shadow
Diocese de Dili > NOTÍCIAS > LETURA DIÁRIA > Domingo, XXXIII Tempo Comum (Ano B)

Domingo, XXXIII Tempo Comum (Ano B)

Primeira Leitura                    Dan. 12, 1-3

Lia housi Livro Profeta Daniel:

Iha tempo ikus sei mai Miquel, Anjo sira nia boot, Anjo ida nebé tau matan ba ó nia povo nia oan sira. Tempo ne’e, sei sai tempo ida susar teb-tebes, ema la dauk hetan seluk ida hanesan nia, houri uluk kedas to’o tempo ne’e. Iha tempo ne’e, Na’i Maromak sei haraik Maksoyn ba nia povo, ba ema hotu-hotu nebé naran iha Maromak nia livro. Mate-bian barak sei hadér, balun atu moris nafatin, balun atu moe lerek hodi simu condenação nafatin. Sira nebé moris neon na’in, sei nabilan hanesan roman lalehan nian. Sira nebé dada ema lubun-lubun ba dalan justiça, sei nabilan hanesan fitun tinan ba tinan.

Maromak Futar Lia.

 

Salmo Responsorial                                                                                                                                        Sal. 15(16), 5. 8. 9-10-11

Refrão : Na’i, tahan ha’u atan, ha’u hein Ita Boot!!! Repete-se

  • Na’i, Ita Boot mak ha’u riku-soin;

          Ha’u destino iha Ita Boot futar liman. Refrão

 

  • Na’i iha nafatin ha’u oin;

          Iha nia sorin, ha’u la ta’uk buat ida.

          Tan ne’e, ha’u fuan haksolok,

          Ha’u klamar haksolok

          Ha’u isin tomak toba hakmatek. Refrão

 

  • Na’i la fo ha’u ba mate,

          La husik sai dodok nia atan isin. Refrão

 

  • Nia sei hatudu dalan ba ha’u moris;

          Iha Nia sorin ha’u haksolok tebes. Refrão

 

Segunda Leitura                                                                                                                                                        Heb. 10, 11-14. 18

Lia housi São Paulo ba Hebreu sira:

Sacerdote hotu-hotu Testamento Tuan nian, loron-loron mosu atu kaer sira serviço, hodi hasa’e fila fali sacrificio oin ida de’it, katak sacrificio ida nebé la bele kasu salan. Maibé, Cristo hasa’e sacrificio ida de’it atu kasu salan, hafoin Nia hatodan-An iha Aman Maroamk nia sorin kuanan, tinan ba tinan. Hahú kedas iha oras ne’e, Cristo hein hela atu haré Nia funu balu sira monu iha Nia ain. Tebes duni, hodi sacrificio ida de’it mak Cristo halo kmanek to’o rohan, ema sira nebé bolu, atu sai santo. Nune’e, wa’inhira iha ona perdão ba salan, la kuran tan ona sacrificio, atu kasu salan.

Maromak Futar Lia.

 

Aclamação                                                                                                                                                                                  Lc. 21, 30

Refrão : Aleluia, Aleluia!! Repete-se

                  Imi tur matan moris, tur neon na’in, hodi harohan nafatin,

                  Atu imi bele mosu iha Mane Maksoyn futar oin. Refrão

 

Evangelho                                                                                                                                                                            Mc. 13, 24-32

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus lia tun ba Escolante sira, wa’inhira Nia ko’alia kona ba loron Nia atu fila mai; Nia dehan: “Iha loron ikus, wainhira susar boot liu tiha, loron sei sai nakukun tiha, fulan sei la nabilan tan, fitun sira sei monu housi lalehan mai; kbiit tomak leten nian sei nakrahun htou. Iha oras ne’e, mak ema sei haré Mane Maksoyn mai ho kbiit ho nia glória wa’in tebes housi kalohan leten. Iha oras ne’e, mak Nia sei haruka nia Anjo sira atu halibur Nia emar sira housi rai-rai, housi rai hun to’o lalehan rohan. Imi buka hatene didi’ak lia ida nebé mai housi ai figuera: Wa’inhira ai figuera nia sanak sira hahú nadelu, tahan buras ona, imi hatene ona katak, bain-loron besik ona. Nune’e mos, wa’inhira imi haré buat hirak ne’e mosu, imi sei hatene katak Mane Maksoyn atu mai ona, Nia besik hela ona iha imi nia odamatan. Ha’u dehan lialós ba imi: Buat hirak ne’e sei mosu duni iha ema sira ohin nia loron. Lalehan no rai bele lakon, maibé, Ha’u nia lia-fuan sei la lakon. Maibé, kona ba loron ne’e, ema ida la hatene: Anjo sira iha lalehan mos la hatene, Mane Maksoyn mos lae. Maromak Aman, Nia mesak de’it mak hatene.

Lia Maksoyn.

Leave a Reply

Your email address will not be published. Required fields are marked *