shadow
Diocese de Dili > NOTÍCIAS > LETURA DIÁRIA > Sábado, XXIII Semana do Tempo Comum (ANO B)

Sábado, XXIII Semana do Tempo Comum (ANO B)

Primeira Leitura               1Cor. 10. 14-22

Lia housi São Paulo nia Primeira Surat ba sarani sira iha Corinto

Maun alin sira: Imi hadook an housi adora lulik sira. Ha’u ko’alia hanesan ba ema sira nebé matan mós; imi rasik haré ba buat nebé ha’u dehan. Cálice kmanek nebé ita fó bensa, la’os ita halo parte iha Cristo futar ran? Pão nebé ita fahe la’os ita halo parte iha Cristo nia isin? Tan pão baluk mak ida de’it, ita, maski barak, isin ida de’it, basá ita hotu halo parte iha pão ida de’it.

Haré ba Israel tuir isin: sira nebé han sacrifício sira, sira la halo parte iha altar? Ne’e duni, ha’u dehan sáida? Katak naan nebé saran ona ba lulik sira iha folin ruma? Ka katak lulik sira iha folin ruma? Lae, ha’u dehan katak buat nebé ema hasa’e, sira hasa’e ba diabo sira, la’os ba Maromak, no ha’u lakohi katak imi halo parte iha diabo. Imi la bele hemu Na’i nia copo no mós hemu diabo sira nia copo. Imi la bele halo parte housi Na’i nia mesa no mós housi diabo sira nia mesa. Ka imi hakarak koko Na’i atu Nia sai laran moras no hirus? Ita maka’as liu fali Nia?

Maromak Futar Lia.

 

Salmo Responsorial                                                                                                                                                     Sal. 115(116). 12-13, 17-18 (R. 17ª)

Refrão : Na’i, ha’u sei hasa’e sacrifício ida hahi nian ba Ita!!! Repete-se

  • Oinsá ha’u sei agradece ba Na’i,

          Tan buat hotu nebé nia halo mai ha’u?

          Sei foti ha’u nia cálice,

          Hodi harohan ba Na’i Nia naran. Refrão

 

  • Ha’u sei hasa’e sacrifício ida hahi nian,

          Hodi temi Na’i Nia naran.

          Ha’u sei halo tuir ha’u lia hakotu,

          Iha povo hotu nia oin. Refrão

 

Aclamação                                                                                                                                                                                                                   Jo. 14. 23

Refrão : Aleluia, Aleluia!! Repete-se

                  Na’i dehan, ema sé hadomi Ha’u, sei halo tuir Ha’u nia liafuan;

                  Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                                                               Lc. 6. 43-49

Na’i Jesus Cristo nia Evangelho nu’udar São Lucas haktuir:

Iha tempo neba, Jesus dehan ba escolante sira: “La iha aihun di’ak nebé fó fali fuan áat, eh aihun áat nebé fó fuan di’ak. Ema bele hatene aihun ida-idak housi nia fuan: ema  la ku’u ai figueira nia fuan housi aitarak sira, eh uvas fuan housi ai fuik. Ema di’ak hasai buat di’ak housi nia laran di’ak, ema áat hasai buat áat housi nia laran áat. Ema nia ibun ko’alia housi buat nebé hakonu nia fuan.”

“Tansá imi bolu ha’u ‘Na’i, Na’i’, maibé la halo tuir buat nebé Ha’u hateten? Ema nebé mai besik Ha’u no rona hodi halo tuir Ha’u nia liafuan, Ha’u sei hatudu ba imi ema ne’e hanesan sá lós? Nia hanesan ema nebé hari uma ida: nia ke’e kle’an, hodi tau nia hun iha fatuk leten; wainhira mota sai boot, be baku hasouru uma ne’e, maibé la bele sobu, basá hari tiha iha fatuk leten. Maibé ida nebe rona hodi la halo tuir, nia hanesan ema nebé hari tiha uma ida iha rai leten, hun metin la iha. Wainhira mota sai boot no be baku hasouru nia, ema ne’e monu kedas, sobu rahun áat liu.”

Lia Maksoyn.

Leave a Reply

Your email address will not be published. Required fields are marked *