shadow
Diocese de Dili > NOTÍCIAS > LETURA DIÁRIA > Terça-Feira, XXXIII Tempo Comum (Ano B)

Terça-Feira, XXXIII Tempo Comum (Ano B)

Primeira Leitura                  Ap. 3. 1-6; 14-22

Lia Housi Livro Apocalipse:

Ha’u,  João, rona Na’i dehan mai ha’u: “Hakerek ba anjo kreda iha Sardes nian hodi dehan, ‘Ne’e mak lia menon housi Ida be káeer Maromak nia espírito na’in hitu no fitun hitu: Ha’u hatene ó nia hahalok sira: ema hanoin katak ó moris maibe lolós ó mate ona. Hader tiha ba; no hamoris fali buat uitoan nebe sei hela, nebe atu mate ona. Ha’u la haré lós ó nia hahalok sira iha Maromak  futar  oin. Hanoina ba buat nebe ó simu tiha no rona. Káer metin nia ba, hodi hakribi ó nia sala. Ó  la hader karik, Ha’u sei mai hanesan na’okten ida, hodi la fó hatene iha sá oras ó sei hein Ha’u. Maibe sei iha ema lubun iha Sardes nebe la husik sira nia hatais sai fo’er, no sira ne’e sei la’o hamutuk ho Ha’u ho hatais mutin. Basá sira soi nia. Ema nebe manan sei hatais nune’e ho unuk mutin; no Ha’u sei la kasu nia naran housi livro moris nian; maibe Ha’u sei sasin ba sira nia naran iha Ha’u Aman no nia anjo sira nia oin. Se mak iha tilun, rona ba buat nebe Espírito dehan ba kreda sira.’’’

“Hakerek ba anjo kreda Laodiceia nian: ‘Ne’e mak lia menon Aman nian, Ida be fó sasin ho laran metin, Maromak nia escritura sira nia Hun lolós. Ha’u hatene ó nia hahalok sira: ó la manas no la malirin. Ha’u hakarak katak ó manas ka malirin, maibe tanba ó la manas ka la malirin  maibe morna de’it, Ha’u sei muta o housi Ha’u nia ibun. Ó dehan, ‘Ha’u riku, ha’u haloot tiha sasan barak no la kuran buat ida,’ hodi la hatene katak ó kiak, mukit liu, matan delek no isin tanan. Ha’u dehan maka’as ba ó, sosa housi Ha’u osa mean nebe koko tiha ona iha ahi laran atu ó sai riku lolós, no sosa mós unuk mutin hodi hatais no taka ó nia isin tanan atu ó la bele moe; sosa mós aimoruk ba ó nia matan atu ó bele haré. Ida nebe Ha’u hadomi, Ha’u si’ak no hadi’ak.

Ne’e duni, hakribi teb-tebes ó nia sala ba no laran badinas ba. Haré ba, Ha’u hamriik iha ó nia odamatan oin hodi tuku. Imi ida rona karik Ha’u nia lia no loke odamatan, Ha’u sei tama hodi han hamutuk ho nia, no nia ho Ha’u. Ida nebe manan, Ha’u halo nia tur hamutuk ho Ha’u iha Ha’u nia kadunan, nu’udar Ha’u mós manan no tur iha Ha’u Aman nia kadunan. Se mak iha tilun, rona ba buat nebe Espírito dehan ba kreda sira.”’

Maromak Futar Lia.

 

Salmo Responsorial                                                                                                     Sal. 14(15). 2-3ab, 3cd-4ab, 5 (R. Ap. 3. 21)

Refrão : Ida nebe manan sei tur ho Ha’u iha Ha’u nia trono!!! Repete-se

  • Ema nebe moris hodi la halo salan,

          Moris tuir justiça no ko’alia lialós ho laran tomak;

          Ema nebe la foti lia bosok hodi du’u matak. Refrão

 

  • Ema nebe la halo áat ba ema seluk,

          La hakribi nia maluk,

          Ema nebe heuuai ema áat,

          Hahi ema nebe hamta’uk Maromak. Refrão

 

  • Ema nebe halo tuir nia juramento

          Maski nia hetan susar,

          La empresta nia osan hodi husu funan,

          La simu presente atu hatatan ema sala laek;

          Ema hanesan ne’e sei la monu. Refrão

 

Aclamação                                                                                                                                                                                1Jo.  4. 10b

Refrão : Aleluia, Aleluia!! Repete-se

                  Maromak hadomi ita uluk hodi haruka Nia Oan rasik mai nu’udar

                  Maksoyn atu kasu ita salan. Refrão

 

Evangelho                                                                                                                                                                                Lc. 19. 1-10

Na’i Jesus Cristo nia Evangelho nu’udar São Lucas haktuir:

Iha tempo neba, Jesus tama tiha iha Jericó, Nia la’o tesik cidade laran. Iha ema ida naran Zaqueu. Nia publicano  sira nia ulun, no nia ema riku ida. Nia buka namanas atu haré Jesus, maibe la bele tanba ema barak, basá nia ain badak. Nia halai ba oin hodi sa’e ba ai ida atu haré Jesus, nebe sei liu housi neba. To’o tiha fatin neba, Jesus foti matan hodi dehan: “Zaqueu, tun mai lalais, basá ohin Ha’u sei hela iha ó nia uma.” Nia tun kedas hodi simu Jesus ho ksolok boot.

Haré tiha ne’e, sira hotu hamu’u dehan: “Na’i tama iha maksalak ida nia uma!” Maibe Zaqueu hamriik hodi dehan ba Na’i: “Na’i, ha’u sei fahe ha’u nia rikusoi balun ba kiak sira; ha’u na’uk tiha karik ema runa nia sasan, ha’u sei selu fali liu dala háat.” Jesus dehan ba nia: “Ohin maksoin tama iha uma ne’e, tan ema ne’e mós Abraão nia oan; basá Oan Mane mai buka hodi soi sira nebe la’o lakon dalan.”

Lia Maksoyn.

Leave a Reply

Your email address will not be published. Required fields are marked *