shadow
Diocese de Dili > NOTÍCIAS > LETURA DIÁRIA > Terça-Feira, XXXIV Semana Tempo Comum (Ano B)

Terça-Feira, XXXIV Semana Tempo Comum (Ano B)

Primeira Leitura                   Ap. 14. 14-20

Lia housi Livro Apocalipse:

 Ha’u, João, haré kalohan mutin ida, no iha nia, ema ida tur hela; hanesa Oan Mane ho coroa osan mean nian iha nia ulun no tudik ko’a háre nian iha nia liman, anjo ida tan sai housi santuário, no hakilar ho lian maka’as ba ida ne’ebe tur hela iha kalohan: “kaer ó nia tudik ba hodi ko’a háre:tempo atu ko’a to’o ona, no háre rai klaran nian tasak ona.” Ne’e duni, ida ne’ebe tur iha kalohan leten hahu ko’a háre iha rai, no rai nia fulin ko’a hotu ona.

Anjo seluk tan sai housi templo iha lalehan; nia mós kaer tudik kroat ida. Anjo ida tan sai housi altar; nia mak ukun ahi. Nia hakilar ba ida ne’ebe kaer tudik kroat: “kaer ó nia tudik ba hodi ku’u uvas hotu iha rai klaran; basá uvas tasak ona.” Nune’e, anjo hahu serviço iha rai no ku’u iha to’os uvas hotu rai ne’e nian hodi hatama nia iha fatin bo’ot atu sama uvas.

Maromak Futar Lia.

 

Salmo Responsorial                                                                                                                       Sal. 95 (96). 10, 11-12, 13 (R.13b)

Refrão : Na’i mai tesi lia ba mundo!!! Repete-se

 

Haklaken ba povo hotu-hotu:

“Na’i mak Liurai.”

Nia harí mundo metin, sei la nakdoko,

Na’i ukun povo hotu ho justiça. Refrão

 

Lalehan haksolok ba, rai hananu ho ksolok ba,

Tasi no buat hotu iha tasi laran,

Rai luan no buat moris tomak iha nia, haksolok,

Haksolok ai sira iha ailaran. Refrão 

 

Iha Na’i be sei hi’it aan mai Nia futar oin,

Nia mai tesi lia ba rai,

Nia sei tesi lia ba mundo ho justiça,

No ba povo hotu ho felicidade. Refrão

 

Aclamação                                                                                                                                                                                  Ap. 2. 10c

Refrão : Aleluia, Aleluia!! Repete-se

Laran metin ba to’o mate no

Ha’u sei fó ba ó coroa moris nian . Refrão

 

Evangelho                                                                                                                                                                                 Lc. 21. 5-11

Na’i Jesus Cristo nia Evangelho nu’udar São Lucas haktuir:

Iha tempo ne’eba, tan ema balun ko’alia konaba templo hodi hateten katak ema hafutar nia ho fatuk mesa furak no buat karan sira, Jesus dehan: “Loron sei to’o wainhira buat ne’ebe imi haré daudaun ne’e sei sobu hotu; fatuk ida sei la hela iha fatuk seluk nia leten.” Sira husu ba Nia: “Mestre, wainhira mak buat hirak ne’e mosu? Sira sei hahu ho sinal ida ne’ebe?”

Jesus hatan: “Haré ba, atu ema keta lohi imi; basá ema barak sei mosu mai hodi Ha’u nia naran dehan “Mak Ha’u!” no “tempo besik ona!” keta tuir sira. Wainhira imi rona ema ko’alia konaba funu no revolução sira, keta ta’uk, basá buat hirak ne’e hotu sei mosu uluk, maibe rohan seidauk to’o  mai kedas.” Hafoin Nia dehan ba sira: “povo ida sei hamriik halo funu hasoru povo seluk, reino ida sei hasoru reino seluk. Rai sei nakdoko maka’as; iha fatin oi-oin ema sei hamlaha, moras peste sei mosu; buat ne’ebe halo ema ta’uk sei mosu mai, ho sinal bo’ot iha lalehan.

Lia Maksoyn

Leave a Reply

Your email address will not be published. Required fields are marked *