shadow
Diocese de Dili > NOTÍCIAS > LETURA DIÁRIA > Terça–Feira, XXXII Semana Tempo Comum (Ano B)

Terça–Feira, XXXII Semana Tempo Comum (Ano B)

Primeira Leitura             Tit. 2. 1-8, 11-14

Lia housi São Paulo nia Surat ba Tito

Oan doben: O fali, koa’lia didi’ak tuir doutrina nebe lós. Husu katuas sira atu hatene han hemu la resin, hodi moris tuir sira nia otas;  hatene ukun an no laran metin iha fiar, iha domin no iha paciência. Nune’e mós, ferik sira sei moris nu’udar ema nebe hamta’uk Maromak; sira la bele konta ema nia vida, la lanuteen, maibe sai mestra di’ak ba, atu sira bele hanourin feto foinsa’e sira atu hadomi sira nia kaben no sira nia oan sira, atu sai matenek no laran lós, hatene serbisu, laran di’ak, halo tuir sira la’en nia hakarak; nune’e ema la bele hateten áat Maromak nia liafuan. Nune’e mós kona ba mane foinsa’e sira: hanourin sira atu hatene ukun an. Iha buat hotu, o hatudu an nu’udar exemplo hahalok di’ak sira nian: uainhira o hanourin, hanourin lolós iha doutrina no ho laran manas, ho liafuan di’ak no lós, atu funu baluk sira hotu sai bilan de’it, hodi la dehan buat áat ruma hasouru ita.

Basá, Maromak nia graça mosu ona, hodi lori maksoin ba ema tomak, no hanourin ita buat hotu nebe ita sei halo atu husik buat hotu nebe la lori ba Maromak, no mós husik tiha hakarak áat mundo ne’e nian hotu. Ita sei ukun an hodi moris di’ak no hamta’uk Maromak iha mundo ne’e, hodi hein daudaun Maromak no ita Na’i Jesus Cristo nia glória. Nia saran an ba mate tanba ita atu hasai  ita housi ita nia laran áat no hamos povo ida ba Nia An rasik; povo nebe hakarak halo buat nebe di’ak de’it. Dehan lia hirak ne’e uainhira o hanourin eh uainhira o halos hanourin nebe la lós: o bele halo ne’e ho biit tomak. Keta husik ema haré o hanesan biit laek.

Maromak Futar Lia.

 

Salmo Responsorial                                                                                                                       Sal. 36(37). 3-4, 18 e 29 (R. 39ª)

Refrão : Ema lós nia maksoin mai housi Na’i!!! Repete-se

  • Ó laran metin karik iha Na’i hodi halo di’ak,

          Ó sei hôrik iha rai no ó nia moris sei metin.

          Ó nia di’ak tomak ó tau karik iha Na’i,

          Nia sei haraik ba ó, ó fuan nia hakaran tomak. Refrão

 

  • Na’i hatene ema laran di’ak sira nia moris,

          Lama-rohan ba sira sei hela ba nafatin.

          Na’i hametin ema nia hakat,

          Haraik bensa ba nia dalan. Refrão

 

  • Hadook-an housi buat áat, halo buat di’ak,

          Ó sei hôrik ba nafatin.

          Ema laran lós sei hetan rai,

          No sei hôrik iha nia ba nafatin. Refrão

 

Aclamação                                                                                                                                                                                   Jo. 14. 23

Refrão : Aleluia, Aleluia!! Repete-se

                  Ema nebe hadomi Ha’u, sei halo tuir Ha’u nia liafuan;

                  Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                                Lc. 17. 7-10

Na’i Jesus Cristo nia Evangelho nu’udar São Lucas haktuir:

Iha tempo neba, Jesus lia tun ba escolante sira: “Iha imi leet se mak iha atan ida nebe fila rai ka hein bibi, uainhira nia fila mai uma, sei dehan ba nia: ‘O mai lalais tur iha mesa?’ Nia sei la dehan fali: ‘O ba tein,’ ka ‘O ba hatais lalais atu ha’u han no hemu; ne’e liu tiha mak o sei tur han no hemu?’ Ema se mak sei fó obrigado ba nia atan tan atan ne’e halo buat nebe nia haruka? Nune’e mós imi, uainhira imi halo tiha imi nia knaar tomak, dehan ba: ‘Ami atan folin laek, ami halo de’it ami nia obrigação.”

Lia Maksoyn.

Leave a Reply

Your email address will not be published. Required fields are marked *