shadow
Diocese de Dili > NOTÍCIAS > HOMILIA DO BISPO > “HAHI MAROMAK SERVI EMA”

“HAHI MAROMAK SERVI EMA”

Coro Santa Cecília laos foun maibé ema wain conhece pessoalmente Ha’u mos conhece, primeira véz Ha’u ba hare’e sira ba hananu iha Baucau, coro ida ne’ebe canta di’ak, furak hodi lori ema hotu nia concentração participativo, devoção no atenção tomak iha Missa tuir lolos sira nia moto be dehan:  “Hahi Maromak Servi Ema”.

Nune’e, ohin ita halibur hamutuk atu hanoin fila fali Corál Sta. Cecília ninia existência ba década tolu katak tempo naruk grupo Corál ne’e hahi Maromak la sura kolen hodi servi mos maluk sira ho dedicação iha tinan tolu nulu (30) nia laran. Relaciona ho tema ne’ebe ohin ita rona katak grupo ida ne’e moris atu Hahi no Servi katak Hahi Maromak no Servi Maluk sira, ne’e duni grupo ida ne’e hanesan ohin dehan laos naran foun ba ita maibé ita conhece no hatene.

Tamba ne’e ohin sai hanesan momentos oportuno ida, ou seja, momento de pauza ninian atu ita bele hateke oituan ba kotuk hodi hare’e fila fali buat di’ak hotu ne’ebe sira halo ona hodi reconhece no aprecia buat di’ak lobuk ida, simu mos aplaus lobuk ida husi ema, afirmação lobuk ida. Nune’e ohin mos, tenki aten brani atu hateke ba nakukun, ba kanek no fitar lobuk ida ne’ebe hola parte iha história grupo ida ne’e nian durante tinan tolu nulu (30) nia laran. Ne’e duni tinan tolu (30) ne’e laos de’it buat hotu la’o di’ak maibé iha falhanço lobuk ida ne’ebe hola parte iha história hodi halo grupo ne’e sai metin liu tan to’o ohin loron no la’o ba oin nafatin hodi Hahi Maromak no Servi ema.

Tan ne’e, momento ida ohin sai hanesan momento de agradecimento, agradece ba buat kmanek oi-oin ne’ebe grupo corál ne’e simu husi serviço ne’ebe sira halo hodi servi, katak sira fó no sira mos simu. Tan ne’e buat ida ne’ebe ba Ha’u pessoalmente maka liu-liu ba Graça perceverança. Maske tempo naruk nia laran hasoru desafio oi-oin maibé grupo ne’e la para, la desanima no la lakon kbi’it to’o ohin bele completa nia história ba trizessimo (30) aniversário ba coro ne’e nia existência. Ne’e duni ba sira ita nia parabens no obrigado barak ba sira nia serviço ne’ebe sira fó iha ita nia Diocese particularmente iha Paróquia Balide.

Naran Sta. Cecília laos grupo corál bai-bain, maibé grupo ida ne’ebe hamahan-An iha mahan ida, mahan ida ne’ebe ohin ita celebra ninia festa Sta. Cecília. Santa ne’e la hahi Maromak ho ninia lian deit maibé ho ninia moris. Nia (Sta. Cecília) ho de’it hananu ho lian ne’ebe furak maibé oinsa nia halo nia moris sai moris ida ne’ebe furak hodi atrai ema barak no halo admira ho ninia presença.

Tan ne’e iha buat rua ne’ebe Ha’u hakarak sublinha iha Sta. Cecilia ninia moris:

Primeiro; “Hahi Maromak ho ninia pureza” katak hahi Maromak ho nia laran lo’os, ho nia laran di’ak. Cecília ita hotu hatene katak mai husi família ida ne’ebe nobre maibé família sarani. Husi família nia inan ho aman nia esperança ba sira nia oan Cecília maka Nia bele hetan mane ida bele forma família, maske Cecília la dun fo atensaun ba ida ne’e maibé objetivo inan ho aman nian maka hare’e mane ida ne’ebe tuir sira nia critério ne’e soin duni hodi sai feto ran ne’e nia furuto laen. Maske hanesan ne’e Cecília sarani di’ak ida wainhira nia sei feto ran nia halo promessa ida ba Maromak atu moris laran mos nafatin hodi defende virtude pureza ninian, defende virtude laan mo’os ninian, la tauk maske ninia família prepara mane oan ne’e atu bele forma família maibé nia la rejeita ida ne’e basá nia hanoin katak ne’e laos sai obstâculo ka impedimento ida atu nioa bele realiza ninia mehi. Nia mos la halo nia inan ho aman atu desanima (stress) ho ninia decisão.

Tamba ne’e tuir lenda, ou seja, história ne’ebe haktuir katak Cecília consegue halo tuir inan ho aman ho família sira nia vontade no decisão hodi decide duni sira nain rua káben mesmo mane cidauk simu sacramento Baptismo. Depois de forma tiha uma kain Nia dehan ba ninia laen Valeriano katak “Ha’u hakarak fo hatene segredo ida ba Ó, tan ne’e Ha’u husu Ó atu rona didi’ak no buka atu simu nafatin Ha’u hanesan Ó nia fen. Ó tenki hatene katak Ha’u iha Anju ida ne’ebe tau matan mai Ha’u, wainhira Ó brani kona Ha’u hanesan fen ho laen sira bai-bain, Anju ne’e sei hirus no Ó sei hetan terus makas maibé sé O respeita Ha’u nia virgindade Ha’u nia Anju ne’e sei hadomi Ó hanesan mos hadomi Ha’u”. Nune’e, Valeriano hatan “ Ó hatudu tok Anju ne’e mai Ha’u? Sé Nia mai duni husi Maromak ne’e sa Ha’u sei halo tuir Nia”; Cecília hatan “atu Ó hare’e Anju ida ne’e iha requézito ida katak Ó tenki simu Baptismo. Então, Valeriano halo tuir tan ho hakarak atu hare’e duni Anju ida ne’e. Nune’e, Nia ba hasoru Papa Urbanos atu Nia bele simu baptismo; simu tiha baptismo wainhira Nia fila fali ba uma Nia hare’e Cecília reza hela, iha Cecília nia sorin Nia hare’e Anju ida kaer hela Koroa rua, koroa rua ne’e ida ba Cecília no ida ba Nia (Valeriano), Koroa rua ne’e hatudo sentido Laran mos ninian katak maske ita káben maibé virtude pureza ninian, ou seja, virtude laran mos ninian ita rua iha obrigação atu promove no haki’ak virtude ida ne’e iha ita nia moris nu’udar káben na’in.

Sta. Cecília, ohin convida ita atu hahi Maromak laos hodi ita nia lian, hahi Maromak laos deit hodi ita nia música sira ne’ebe maka ita hananu maibé ho ita nia moris, ho ita nia laran mos. Tamba ne’e, ohin, iha primeira leitura husi Livro Apocalipse ita rona katak ”Dragão bo’ot ne’ebe São Miguel ho ninia Anju sira halakon tiha ona; Dragão bo’ot ida ne’e maka samea, ou seja, diabo no satanas ninia ulun. Maun alin sira, comemoração ohin ninian convida ita hotu buka atu luta nafatin hodi brani hasoru buat a’at hotu ne’ebe tenta ita atu hela iha nakukun laran katak buat ne’ebe lori ita ba moris iha sala nia laran. Cecília hetan força atu resiste hasoru tentação; hanesan ita nos dala ruma tau questão ida ne’e katak ita mos iha vontade maibé dala barak ita dehan Espírito forte maibé isin fraco, hanoin ba katak Cecília mos koko, atu hetan força maka ninia Oração liu husi ninia vida Sacramento ninian.

Fila fali ba ita nia moris, dala ruma ita questiona katak tamba sa mak dala barak  ita la consegue atu resiste?  Tamba sá mak dala barak mos ita la consegue atu experimenta ksolok ida ne’ebe ita experiência hela? Karik ita fila ba ita nia-An ita dehan: ohin loron ita facil atu monu ba tentação oi-oin. Pergunta ne’e fila fali ba ita, será que ita harohan duni eh lae? Ita participa duni iha Sacramento sira eh lae? Uluk, iha família sira facil atu rona no hare’e bebeik família sira halibur malu hodi reza terço; maibé ohin loron, por causa de cinetron, televisão ho filme oi-oin, nune’e mak ohin loron ema laiha tan ona tempo atu reza terço katak ita atu fo netik minuto 5, 10 no 15 ba Maromak iha kalan ida ne’e susar. Mesmo hanesan ne’e maibé iha família balun ne’ebe sei hakiak ao contrário barak mak lakon tiha ona tradição ida ne’e. uluk mos Domingo ema nia actividades primeiro maka participa uluk misa Eucaristia maibé agora tamba de’it semana tomak serviço então Domingo sai tiha fali oras atu descansa nian iha uma, ba pasear, ba negócio no halo interesse pessoal sira mesmo hela besik hela Paróquia. Ho atitudes hirak ne’e hatudu momos katak tentação actual ne’ebe mosu halo ita la fo tan tempo ba Maromak iha ita nia moris, katak ita nia tendência atu halo ita hakbesik-An ba Maromak ne’e menos ona maibé tendência hirak ne’e ba fali sasan seluk mak barak. Nune’e ita ida-idak bele senti iha vida pessoal, vida familiar no vida social ninian; wainhira ita iha nakukun, iha desesperado, iha problema ita la uza ona fuan, fiar no oração mak hodi resolve maibé hodi ita nia emoção no força mak koko atu resolve ita nia problema sira.

Tan ne’e, maka ohin, Sta. Cecília convida ita iha celebração ida ne’e atu ita hare’e fila fali baita nia moris nu’udar ema individo, ou seja, pessoa ida-idak no nu’udar comunidade; atu ita mos koko tentação no dificuldade hanesan uluk Sta. Cecília koko no hasoru la se’es husi ita nia realidade atual. Basá tinan rihun ida liu ba Nia mos moris hanesan humano katak iha fuan, iha ran; nudar ema mos Nia iha experiências de fraquesas humana nian hanesan ohin loron ita mos experimenta. Mesmo iha mudanças de tempo no cultura maibé baseia ba fraquesas ema ninian la dok ba malu. Nune’e precisa sadere ba força ne’ebe lo’os liu hodi tau confiança tomak iha Maromak ninia liman. Ne’e maka Virtude da pureza, ou seja, laran mos.

Segundo; “Hahi Maromak hodi fo Sasin” katak fo sasin kona ba ita nia fiar sarani ninian, ohin ita rona iha Evangelho fo hanoin mos mai ita katak “ser discípulo” ne’e katak sa? Sai discípulo ka sai escolante Cristo ninian katak Ema sei ódio imi iha fatin hotu-hotu tamba Ha’u nia naran, maibé ema ne’ebe tahan tan Ha’u nia naran nia sei hetan Salvação. Wainhira Cecília no Valeriano sai tiha sarani sira na’in rua mos hetan dificuldade tamba iha tempo ne’eba tuir história haktuir katak imperador Deoclitiano halo perseguição maka’as contra Cristão sira iha Roma. Kaer sarani barak hodi oho tamba sira nia fiar. Nune’e Valeriano ho Cecília sira na’in rua ninia actividade maka hakoi sarani sira ne’ebe hetan oho husi imperador. Maibé to’o tempo Imperador mos descobre katak Valeriano mos sarani tiha ona, nune’e kaer halo perseguição no oho mos Nia; nune’e mos to’o loron ida Cecília mos lakon ninia vida tamba Nia la tauk, la mo’e atu fo testemunha no fo sasin kona ba ninia fiar, Cecília aten brani hodi la tauk hasoru ninia mate. Nune’e Nia sai exemplo ba feto ran ida ne’ebe lo’os, ne’ebe halo nia moris hanesan knananuk ida hodi hahi Maromak, Nia rasik decide no hili atu moris virgem, Nia hili no opta atu mate duké sai traidor ba domin ne’ebe oferece ba Cristo.

Maluk doben sira, liu-liu ba ita nia maluk sira husi grupo Corál Sta. Cecília, nune’e mos ba família bo’ot Sta. Cecília ninian. Durante década tolu (30) ne’e ni laran imi exprimenta ona buat di’ak oi-oin Na’i Maromak nian liu husi Sta. Cecília atu bele hananu no hahi Maromak ho imi nia lian. Maibé ohin celebração ne’e convida atu laos ho ibun de’it hodi bele hahi maibé ho ita nia moris. Ha’u bele dehan katak oinsa mak ita bele hakiak virtude hirak ne’e iha ita nia moris, virtude laran mos ninian no virtude aten brani ninian, ou seja, virtude corajoso ninian. Virtude rua ne’e maka ha’u bele dehan katak sai hanesan abut ba Espiritualidade ba grupo corál Sta. Cecília nian. Ne’e duni la’o kleur ona to’o tinan tolu nolu (30), Ha’u fiar katak durante preparação tinan ida ne’e ninian imi halo formação barak, além de formação halo mos apostulado lobuk ida ba to’o Paróquia balu; tamba ne’e mak ohin Paróquia lobuk ida representa iha ne’e hanesan: Paróquia Remixio, Aileu, Ermera, Letefoho no Maubissi mai iha ne’e hodi hatudo sira nia solidariedade tamba imi nia “rich out” ba to’o sira liu husi imi nia experiências partilhadas. Portanto, loron especial ida ohin la to’o deit iha celebração ida ne’e maibe sai hanesan experiência ida ne’ebe preenche iha festividade tomak. Importante liu maka actividade ida ne’e ikus mai husik hela ba imi grupo Sta. Cecília, passo ida ne’ebe hametin tan, consolida liu tan imi nia compromisso no imi nia Espiritualidade, Espiriualidade ida ne’ebe suli husi Sta. Cecília rasik, Nia mak sai imi nia mahein no hare’e mos ba Nia Juventude lobuk ida ne’ebe halo Nia nabilan iha uma Creda. iha tinan rihun ida atus lima resin ne’ebe uma Creda hahi Sta. Cecília tamba ninia virtude ne’ebe nabilan iha Nia; hein katak virtude ida ne’e mos bele kuda no bele hakiak iha imi ida-idak nia fuan no laran. Tamba ne’e maka ita hotu-hotu ne’ebe mak ohin simu convite mai iha haksolok hamutuk ho família bo’ot corál Sta. Cecília nian hasa’e ita nia agradecimento no liu-liu ita harohan atu liu husi intercessão Sta. Cecília ninian músico hotu-hotu iha mundo rai klaran particularmente músico hotu Timor oan nian bele hetan mos inspiração paixão Sta. Cecília ninian hodi hananu ba Maromak liu husi lian, matenek hodi lori ema atu hanoin, atu bele contempla no lori ema atu bele hare’e Maromak besik liu tan. Ida ne’e mak ita nia esperança iha ita nia celebração ohin no ita reza atu ita hotu bele koko nafatin di’ak ne’ebe iha Sta. Cecília ninia-An no la’o tuir virtude hirak ne’ebe Nia husik hela iha uma Creda atu liu husi ninia lian no intercessão ita bele continua hahi Maromak ho ita nia lian no ita nia moris hodi ita bele halo uma Creda ne’e sai furak liu, sai moris liu tan no sai Santo no Santa iha ita nia Sociedade Timor Leste. Amen!

Leave a Reply

Your email address will not be published. Required fields are marked *