shadow
Diocese de Dili > NOTÍCIAS > LETURA DIÁRIA > Sabado, XXXIII Semana Tempo Comum (ANO B)

Sabado, XXXIII Semana Tempo Comum (ANO B)

Primeira Leitura                       Ap. 11. 4-12

Lia housi Livro Apocalipse

Lia tun mai ha’u, João, nune’e: “Ha’u sei haruka Ha’u nia sasin na’in rua atu halo profecia ba loron rihun ida atus rua ne’en nulu; sira sei hatais karon nian. Sira ne’e mak ai oliveira rua no ahi oan rua ne’ebe hela iha rai klaran nia Na’i Nia oin. Wainhira ema buka atu halo áat sira, ahi bele sai housi sira nia ibun hodi han funu baluk sira. Ema  ruma buka halo áat sira karik, nia sei mate duni hanesan ne’e. Sira bele taka lalehan atu nune’e udan la tau wainhira sira halo profecia. Sira bele halo ué nakfila ba ran hodi halo áat rai klaran ne’e ho susar naran de’it wainhira sira hakarak. Wainhira sira fó sasin tiha ona,  balada ne’ebe mai housi rai kle’an bo’ot sei halo funu hasoru sira no sei manan sira no oho sira. Sira nia isin mate sei toba iha dalan bo’ot cidade bo’ot nian ne’ebe ema hanaran simbolicamente Sodoma no Egipto, iha ne’ebe ema hedi tiha nia Na’i iha cruz. Loron tolu ho balun, ema sira housi povo oi-oin, raça, lia no nação hotu sei hateke ba sira nia isin mate, hodi la husik ema hakoi, no ema sira housi rai klaran sei haksolok tan sira hodi haliban buat ne’e; sira sei fó buat ksolok ba malu, basá profeta rua ne’e fó susar ba povo rai klaran nian.”

Liu tiha loron tolu ho balun, Maromak huu iis moris nian ba sira. Sira hamriik no sira hotu ne’ebe haré buat ne’ebe mosu ta’uk teb-tebes. Tuir mai, sira rona lia maka’as housi lalehan ne’ebe dehan ba sira, “Sa’e mai iha ne’e!” sira nia funu baluk sira sei hateke hela, sira sa’e ba lalehan iha kalohan ida nia laran.

Maromak Futar Lia.

 

Salmo Resposorial                                                                                        Sal. 118(119). 14 e 24, 27 e 103, 111 e 131 (R. 103ª)

Refrão : Rahun di’ak ba Na’i, fatuk inan ha’u heli-an fatin nian. Repete-se

 

  • Rahun diak ba Na’i,

          Fatuk inan ha’u heli-an fatin nian,

          Nia mak hanorin ha’u liman ba hafunu,

          No ha’u liman fuan ba funu. Refrão

 

  • Maromak mak ha’u tulun no ha’u kota,

          Ha’u kbi’it no ha’u maksoin;

          Nia mak ha’u kalili no heli-an fatin,

          No halibur povo iha ha’u kbi’it okos. Refrão

 

  • Ha’u sei hananu ba Ita, Maromak, knananuk foun ida,

          Sei hadahur ba Ita ho lian harpa,

          Ita mak halo liurai manan

          No David, ita atan. Refrão

 

Aclamação                                                                                                                                                                          cf. 2Tim. 1. 10

Refrão : Aleluia, Aleluia!!! Repete-se

                  Jesus Cristo, ita nia maksoin halakon mate;

                  Nia halo moris nabilan housi Evangelho. Refrão

 

Evangelho                                                                                                                                                                            Lc. 20. 27-40

Na’i Jesus Cristo Nia Evangelho nu’udar São Lucas haktuir:

Iha tempo ne’eba, ema saduceu balun, ne’ebe la fiar moris hi’as, hakbesik ba Jesus hodi husu ba Nia: “Mestre, Moisés hakerek mai ami: wainhira mane ida nia maun mate karik hodi husik nia féen maibe oan la iha, nia sei hola nia maun nia feto faluk ne’e atu fó oan sira ba nia maun. Iha kedas maun alin na’in hitu. Ida uluk hola feto ida, hodi mate, oan la iha. Alin ne’ebe tuir nia hola fali feto faluk ne’e; tuir mai ida seluk, nune’e mós sira na’in hitu hola nia no mate hotu la husik oan ida. Ikus liu, feto faluk mós mate. Ne’e duni, iha loron moris hi’as ni’an, feto ne’e se  nia féen lós? Basá sira na’in hitu hola tiha nia.”

Jesus hatan ba sira: “Mundo ne’e nia oan sira hola malu nu’udar la’en féen, maibe sira ne’ebe soi ba mundo seluk no ba moris hi’as housi mate sira le’et, sira ne’e la kaben, tan sira labele mate tan, basá sira hanesan anjo sira. Sira Maromak Nia oan, basá sira moris hi’as nia oan sira.kona ba moris hi’as matebian sira nian, Moisés rasik mak hatudu hodi hakerek konaba aitarak hun ne’ebe lakan maibe ahi la han, wainhira nia bolu Na’I “Abraão nia Maromak, Isaac nia Maromak no Jacob nia Maromak.” Nia la’os matebian sira nia Maromak, maibe ema moris sira nian; basá ba Na’I, ema hotu moris hela.” Tuir mai, escriba balun simu hodi dehan: “Mestre, Ita ko’alia lós.” No sira la brani ona atu husu tan buat ida.

Lia Maksoyn

Leave a Reply

Your email address will not be published. Required fields are marked *