shadow
Diocese de Dili > NOTÍCIAS > LETURA DIÁRIA > Segunda-Feira, XXXIII Tempo Comum (Ano B)

Segunda-Feira, XXXIII Tempo Comum (Ano B)

Primeira Leitura            Ap. 1. 1-4;  2. 1-5ª

Lia Housi Livro Apocalipse:

Ne’e mak buat nebe Maromak hatudu ba Jesus Cristo atu Nia bele fó hatene ba Nia atan sira kona ba buat sira nebe sei mosu lalais; Maromak haruka nia anjo atu fó hatene ba nia atan João, no João fó sasin ba Maromak nia liafuan no ba Jesus Cristo nia lia sasin, hodi haktuir buat nebe nia haré. Rahun di’ak ba ema nebe lê lia menon ida ne’e, no rahun di’ak ba sira nebe rona nia, no halo tuir buat nebe hakerek iha nia, basá tempo to’o ona.

Housi João, ba kreda hitu Ásia nian: graça no dame ba imi housi Nia nebe iha ohin, uluk no tempo atu mai, housi espírito hitu nebe hela iha Nia kadunan nia oin.

Ba anjo kreda nian iha Éfeso hakerek nune’e, ‘Ne’e mak lia menon housi ida nebe káer fitun hitu sira iha nia liman kuana, nebe ahi-oan fatin hitu osan mean nian hale’u: Ha’u hatene buat hotu kona ba ó: oin sá lós ó serbisu maka’as no barak, oin sá lós ó terus ho paciência. Ha’u hatene katak ó la bele tahan ema áat sira, no oin sá ó koko bosokteen sira nebe hanaran an apóstolo maibe ikus mai hatudu katak sira bosokteen. Ha’u hatene mós katak ó paciência barak, no hetan terus barak tanba Ha’u, hodi la hanoin kole. Maibe ha’u kesar kona ba ida ne’e: Ó husik ona ó nia domin uluk nian. hanoin didi’ak ba ó nia moris molok ó monu; hakribi ó nia sala ba, no halo hahalok sira nebe ó halo uluk.

Maromak Futar Lia.

 

Salmo Responsorial                                                                                                                        Sal. 1. 1-2, 3, 4, 6 (R. Apo. 2. 7b)

Refrão : Ba ema be manan, ha’u sei fó han housi ai-hun moris nian!!! Repete-se

  • Ksolok ba ema nebe la tuir ema áat nia lia,

          La tuir dalan maksalak.

          Ksolok ba sira be la hadulur ho ema áat;

          Maibe haksolok ho Na’i Nia ukunfuan,

          Hodi hanoin nia kalan-loron. Refrão

 

  • Nai hanesan ai-kudan ida iha ué-inan ninin;

          Nafuan tuir nia tempo, nia tahan la namlaik,

          Buat hotu nebe nia halo, sai di’ak de’it. Refrão

 

  • Maibe, ema áat sira nia moris oin seluk,

          Sira hanesan háre-kain be anin lori,

          Nia hatene ema lós nia dalan,

          Dalan ema áat sira nian, lori ba rahun áat. Refrão

 

Aclamação                                                                                                                                                                                     Jo. 8. 12

Refrão : Aleluia, Aleluia!! Repete-se

                  Na’i dehan: Ha’u mundo nia roman; ema sé tuir Ha’u,

                  Sei hetan roman moris nian. Refrão

 

Evangelho                                                                                                                                                                             Lc. 18. 35-43

Na’i Jesus Cristo nia Evangelho nu’udar São Lucas haktuir:

Iha tempo neba, Uainhira Jesus hakbesik Jericó, ema matan delek ida tur iha dalan ninin hodi husu esmola. Roha tiha ema lubun boot liu daudaun, nia husu sáida mak mosu. Sira hatan, “Jesus housi Nazaré liu daudaun.” Ne’e duni, nia hakilar: “Jesus, David nia oan, sadi’a atan ha’u!” Sira nebe la’o iha oin haksi’ak nia atu nonok tiha, maibe nia hetok foti lia maka’as liu tan: “David nia oan, sadi’a atan ha’u!” Jesus para hodi haruka sira lori nia mai. Uainhira ema matan delek ne’e hakbesik, Jesus husu ba nia: “Ó hakarak Ha’u halo sáida ba ó?” Nia hatan: “Na’i, atu ha’u haré fali!” Jesus dehan ba nia: “Haré fali ba; ó nia fiar soi tiha ó.” Nia haré kedasno hahu tuir Jesus hodi hauélok Maromak. Haré tiha ne’e, povo tomak hahi Maromak.

Lia Maksoyn.

Leave a Reply

Your email address will not be published. Required fields are marked *