shadow
Diocese de Dili > NOTÍCIAS > REFLEXÃO > JESUS LORI SALVAÇÃO BA EMA HOTU

JESUS LORI SALVAÇÃO BA EMA HOTU

DOMINGO COMUM XXIII/Ano B/2018

Is 35,4-7a   Tg 2,1-5   Mc 7,31-37

Primeira Leitura                                                                                                                                                                                                    Is. 35, 4-7ª

Lia housi livro Profeta Isaías:

Hateten sai ba sira nebé laran susar: “Laran metin ba! Keta ta’uk! Imi nia Maromak mak mai daudaun ne’e. Nia mai atu halo justiça; Nia mai atu selu imi nia kólen. Nia duni mak mai atu soy ita.”  Iha oras ne’e mak ema matan delek sira sei haré, tilun diuk sira sei rona hikas; iha oras ne’e mak ema ain kudeik sira sei haksoit hanesan rusa, nunuk sira nia nanal sei mamar hodi hananu ho ksolok. Wé boot sei nakbóas iha rai-fuik maran hodi suli iha rai maran tétuk. Rai sunuk sei fila ba debu ida; rai maran sei fila ba wé-matan.

Maromak Futar Lia.

 

Salmo Responsorial                                                                                                                                                                  Sal. 145(146), 7. 8. 9ª. 10bc

Refrão : Ha’u klamar hahí Maromak!!! Repete-se

  • Na’i tulun ho justça ema sira be terus,

          Haraik ai-han ba sira be hamlaha,

          Fo liberdade ba sira be dadur. Refrão

 

  • Na’i haraik matan ba sira be matan aat,

          Foti ema sira be neon nakraik,

          Hadomi sira be laran mos. Refrão

 

  • Na’i tahan ema sira be la’o rai,

          Tulun oan ki’ak sira no faluk sira,

          Taka dalan ba maksalak sira. Refrão

 

  • Na’i ukun tinan ba tinan;

          Ó nia Maromak, Sião, Liurai tinan ba tinan!

          Aleluia! Refrão

 

Segunda Leitura                                                                                                                                                                                                         Tg. 2, 1-5

Lia housi São Tiago Nia Surat:

Maun alin sira: Imi nia fiar iha Jesus Cristo kbiit Na’in, la bele hadomi de’it ema balun. Wainhira imi halibur an hamutuk, ema ruma mosu mai karik ho kadeli osan-mean, hatais furak, mosu mos mai ema ki’ak ida, hatais aat, keta imi haré de’it karik ba ida nebé hatais ki’ak, hodi dehan ba nia: “Ó mai tur tiha iha fatin di’ak ida ne’e”. Hafoin dehan fali ba ida nebé ki’ak: “Ó hariik iha nebá; eh mai tur besik iha ha’u ain”. Halo nune’e, imi laós fihir malu, hodi sai juíz nebé hanoin la lós? Maun alin doben sira: rona didi’ak mai: Na’i Maromak laós fihir ema ki’ak mundo ne’e nian, atu sai riku kona fiar, hodi manán Reino lalehan, nebé Nia hakotu hela lia atu haraik, ba ema sira nebé hadomi Nia?

Maromak Futar Lia.

 

Aclamação                                                                                                                                                                                                                    Mt. 4, 23

Reftrão : Aleluia, Aleluia!! Repete-se

                    Jesus hanourin Lia Foun di’ak kona ba Reino,

                    Hodi fo fali isin di’ak ba ema povo sira be moras. Refrão

 

Evangelho                                                                                                                                                                                                               Mc. 7, 31-37

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus sai fali housi rai Tiru, kona housi Sídon, hakat liu ba rai Decápole ba iha tasi Galileia nian. ema sira lori ema tilun diuk ida ba, hatudu ba Nia, nebé atu ko’alia mos susar. Sira harohan ba Jesus atu sadia nia. Jesus hado’ok-An tiha ho ema tilun diuk ne’e housi ema lubun. Nia hatama tiha liman fuan iha ema ne’e nia tilun, tau mos kabéen witoan iha ema ne’e nia nanal. Hotu, foti matan ba lalehan, Jesus dada íis maka’as, hodi dehan ba nia: “Effathá”, katak “loke ba”. Ema ne’e nia tilun nakloke kedas; nia nananl mos mamar tiha kedas, hodi hahú ko’alia mos lós. Jesus hameno sira, atu la bele dehan sai buat ne’e ba ema ida. Maibé, maski Jesus hameno hela ba sira, sira hétok dehan sai maka’as liu tan. Hakfodak liu tebes, sira dehan: “Buat hotu Nia halo mesak di’ak: halo diuk sira rona, nunuk sira ko’alia”.

Lia Maksoyn.

 

Reflexão:

JESUS LORI SALVAÇÃO BA EMA HOTU

 

          Jesus Hanorin Lia Foun di’ak kona ba Reino,  hodi fo fali isin di’ak ba ema povo sira be moras Hakfodak liu tebes, sira dehan: “Buat hotu Nia halo mesak di’ak: halo diuk sira rona, nunuk sira ko’alia”.

          Evangelho São Marcos nian semana nee (Mc 7,31-37), haktuir kona ba kura ema monok ho diuk. Maibé, molok tama too cena nee, São Marcos mos relata kona ba cura ba labarik ida (Mc 7,24-30). Iha conteudo istória rua nee, Marcos laos hakarak atu revela deit Jesus mai iha mundo hodi salva ema ho milagre sira, duni sai espírito aat, inclui mos hahalok exemplar sira seluk. Buat nebe São Marcos sublinha iha nee atu ita nobun tau iha consideração mak; Jesus hakarak salva ema hotu sem dinstinção (tanpa membedakan).

          Fatin hirak nebe Jesus realiza Ninia hahalok milagrosa sira ba ema monok no diuk mak Tiro, Sidon no Decápole nebe geograficamente laos território judeu nian. Jesus dalaruma la haklaken directamente ba rai hirak nebe la pertence ba judeu maibé, iha Ninia viagem liu husi rai seluk hirak nee mak nia aproveita halo lalaok milagrosa sira hodi refere ba ema hirak nebe fiar Jesus iha fuan laran deit. Lalaok nee mak halo ema wain simpatia ho Jesus nia doutrina foun nee. Mensagem saida mak tuir lolos São Marcos hakarak hatoo ba ita nobun ba Domingo semana nee? La seluk la leet, Jesus mai hodi tulun no salva ema hotu sem distinção (tanpa embedakan). Los duni katak Jesus origem husi Judeu no haklaken dalabarak liu ba ema judeu deit maibé, precisa ita hatene katak entre ema judeu hirak nebe tuir Jesus hodi rona doutrina hirak nee, existe mos ema balu nebe laos origem judeu maibé, fiar duni saida mak Jesus haklaken. Hahlok milagrosa sira nebe ita haré mak Jesus halo milagre ba ema judeu no mos ba ema laos judeu. Atitude ida nee deit ita bele entende didiak ona katak Jesus nia missão nee hodi salva ema hotu hotu, tanto judei, tano não judeu. Tanba nee mak wainhira moris hias tiha husi mate, Jesus fo ordem ba escolante sira hodi haklaken Evangelho ba mundo tomak: “Pergilah ke seluruh dunia, beritakanlah Injil kepada segala makhluk”//Ide por todo mundo, anunciai o Evangelho (Mc 16,15).

          Hatudu hahalok diak ba ema seluk ou ema hotu-hotu sem distinção, sai nudar fundamento principal (espírito) husi evangelização nebe kmanek tebes. Interessante tebes atu ita acompanha iha relato Evangelho nee katak; wainhira halo tiha milagre ruma, Jesus bandu ema hirak nee sasin lalaok nee atu keta fo hatene ba ema seluk. Maibé, buat nebe acontece mak; lia bandu nee encoraja sira brani liu tan hodi haktuir saida mak sira haré ho matan husi Jesus. “Buat hotu Nia halo mesak di’ak “Ia, Yesus, menjadikan segala yang baik!”.

          Nudar bukae ba ita nia moris sarani nian, ohin loron ita assite iha sociedade, avanço lobuk ida nebe halo ita admira maibé, husi progresso hirak nee hotu, causa mos degradação balu iha atitude sarani nian. Loron loron ita acompanha ema halo publicidade (iklan) barbarak kona ba andar oioin, estrada kaber, electricidade naroman, kareta motor oioin. Entre publicidade hirak nee hotu, iha fatin hanesan ita assiste mos desastre oioin iha sikun seluk mundo nian, acontece ema oho malu ifa tain fatin, ema halo aborto, ema oho no soe bebe iha lixo, estudante feto sira isin rua cedo, estudante mane sira idade kiik comete ona crime, droga iha sikun seluk, ema balu moris patarata, maibé, ema balu moris mal nutrição,….nst.

          Nee mak realidade no moras boot sociedade ohin loron no susar atu cura. Nudar Jesus nia tempo uluk, ohin loorn mos ita nafatin hetan dever (obrigação) hodi haklaken Cristo nia Evangelho. Catolico nee diak la precisa hakilar Jesus nia naran até que obriga ema seluk lee Evangelho no rona pregação barbarak hanesan irmão separado sira ohin loron aplica, liliu seita testemunha jeova nebe taka kalen ba oin hodi tama sira ema nia uma. Católico nebe diak, haklekan Evangelho liu husi vida exemplar diak iha sociedade hodi fo exemplo ba ema seluk. Iha mos grupo Católico balu nebe halo oração hodi cura ema seluk nebe hetan moras. Iha mos grupo carismático Católico nebe oras nee halo oração hodi ema seluk bele hetan isin diak ba moras ruma nebe grave.

          Uluk ema barak simpatia ho Jesus nia doutrina tan sira admira no sente hetan buat foun husi Jesus nia personalidade tomak. Até sira expressa hodi dehan:” Hakfodak liu tebes, sira dehan: “Buat hotu Nia halo mesak di’ak: halo diuk sira rona, monok sira ko’alia”. Ita agradece ba Maromak tanba hakarak  ema hotu hetan salvação. Salvação laos ba deit ema judeu, laos ba deit ema Cristão maibé, ba ema hotu iha mundo nebe deseja hetan salvação.

          Papa Paulo VI hakerek Encíclica Evangelii Nuntiandi hodi bolu ita nia atenção katak; knaar eh dever principal ita nobun nudar membro da Igreja Católica mak hakalaken Lia Foun Diak (Evangelho). Papa mos iha documento Evanglii Gaudium, fo hanoin nafatin atu ita simu Evangelho ho laran ksolok nudar novidade ba ita nia moris. Tanba nee mak Papa Francisco fo ordem atu iha lori ksolok Evangelho nee ba mos ema seluk nebe precisa rona. Ho nunee deit mak ema seluk bele conhece ita nudar Católico nebe exemplar iha sociedade no iha âmbito Igreja. Basá, salvação nebe Maromak deseja atu mundo hetan salvação. Assim Seja e Bem Haja. (Ignas)

Leave a Reply

Your email address will not be published. Required fields are marked *