shadow
Diocese de Dili > NOTÍCIAS > LETURA DIÁRIA > Segunda-Feira, XIX Semana iha Tempo Comum

Segunda-Feira, XIX Semana iha Tempo Comum

ANO B

 

Primeira Leitura                                                                 Ez. 1. 2-5, 24-28c

Lia housi Profecia Ezequiel nian:

Iha loron lima fulan nian, iha tinan ba dala lima be liurai Jeconias, ema hasai housi nia rain, Na’i lia tun ba sacerdote Ezequiel, Buzi nia oan, iha ema caldeu sira rain, iha mota Quebar nia ninin.

Iha neba, Na’i nia liman halolo mai ha’u leten. Ha’u fila oin, haré housi tasi feto, hakbesik-an dau-daun mai anin boot dadulas ida, kalohan boot ho ahi nabilan hodi lakan hale’u nia. Iha laran, mosu hela iha ahi nia leet hanesan besi ida nabilan tebes; iha klaran, haré ilas háat balada nian, hanesan ema na’in háat. Wainhira sira la’o, ha’u rona hela sira liras nia tarutu hanesan wé boot be suli, hanesan Maromak biit Na’in Nia lian, tarutu maka’as hanesan ema halo funu. Maibé, wainhira sira hamriik, sira hatun sira liras. Ha’u rona lian ida iha lalehan nebé hela iha sira ulun leten.

Iha lalehan nebé hela iha sira ulun leten, iha hela fatuk murak folin boot ida, hanesan trono; iha trono ne’e nia leten, iha áas liu, iha ilas ida hanesan ema. Ha’u haré, lakan hanesan besi nabilan, hafalun-an hela ho ahi housi knotak ba leten. Housi knotak ba kraik, ha’u haré hanesan ahi, nebé lakan hale’u, hanesan baur (arco-íris) nebé mosu iha lalehan wainhira udan, nune’e mos, nabilan nebé hale’u Nia. Ilas ne’e hanesan Na’i nia glórial. Wainhira ha’u haré, ha’u monu oin ba rai.

Maromak Futar Lia.

 

Salmo Responsorial                                                                                                                                        Sal. 148. 1-2a, 11-12, 13, 14

Refrão : Lalehan no rai haklaken Ita glória!!! Repete-se

  • Imi hahi Na’i iha leten liu lalehan sira nian!

          Hahi Nia iha leten áas liu!

          Nia Anjo sira hahi Nia. Refrão

  • Liurai no povo mundo nian,

          Liurai oan sira be ukun rai,

          Mane klosan no fetora sira,

          Katuas no ki’ik oan sira. Refrão

  • Imi hotu hahi Na’i Nia naran,

          Tan Nia naran Santo tebes;

          Nia biit liurai iha leten lalehan no rai. Refrão

  • Nia haksolok iha Nia povo nia biit,

          Nia sarani sira haliban Nia.

          Israel oan sira hotu, povo be Nia hili. Refrão

 

Aclamação                                                                                                                                                                                        2Tes. 2. 14

Refrão : Aleluia, Aleluia! Repete-se

                  Hodi Evangelho Na’i Maromak bolu ita atu hola parte iha

                  Ita Na’i Jesus Cristo Nia Glória. Refrão

 

Evangelho                                                                                                                                                                                     Mt. 17. 22-27

Na’i Jesus Cristo nia Evangelho nu’udar São Mateus haktuir:

Iha tempo neba, wainhira Jesus ho Nia escolante sira halibur hamutuk iha Galileia, Jesus dehan ba sira: “Sira sei saran Oan Mane ba ema sira nia liman. Sira sei oho Nia; maibé, liu tiha loron tolu, Nia sei moris hi’as.” No sira laran susar teb-tebes.

To’o tiha Cafarnaum, cobrador impostu dracma rua nian hakbesik ba Pedro hodi dehan ba nia: “Imi nia mestre selu imposto ka lae?” Nia hatan: “Selu.” To’o tiha uma, Jesus ko’alia kedas dehan: “Simão, ó hanoin oin sá? Liurai sira simu imposto rai ninian housi sé: housi sira nia oan rasik, ka housi ema seluk?” Nia hatan: “Housi ema seluk.” Jesus dehan ba nia: “Ne’e duni, oan sira la selu. Maibé, atu ema keta hanoin sala, ba tasi ba, soe kail, káer ikan nebé sai uluk; loke tiha nia ibun, ó sei hetan osan dracma háat nian. Lori osan ne’e no selu imposto ba sira ba Ha’u no ba ó.”

Lia Maksoyn.

Leave a Reply

Your email address will not be published. Required fields are marked *