shadow
Diocese de Dili > NOTÍCIAS > REFLEXÃO > “HAU NIA REINO LAOS IHA RAIKLARAN NEE, SE HAU NIA REINO HUSI RAIKLARAN NEE KARIK HAU EMAR SIRA SEI FUNU ATU HAU KETA MONU BA JUDEU SIRA NIA LIMAN”

“HAU NIA REINO LAOS IHA RAIKLARAN NEE, SE HAU NIA REINO HUSI RAIKLARAN NEE KARIK HAU EMAR SIRA SEI FUNU ATU HAU KETA MONU BA JUDEU SIRA NIA LIMAN”

Maun alin sarani doben sira, Nai Jesus Cristo ninia afirmação ida nee automaticamente lori ita diretamente ba hanoin kedas buat rua, ida ukuk mak katak JESUS CRISTO liurai duni, no tuir fali mai mak katak Reino Cristo nian, la hanesan reino ema sira nian iha rai klaran nee. Cristo ninia reino reino Lalehan nian, reino rohan laek.

Leitura sira nebe ita foin mak rona dadaun hatudu mai ita diferença entre reino lalehan nian no reino rai klaran nee ninian. Liu liu haktuir mai ita kona ba reino lalehan nian nebe Cristo mak nundar Liurai. Comcerteza ita hatene didiak reino sira iha rai klaran nee ho sira ninia kbiit tomak no ho sira ninia fraqueza sira tomak, basa ita moris duni iha ambiente reino rai klaran nee ninian ho modelo ukun nain ka liurai raiklaran nee ninian nebe dala barak tebes ukun ho liman kroat, ukun ho besi asu. Oinseluk ho Reino Lalehan nian nebe ita sedauk hatene klean didiak. Reino ida ne’e Cristo rasik nundar Liurai boot liu hotu lori hela mai iha ita leet maibe ita barak sedauk hatene didiak. Reino ida ne’e boot liu reino hotu hotu, reino ida nebe hodi ita ninia halibur malu iha nee hatudu katak ita hotu hola parte ba.

Maun alin sarani doben sira, se reino lalehan la hanesan ho reino rai klaran nee nian, comcerteza ne’e tamba reino rua nee ninia Liurai mos la hanesan. Reino Lalehan nian Maromak mak ukun no reino rai klaran ne nian ema mak ukun. Reino ida atu sai oinsa nee depende ba ninia liurai.

Reino lalehan laos katak reino nebe iha lalehan neba, maibe reino lalehan ne katak ukun ho kbiit lalehan nian, maibe reino ida ne’e hetan mos iha ita ema sira ninia leet hanesan reino rai klaran nee ninian. Buat nebe halo diferença mak reino raiklaran nee nian ukun ho kbiit raiklaran nian nebe dala wain tebes la lori diak ba ita ema sira maibe lori fali mak terus no susar basa sira ukun ho kbiit ida nebe tau liu atenção ba iha sasan sira laos iha ema, tau liu atenção ba iha ninia an ka ninia grupo nia interese ka diak, laos ema hotu ninia interese ka diak. Husik deit ukun liman kroat nian mak ukun nunee ikus mai la lori diak ba povo sira maibe lori fali mak terus no susar ba povo sira.

Maibe maun alin sira, ukun lalehan nian ukun ho kbiit Lalehan nian nebe garante moris diak lolos nundar reino Maromak nian ba ninia emar sira, basa reino ida nee tau ema nia moris mak sai atenção ba ukun nee, ema nia moris mak sai importante iha ukun nee’ laos sasan no laos ema ida ka grupo ninia diak deit. Reino lalehan nian ukun ho lei Maromak nian nebe fo moris ba ema. Ukun ho fuan no ho laran mos no laran los be mai husi Nai Maromak, mai husi Jesus Cristo liurai lolos nian. Maromak ninia ukun ida nunee mak halo laiha tan ukun seluk diak liu Maromak ninia ukun, laiha tan reino seluk diak liu reino Maromak nian. Maromak nia reino reino boot liu hotu, reino diak liu hotu. Jesus Cristo mak liurai lolos iha nee, Cristo mak liurai hotu hotu ninia liurai.

Ohin ita rona iha evangelho Pilatus husu ba Jesus, O liurai? Jesus hatan dehan o rasik mak dehan lia ida nee kona ba hau ka ema ruma mak dehan ba o kona ba hau? Iha sira nain rua ninia discussão kona ba liurai nee ikus mai Jesus hatan dehan o rasik mak dehan hau liurai, LOS DUNI HAU LIURAI. HAU MORIS DUNI NUNDAR LIURAI, Hau mai iha mundo nee atu haklaken LIALOS kona ba hau nia reino nee. REINO IDA ROHAN LAEK EMA SEI LABELE HARAHUN BASA REINO IDA NEE UKUN HO KBIIT ROHAN LAEK. Kbiit reino ida nee nian mak DOMIN, PAZ NO KSOLOK, tamba nee mak ema sira hanaran reino nee nundar reino ksolok nian, reino paz nian, no reino domin nian. Ida nee mak lialos reino lalehan nian. Reino sira hotu rai klaran nee nian bele lakon no bele liu hotu maibe reino Lalehan nian be moris iha lialos nee sei hela ba nafatin.

Doben maun alin sira ita hotu nebe oras nee halibur-an dadaun iha nee’e confessa ita ninia fiar iha Jesus Cristo be ukun reino ida nee. Liurai boot liu hotu, liurai lalehan ho rai klaran nian. Nune’e ita hotu mesak reino ida nee ninia oan deit no ita nia liurai lolos mesak ida deit mak JESUS CRISTO. Katak sa mai ita wainhira ita hola parte iha reino ida nee no katak sa mai ita wainhira ita dehan katak Jesus CRISTO mak ita ninia liurai?

Hola parte iha reino ida nee katak moris iha reino ida nee ninia ukun, nebe katak moris iha paz, moris iha domin, moris iha ksolok. Maromak halo ita hola parte iha reino ida nee basa ita fiar iha Nia no Nia halo ita moris nunee basa ita hakarak moris tuir nia. Moris iha domin, iha paz no iha ksolok nafatin, loron loron iha ita nia moris, ita buka nafatin atu hakiak no haburas iha ita ninia leet paz, domin no ksolok. Hodi moris nune mak ita moris duni iha lialos be Cristo haklaken mai ita, be Cristo hatudu mai ita nundar lialos ninia reino nian. Hodi moris nune mak katak ita pertence lolos duni ba Maromak ninia reino, reino lalehan nian, reino Cristo nian. Hodi moris nune mak ita fo sasin duni katak Jesus Cristo mak ita nia liurai lolos, liurai be ukun ita ema sira ho domin, ho paz no ho ksolok. Oinseluk ita laos reino Maromak nian nebe sei la nahas maibe ita sai fali reino ema sira nian nebe sei nahas lakon.

Maun alin sira mai ita buka atu iha ita nia moris ita buka moris duni iha reino Maromak nian nebe laos hatudu deit iha ita nia hakarak atu moris iha neba maibe moris concreta duni reino ida nee nian nebe hatudu an iha moris ida nebe hakonu an ho buka, hakiak no haburas domin, paz no ksolok iha ita nia moris. Cristo ita nia liurai lolos mak sei halo ida nee sai concreto liu tan wainhira ita hatudu lolos ita nia fiar no laran metin ba nia hodi moris no lao tuir nafatin nia nundar ita nia liurai lolos iha buat hotu nebe ita halo iha fatin no circumstância hotu hotu. Amen.

Bidau, 25 Novembro 2018, Pb.

One comment on ““HAU NIA REINO LAOS IHA RAIKLARAN NEE, SE HAU NIA REINO HUSI RAIKLARAN NEE KARIK HAU EMAR SIRA SEI FUNU ATU HAU KETA MONU BA JUDEU SIRA NIA LIMAN”

  1. Lopes

    Furak Amo..
    Parabens

Leave a Reply

Your email address will not be published. Required fields are marked *