shadow
Diocese de Dili > NOTÍCIAS > REFLEXÃO > JESUS SADIK EMA RIKU SIRA

JESUS SADIK EMA RIKU SIRA

Reflexão & Leitura DOMINGO COMUM XXXII/Ano B/2018

  1Rs 17,10-16 heb 9,24-28 Mc 12,38-44

 

Primeira Leitura                1. Rs. 17, 10-16

Lia housi Livro Liurai sira nian:

Iha loron hirak nebá, Profeta Elias la’o tiha ba Serepta. To’o tiha odamatan cidade nian, Elias haré feto faluk ida hili hela ai-maran. Elias bolu tiha hodi hateten nune’e: “Favor ida, lori hela wé witoan mai ha’u atu hemu”. Nia atu la’o daudaun ba hola wé, Elias hateten tan ba nia: “lori mós pão baluk ida mai”. Maibé, feto faluk dehan: “Maromak! Ha’u la iha pão tasak. Ha’u iha de’it trigo witoan iha sanan, ho mina witoan iha botir. Ha’u hili daudaun ai-maran sanak rua, atu ba te’in trigo witoan ne’e, ba ha’u no ba ha’u nia oan. Hafoin ami sei han, hodi hein de’it ona mate!” Elias dehan ba nia: “Keta ta’uk! Fila ba uman, halo tuir ó hateten. Maibé, tunu uluk tiha lai pão oan ida lori mai ha’u. hafoin, tunu ba ó no ba ó nia oan. Basá, Israel nia Maromak lia tun, dehan: ‘Trigo ut iha sanan laran sei la hotu, mina-reino iha botir sei la mamuk, to’o loron nebé Maromak sei haraik fali udan mai rai”. Feto faluk ne’e ba, hodi halo tuir nu’udar Elias haruka. Feto faluk ne’e ho nia família ho tan Elias, sira hetan ai-han natón iha tempo ba tempo barak. Trigo ut iha sanan la hotu, mina-reinu iha botir la mamuk, nu’udar Na’i Maromak lia tun dehan hodi Elias nia ibun.

Maromak Futar Lia.

 

Salmo Responsorial                                                                                                                                                  Sal. 145, 7. 8. 9. 10

Refrão : Ha’u klamar, hahí Na’i!!! Repete-se

Ou         : Aleluia!

  • Na’i tulun ho justiça ema sira be terus

          Ema sira be ema fó terus,

          Haraik ai-han ba ema sira be hamlaha,

          Fó liberdade ba ema sira be dadur. Refrão

 

  • Na’i fó roman ba ema sira be matan delek,

          Fó aten brani ba ema sira be neon nakraik,

          Hadomi ema sira sala laek. Refrão

 

  • Na’i, tahan ema sira be la’o rai,

          Tulun oan ki’ak no faluk sira,

          Hasai maksalak sira housi dalan áat. Refrão

 

  • Na’i ukun tinan ba tinan;

          Sião, ó nia Maromak, mak liurai

          Tinan-ba tinan! Aleluia! Refrão

 

Segunda Leitura                                                                                                                                                               Heb. 9, 24-28

Lia housi surat ba Hebreu sira:

Cristo laós hakbesik ba altar nebé ema mak halo, hodi hasaran altar lolós. Cristo sa’e ba lalehan, atu mosu iha Maromak futar oin, hodi husu tulun mai ita. Nia la saran-An ba mate dala barak, hahú kedas houri mundo hahú. Maibé, foin ohin, wainhira tempo to’o ona iha rohan, mak Cristo saran-An dala ida de’it ba mate atu hodi Nia sacrifício, halakon salan. Tuir ita nia destino, ita mate dala ida de’it; hafoin, tesi lia justiça. Nune’e mós Cristo saran-An dala ida ba mate atu halakon ema lubun nia salan. Nia sei mosu dala ida tan, laós ona tan salan, maibé, atu soy ema sira hotu nebé hein Nia.  

Maromak Futar Lia.

 

Aclamação                                                                                                                                                                                      Mt. 5, 3

Refrão : Alelui, Aleluia!! Repete-se

                  Rahun-di’ak ba ema sira nebé kiak iha laran,

                  Basá, Reino lalehan sira nian. Refrão

 

Evangelho                                                                                                                                                                           Mc. 12. 38-44

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus hanourin, dehan: “Imi matan moris, neon-na’in ho ema escriba sira. Sira kaan hatudu sira nia hatais naru-naruk, kan simu ema nia cumprimento iha luron; Sira buka de’it fatin di’ak iha Uma Kreda, buka de’it fatin fura-furak iha festa-festa. Sira han mohu feto faluk sira nia sasán, hodi halo oração mesak naru-naruk. Sira sei hatán lia justiça todan liu”. Jesus tur tiha besik caixa esmola nian, atu haré oin sá mak ema tau osan ba caixa laran. Ema riku barak mak tau osan mesak bo-boot de’it. Feto faluk ki’ak ida to’o mai, nia tau doit metan oak rua, katak osan cruzado ida. Jesus bolu tiha nia Escolante sira, Nia dehan ba sira: “Ha’u dehan lialós ba imi: Feto faluk ne’e tau esmola barak liu sira seluk hotu, basá, sira seluk tau ba esmola osan nebé sira la kuran; maibé, feto faluk ne’e, iha nia ki’ak laran, nia tau ba esmola, nia soin tomak, nia ai-han hotu!”

Lia Maksoyn.

 

JESUS SADIK EMA RIKU SIRA

Rahun-di’ak ba ema sira nebé ki’ak iha laran. Basá, Reino lalehan sira nian Iha Primeira Santa Teresa de Calcutá dala ida dehan:”As mãos que dá vale mais que as bocas que rezam”: Nee significa katak: ita fo tulun (caridade) ba ema seluk ho fuan mos kmanek liu fali ita nia ibun nebe reza maibé, nunca hatudu fiar nee iha hahalok.

            Primeira Leitura (Antigo Testamento) no Evangelho São Marcos nian semana nee, ita hatene figura feto faluk nain rua. Primeiro ponro; Sira mosu iha relato Bíblica tan sira nia convicção (keyakinan), laran luak (caridade) no fiar nebe metin (Fé). Segundo ponto; feto faluk hirak nee nia lalaok convida ita reve (haré fila fali) ita nia entendimento (compreensão) kona ba kiak (pobre/kemiskinan) no oinsa ita nia atitude perante situação kiak/pobreza nee.

Profeta Elias Iha Primeira Leitura bolu ita nia atenção hodia compreende lalaok saida mak feto faluk iha primeira leitura no Evangelho halo relaciona ho profeta Elias ho Jesus nia missão nudar profeta no Messias.

Profeta mak Maromak nia manu-ain nebe haklaken Maromak nia Lia Fuan. Profeta cumpri no halao deit ordem nebe Maromak haruka. Tan nee, ema hotu iha qualquer situação precisa absolutamente cria relação ho Maromak liu husi rona hodi halo tuir Maromak nia Lia Fuan nebe profeta tatoli. Profeta Elias, Maromak delega hodi cumpri no tatoli/haklaken iha rai Serepta (Serepta=fatin tentação), katak território ema hirak nebe la gosta Maromak povo Israel nian. Maske hasoru risco boot (perigo da vida), Elias tama duni iha rai nee no disponível hodi halao Maromak nia ordem.    

Iha Sarepta mos, feto faluk ida rona hodi halo tuir saida mak profeta Elais haruka hodi prepara hahan ba Elias. Hanesan Elias cumpri Maromak nia haruka, nunee mos feto faluk nee cumpri Elias nia ordem. Faluk nee cumpri ordem tan deit nia fiar iha Maromak nia kbiit (milagre) nebe sei fo haraik ai han moris ba Elias, ba feto faluk nee ho ninia oan sira.

Lia menon (Mensagem) saida mak ita bele hetan husi Antigo Testamento nee? Laran luak no disponibilidade feto faluk nian inclui mos fidelidade (kesetiaan) Elias ba Maromak nia Lai Fuan tan nee mak Maromak hametin elais nia fiar hodi halao missão nebe Maromak tatoli. Maromak mos uza Elias hodi tau matan no habosu necessidade feto faluk ho nia oan sira. Nee mak projeição husi Maromak nia lalaok nebe sempre tau atenção ba emar fiar nain sira atu keta tauk no keta fiar namlele.

Iha relato Evangelho, Jesus louva feto faluk kiak ida nebe fo esmola kiik liu entre sira seluk. Afinal Jesus nia sasukat hodi haré kwalidade no quantidade ema fo esmola diferente tebes ho ita ema nia maneira sasukat. Ita ema hare liu ba quantidade (Barak-Oitoan), ao passo que Jesus haré li ba qualidade (disponibilidade). Ita ema nia sasukat mak fo oitoan hodi rai hela barak ba ita nia necessidade privada.

Dalaruma mos ita preocupa haré ema seluk tau hira mak ba esmola fatin hodi haluha tiha katak ita tau esmola kiik liu maske ita osan sei iha barak. Jesus haré liu feto faluk nia disponibilidade (vontade) hodi oferece husi ninia fraquesa sira.

Feto faluk nudar Evangelho relata, ema kiak ida. Nee significa katak; nia depende totalmente ba parentes eh visinho nia apoio. Nudar faluk, significa nia la iha laen kaben (laen mate ona). Laen mak sai nudar we matan economia ba uma kain ida. Jesus observa katak; osan oak rua nebe nia tau ba caixa esmola nudar riku soin nebe nia iha iha momento nee. Tanto ho osan nee ou lae, feto faluk nee, totalmente depende moris ba ema seluk nia apoio. Nia la tama iha categoria estatuto nee moris suficiente, tan nee mak nia depende ba Maromak liu husi ema seluk nia laran luak. Maske nunee, feto faluk nee rico ho laran luak…tan nia fo husi ninia fraquesa sira laos fo husi ninia resto sira hanesan ita.

Nee la significa Jesus hakribi ema riku sira. Riku-soin nebe Maromak haraik, em princípio diak, atu ita utiliza tuir Maromak nia vontade. Jesus haksiak katak ema riku susar tama Reino Lalehan la significa katak feto faluk nebe fo esmola hotu husi baut nebe nia iha. Jesus hakarak ema hotu fo esmola eh halo diak ba ema seluk ho neon-laran tomak. Ho intenção diak (laos ho interece eh maksud balu).

Afirmação nee mos la significa katak; Jesus hakarak ema hotu moris kiak iha rai nee, basá, iha mundo nee la iha ema ida mak moris dpepende demais ba ema seluk. Ema hotu moris iha rai nee tuir ninia condição no situação. Iha balu riku-balu kiak, balu matenek-balu ladun matenek. Será que osan iha para ita rai deit iha banco? Osan hodi além de tau iha banco ba necessidade futura, maibé, Maromak hakarak ita mos fahe netik sorin baluk ba ema balu be hamlaha, kiak, la matenek no mukit liu. Ita nia partilha eh fahe sasan ruma ba ema seluk hodi contribui ba progresso sociedade justa tan nudar ser humano, ema sempre precisa malu iha moris lor-loron.

Jesus, husi parte seluk hakarak fanun ita nia consciência katak; ita nia moris laos depende deit ba osan ho riku soin sira seluk. Tan se ema depende demais  ba sasan rua nee, ema sei sai kaan ten no ditador. Jesus louva feto faluk nee hodi sadik ema riku sira katak; ita hotu depende ba Maromak no moris sempre precisa malu (no man is an island). Jesus mos hakarak hanorin katak; ita nobun laos nain ba moris nee. Maromak mak nain, ita hotu nudar gestor ba moris liu husi Fiar ba Maromak no servi ita nia maluk sira nebe precisa apoio.

Feto faluk iha Primeira Leitura ho Evangelho sai nudar Barómetro (sasukat) ba ita nia fiar no moris haraik-an baseia ba domin Maromak nian. Feto faluk nia lalaok fo tada ita hodi hatene katak ita mak gestor nebe precisa tebes Maromak. Laos ita precisa Maromak iha susar laran, ita haluha Maromak iha diak laran. Feto faluk nee mos hanorin ita katak; ita nia dependência (ketergantungan) laos hodi fo pressão eh hetan pressão no halakon ita nia laran metin (esperança/harapan) maibé, atu guia ita ba moris hakmatek no haksolok iha sociedade tuir roman doutrina Maromak nian.

Atu taka, espera katak feto faluk iha leitura rua nee, bele fo exemplo kmanek no tulun ita hodi halao moris nee basea ba Maromak nia diak hafoin ita mos continua habelar diak nee ba ema seluk iha sociedade. Assim Seja e Bem Haja (Ignas)    

Leave a Reply

Your email address will not be published. Required fields are marked *