shadow
Diocese de Dili > NOTÍCIAS > LETURA DIÁRIA > Segunda – Feira, XXXII Semana Tempo Comum (Ano B)

Segunda – Feira, XXXII Semana Tempo Comum (Ano B)

Primeira Leitura                          Tit. 1. 1-9

Lia housi São Paulo nia Surat ba Tito

Housi Paulo, Maromak nia atan, Jesus Cristo nia apóstolo atu lori ba fiar sira nebe Maromak fihir ona no atu fó hatene ba sira doutrina lialos nian nebe tuir Maromak, no fó ba sira esperança moris rohan laek nian nebe Maromak hakotu ona houri uluk kedas. Nia la bosok, tan ne’e, iha tempo nebe Nia hakarak, Nia fó hatene nia laran, no tan liafuan housi Maromak, ita Maksoin, liu housi knaar nebe ha’u simu atu haklaken. Ba Tito, ha’u nia oan lolós iha fiar nebe ita hotu simu, graça no dame housi Aman Maromak no housi Cristo Jesus, ita Na’i.

Ha’u husik o iha Kreda atu o bele halo lós buat hotu nebe sei kuran iha neba, hodi foti katuas sira iha rai ida-idak, nu’udar ha’u dehan ba o. Katuas ida-idak sei sai ema ida ho hahalok di’ak; nia hola feto dala ida de’it, nia oan sira hotu sarani ona, la’os badiu, no ema la bele foti liafuan áat ruma hasouru sira tan sira nia hahalok áat. Basá, nu’udar na’i ulun, katuas ne’e sei sai Maromak nia saseluk; ema la bele haré buat áat ruma iha nia; nia la’os ema loko an eh si’akteen; la lanuteen eh baku ema; la buka osan. Nia sei sai ema nebe hatene simu maluk sira, belun ba buat hotu nebe di’ak, haraik an, laran lós, santo no hatene ukun an. Nia halo buat nebe nia hakotu; nia hatene lolós doutrina atu nia bele ko’alia tuir doutrina lolós no hatan lolós ba sira nebe ko’alia hasouru doutrina ne’e.

Maromak Futar Lia.

 

Salmo Responsorial                                                                                                                Sal.  23(24). 1-2, 3-4ab, 5-6 (R. cf. 6)

Refrão : Ema otas ne’e mak buka Na’i!!! Repete-se

  • Rai no buat hotu iha rai, Na’i Nian;

          Mundo no buat tomak hôrik iha nia.

          Maromak hatur rai iha tasi laran,

          Hametin rai iha laloran leten. Refrão

 

  • Sé mak bele sa’e ba Maromak Nia foho?

          Sé mak bele hôrik iha Nia kadunan santo?

          Ema nebe laran mós, liman la sala;

          Ema nebe la jura falso, la bosok. Refrão

 

  • Ema ne’e sei simu Na’i Nia bensa,

          Nia sei hetan kolen housi Maromak, nia Maksoyn,

          Ema otas ne’e mak buka,

          Buka Jacob nia Maromak oin. Refrão

 

Aclamação                                                                                                                                                                        Flp. 2. 15d, 16ª

Refrão : Aleluia, Aleluia!! Repete-se

                  Imi sei sai nabilan hanesan fitun sira iha mundo,

                  hodi hatudu ho laran metin Liafuan Moris nian. Refrão

 

Evangelho                                                                                                                                                                                   Lc. 17. 1-6

Na’i Jesus Cristo nia Evangelho nu’udar São Lucas haktuir:

Iha tempo nebe, Jesus dehan tan ba nia escolante sira: “La bele hadook ema housi exemplo áat sira; maibe susar ba ema nebe fó exemplo áat. Kesi fatuk boot dulas batar nian ida ba nia kakorok hodi soe nia ba tasi di’ak liu fali nia dada labarik kiik sira ne’e ida ba sala.”

“Imi haré didi’ak ba: o nia maluk ida halo sala karik, fó hatene ba nia; nia hakribi sala karik, perdua nia. Nia sala dala hitu karik hasouru o iha loron ida nia laran, no nia hatene mós ba dala hitu ‘Ha’u hakribi,’ perdua nia ba.”

Apóstolo sira hateten ba Na’i: “Habo’ot ami nia fiar!” Na’i hatan ba sira: “Imi nia fiar boot karik hanesan modo musan ida, imi bele dehan ba aihun ne’e: ‘Fokit o an housi ne’e, ba kuda o an iha tasi laran,’ nia sei halo tuir.

Lia Maksoyn.

Leave a Reply

Your email address will not be published. Required fields are marked *