shadow
Diocese de Dili > NOTÍCIAS > Notícias > KAER METIN NAFATIN BA MEMÓRIA NO HISTÓRIA HODI MEHI BA FUTURO IDA NEBE DIAK BA TIMOR OAN TOMAK.

KAER METIN NAFATIN BA MEMÓRIA NO HISTÓRIA HODI MEHI BA FUTURO IDA NEBE DIAK BA TIMOR OAN TOMAK.

D. Virgilio do Carmo da Silva, Bispo Dili nian iha ninia homilia missa comemoração Masacre Santa Crus ba dala 27 dehan hau hakarak hahu ho citacão ida husi dialogo ida nebe papa Francisco halo, hodi partilha kona ba sabedoria. Ita atu lao ba oin precisa hare ba passado, precisa hare ba ita nia  abut nebe metin iha memoria, no precisa  coragem. Katak Ohin ita Timor oan, Juventude asuwain ho orgulho atu comemora Masacre Santa Crus ba dala 27 dala id tan . Comemoração momento histórico ida ne’e, cada tinan comissão  12 de Novembro, buka duni atu celebra didiak,  celebra ho digno,  hakarak Timor oan hateke nafatin ba kotuk, atu kaer metin nafatin ba Memória no historia hodi mehi ba futuru ida nebé diak ba Timor oan Tomak. Hanesan tema comemoracão nebé hatur ona “Hosi Juventude ba Juventude hodi prepara Juventude ba Futuru”.

Amo Bispo hatutan tan  katak história ida nee labele husik hela ho lia fuan, maibe hakarak duni atu nia encarna iha ema nia fuan, la fo deit ho lian nebe tatoli ba malu, maibé sira mos sai profeta kona ba Katuas no ferik sira nia Mehi. 12 de Novembro acontece iha Igreja de Motael, data, fatin no evento nebe iha mak base husi acontecimento ida ohin lori ita ba comemora. Hanesan uluk ohin mos ita hakarak agradece ba Maromak liu hosi Eucaristia Santa  ne’e ba diak hotu nebe haraik ona mai ita desde uluk mai to’o ohin, agradece ba Nai nia lia fuan nebe continua convida ita sarani sira, liu-liu ita foinsae sira atu lao iha dalan nebe los. Hanesan uluk Nai Maromak bolu ita atu ita nia mehi no plano sira bele realiza, oras nee ita buka nafatin atu ita la haketak hosi Maromak nia plano. Timor Nia Historia ne’e unico, rai ida ne’e  ki’ik maibe historia hatudu katak Maromak lao hamutuk ho nia povo iha momento susar no momento ksolok. Ne’e sai tiha ona identidade povo ida ne’e nian.  Ohin ita halibur  iha ne’e hodi husu Maromak atu tau Matan nafatin, husu Maromak atu quia nafatin ita nia hiatória, ita nia nacão ita nia rain no ita nia povo. Tan ne’e  mak celebracão ohin nian ne’e; leitura  sira bolu  ita sarani sira atu moris tuir lolos ita nia devocão be hatudu unidade mak sai nuudar ita nia caracteristica, mansidão, pascencia no tolerancia. Nuudar sarani escolante los ida laos buat hotu usa deit mak razão, sarani sira tenke hatene katak ema iha qualidade nune’e mos nia laiha, ema iha nia vertude  sira nebé nia bele mos usa ba buat nebe diak, nune’e mos nia hanesan mestre hodi hatudu exemplo ba ema seluk,  ida ne’e mak mestre boot ita Nain Jesus Cristo. Cristo ida nebe renucia qualquer forma de agressividade  iha sociedade nia leet, hodi hakarak promove  buat ida deit mak respeita malun hanesan Maromak ona. Ida ne’e buka liu hosi meios hotu hotu, ita  promove sai hanesan airin ou pilar ba comunidade no sociedade no ba uma Creda.

Bispo Dili nian nee haklean liu tan katak airin mak unidade no reconsiliacão, nune’e ita preocupa duni.  Tanba saida mak ita preocupa ho unidade ba sarani sira nia moris. Creda fo razão katak ita hotu isin ida deit no mos espirito ida deit, ita mai hosi isin ida, Espirito ida, fiar ida no Nai  ida deit, baptismo ida deit, Maromak ida no Aman ba ita hotu. Nee Creda nia hanorin be sai mos ita nia fiar. Sarani sira mos hanesan ema bain-bain iha razões atu haketak ou atu hafahe tanba iha sira nia leet, sira mos iha raça, lian, cultura, mentalidade, ideologia, caracter, condições economicas nebe oin oin. Nune’e São Paulo dehan, imi precisa laran moras ba buat nebé hariku imi, laran moras ba buat sira nebé bele hakiak fali conpetição iha ita nia rain. Buka liberdade ba ita an hodi usa rikusoin nebé mak soin ba ita, rikusoin nebé completa ita, no tulun malu atu realiza plano Nai Maromak ninian  iha ita nia moris hodi lao iha ita nia tema comemoração ba ohin nian nebe deham “Hosi juventude ba juventude, hodi prepara juventude ba futuru”.

Relaciona ho celebração nee Amo Bispo hatete tan katak  foin dadaun nee Santo Padre Francisco convoca sínodo Juventude nian nebe hahu iha 23-28 de Outubro 2018 iha Roma hodi halibur laos deit padre, bispo no cardeais sira maibe halibur  mos foinsa’e lubuk boot ida,  nebe mai hosi mundo tomak hodi koalia uitoan kona ba, oinsa mak foinsa’e sira hamriik metin iha sira nia fiar no vocação. Hanesan temacelebração  ida ohin nian nebe hodi prepara Juventude ba futuro, iha tempo ida ne’e  mos sínodo buka atu hare ba foinsa’e sira  ho atitude ida buka halo atendimento ba sira  iha sira nia moris. Ho kbiit Espirito Santo nian, ita mos fiar ba Nai Maromak no ba uma creda nune’e mos ba mundo liu hosi fonsa’e sira, liu hosi sira nia creatividade, no sira nia comprimiso. Tanba ne’e foinsa’e mos sai fatin lia los nian, iha nebe Nai Maromak lori no halo ita compreende ninia hakarak ruma no desafia ita atu constroe futuro ida nebé diak liu ba ita.

D. Virgilio haklean liu tan ninia reflexão hodi dehan, iha Timor Leste ita hotu hatene katak populacão Juventude aas tebes. Ida ne’e Naturalmente sai preocupação ida duni ba ita hotu. Celebracão ohin nian fo hanoin fali mai ita kona ba contribuição foinsa’e sira nian ba libertacão ita nia rain nian aas tebes. Ida ne’e  ita precisa  duni rona no hamutuk ho sira ita bele lori paz, Justiça, progresso ba ita nia rain doben ida ne’e. Nu’udar rai ida nebe maioria católico fo hanoin mos kona ba Amo Papa nia mensagem mai iha Timor iha dia 27 de Outubro 2018, nebe husu atu ita nundar jovem no nundar povo Timor buka promove nafatin lialos, buka luta nafatin ba valor. Liu liu luta ba valor sarani no valor evangelho ninian nebé hahu ona iha ita nia leet. Ita nia acção da graça tomak nebe oras nee ita halo, ita hasa’e ba Nai Maromak hodi mos hafoun dala ida tan ita nia confiança ba Inan Virgem Santissima nebe sai hanesan foin sa’e Timor oan sira ninia inan atu nune’e iha ita nia haka’as an ita bele hakiak cultura ida dialogo nian, cultura ida reconciliacão nian, nune’e bele promove nafatin unidade iha rai doben Timor Leste hanesan nação ida furak, no ema ida deit.  (By. Alin)

Leave a Reply

Your email address will not be published. Required fields are marked *