho knaar todan nee.   

Basea ba situação ida nee afinal, tanto Elias tanto ita povo sarani, pão (ai-han) nudar fundamento ba moris ema nian. Pão (hahan) mak sai centro ba ema nia moris. Significa se hahan la iha ema la bele moris ih arai nee.

Iha Evangelho João Domingo semana nee, ita rona, lé no acompanha katak; Cristo mak pão moris, Cristo mak moris! Nunee, han Cristo nia fuatar isin no hemu Nia futar ran, iha sentido klean liu husi sentido fiar deit. Imagem Jesus nudar “pão moris” sai nudar fundamento moris Cristão Católico lolos.  Se Jesus dehan: ”Hau mak pão moris” nee laos hatudu pão deit maibé, indica/hatudu Jesus nia pessoa rasik. Jesus nia-An nee mak pão lolos nebe Nia haraik. Jesus laos deit pão nebe bele habosu isin ou bele hakonu sentimento hamlaha. Jesus mak pão nebe bele habosu hamlaha ba lialos (verdade/kebenaran).

Ita nudar sarani be simu ona Baptismo, Eucaristia nudar dalan único hodi hasoru malu no habelun ho Cristo nebe moris hias. Concretamente Jesus fo duni pão moris husi lalehan tan nia saran Ninia moris ba ita nia diak. Jesus foti pão nee significa katak nia foti pão nee husi ita niamoris, maibé, pão husi ita nia moris nebe unificado (disatukan) ho pão Jesus nia moris rasik. Pão nee hetan bensão, nee significa Jesus hasanto (haraik bensão) ita nia vida ho Ninia moris rasik. Tanba nee mak dala barak ita rona iha Evangelho, Jesus dehan: Sai santo basá, imi nia Aman lalehan nee Santo (‘Sede perfeitos assim como o vosso Pai celeste é perfeito’ (Mt 5,48). Sereis santos porque Eu sou Santo’ (Lv 1,44-45). Odamatan boot ba santidade nee mak Baptismo. Ita nobun nebe simu ona Baptismo, nee significa katak katak qualquer oração eh acção nebe ita halo relaciona ho ita nia moris sarani, precisa orienta ba santidade tuir ordem no doutrina Jesus nian.

Iha Missa Santa (Eucaristia). Liliu iha momento consagração, Jesus silu fahe pão. Hanesan Jesus hatudu ona, ita nudar sarani iha moris lorloron, ita sempre tama iha situação terus, pressã, desesperado, marginalizado, lakon kbiit no esperança. Dala barak ita mos sente saida mak Elias sente iha ninia tempo; lakon esperança, la iha kbiit, até que nia husu Maromak hakotu nia moris (laos oho-an/tara-an). Maibé, iha momento ita sente moris nee namlele, iha neba Jesus presente hamutuk ho ita. Jesus mak pão moris nebe Maromak haraik mai ita. Elias wainhira hein atu mate deit ona, Maromak haruka anjo sira lori ai han ba nia tan nia missão seidauk remata. Jesus rasik tenik ona ba apóstolo sira katak; Hau sei horik ho imi too mundo nia rohan (Emanuel).

Jesus sili fahe pão. Nia fahe Ninia isin rasik. Jesus fo motivação, aten brani no desafia ita nudar sarani katak ita brani k eh lae enfrenta dificuldade lobuk nebe mosu iha moris nee. Iha fatin hanesan Jesus fo Lia Fuan no pão nudar bukae moris hasoru susar hirak nee nudar sinal Jesus saran Nia-An rasik ba ita. Lalaok Jesus nian nee hatudu Jesus nia fidelidade ba comprimissio too ikus iha Cruz tutun. Iha neba, wainhira too nia tempo, Jesus dehan:”Buat hotu tuir los ona/ Está consumado” (Jo 19,30).

     Tanto iha moris, tanto iha mate too momento Ressurreição, Jesus husik hela exemplo no desafio balu ba ita atu ita mos bele banati tuir.  Jesus hatete:”ba no halo tuir hanesan nee”, nee nudar desafio (lia sadik) ao mesmo tempo nudar missão lulik ida. Missão ida nee exige ita nia sentido voluntário. Infelizmente, ita Cristão Católico ohin loron, barak mak lakon ona sentido voluntário ida nee. Wainhira ita cumpri knaar sarani hodi halo actividade balu Igreja nian mos, ita hakarak hetan salário (osan). Uluk apóstolo sira halao missão nee ba fatin-fatin, sira la hetan salário maibé, iha deit Fiar ba Maromak, laran metin ba Maromak nia providência tan sira hatene katak; o trabalhador merece o seu salário (ema nebe serviço sei hetan nia kolen), Jesus tenik.

Sentido fahe pão (partilha), endereça ita ba compreensão ida katak; pão nebe silu fahe ba malu, pão nee certamente la bele nakfahe se ita la fahe pão nee ho liman rua. Se ita uza liman sorin deit, oinsa pão nee bele fahe ba baluk baluk? Se ita fahe, ita precisa uza liman rua hodi fahe. Símbolo liman rua nee refere ba atitude volutário nee. Halo buat ruma ho fuan no laran mos (la subar interece seluk iha neba). Se ida nee ita halo duni, nee mak foin hatudu qualidade Católico lolos tuir Jesus haruka. Jesus silu fahe pão ba hothotu, Jesus la subar baluk oan ruma ba Nia-An rasik. Sarani nebe hatene didiak knaar nee, precisa fahe buat ruma be nia iha atu hotu hotu hetan hanesan. Partido político balu ohin loron mai ho princípio; Fahe riku soin hanesan ba hothotu. Se política ida nee concretisa duni, nee bele dehan expressa duni doutrina fundamental Cristão Católico.

Tan nee, mai ita reza bebeik atu ita nia participação iha Eucaristia (missa), bele sai kmanek liu tan iha moris sarani nian ahodi fahe saida mak ita ba malu. Pão consagrado nebe ita simu iha missa, hasanto ita nia moris molok ita fahe pão nee ba ema seluk nodi cumpri knaar sarani tan Cristo harukaita participa iha missão nee. Ema tomak nebé fo laran ba Aman Maromak no rona nia hanourin, ema ne’e mak besik mai Ha’u.  Amen. Assim Seja e Bem Haja (ignas)***

Leave a Reply

Your email address will not be published. Required fields are marked *