shadow
Diocese de Dili > NOTÍCIAS > HOMILIA DO BISPO > DIACONO DIOCESANO NA’IN TOLU SIMU ORDENAÇÃO SACERDOTAL

DIACONO DIOCESANO NA’IN TOLU SIMU ORDENAÇÃO SACERDOTAL

Ita hotu hatene katak loron ohin Na’in Feto da Graça ninian tanba ne’e ha’u hakarak ita hahu ho oração nebe especial ba ita Na’in Feto da Graça; “Oh Virgem Maromak Inan no ami Inan sala laek, hateke ba Ita liman nakloke nakonu ho graça suli ba hirak ne’ebe hein hela, ho confiança bo’ot iha Ita poderosa interceção, dala wain hatudu ho medalha milagrosa, masque ami la soi tanba ami hahalok áat sira, halibur hamutuk iha Ita futar ain. Ho oração ne’e ami hasa’e ami nia necessidades sira. Oh Virgem medalha milagrosa, haraik mai atan ami buat ne’ebe ami ho fiar husu ba Ita, ba Maromak nia glória. Ba Ita nia naran bo’ot no ba klamar sira nia diak, atu bele serví didiak Ita nia Oan ami Nain Jesus Cristo, tulun ami atu funu hasoru sala no laran metin nafatin hatudu ami nia fiar nu’udar sarani ne’ebe los”.

Ohin ita mai atu agradece ba Inan Graça nian ba di’ak hotu nebe ita simu lor-loron iha ita nia moris nudar ema pessoal ida-idak, nudar familia no nudar comunidade, ita mos sente besik tebes ba inan ida ne’e liu-liu wainhira iha susar no terus nia laran hanesan São Bernardo iha ninia oração nebe dehan “to’o agora ha’u seidauk rona ema ida halerik katak ita hewai nia hamulak”  iha São Bernardo ninia moris, nia esprime katak ema nebe halai  ba buka Na’in Feto nia tulun laiha ida nebe buka leet de’it, halai kole leet de’it, la iha nebe Na’in Feto taka matan ba. Tan ne’e mak São Bernardo dehan to’o agora ha’u seidauk rona ema ida dehan kona ba nia harohan leet de’it ba Na’in Feto. Ida ne’e hatudu momos husi Na’in Feto da Graça nia liman rua nebe nakloke iha ita hotu nia oin, husi nia liman karuk no liman los iha simbolu graça haraik ba sira nebe harohan, ba sira nebe husu nia graça, graça nebe continua suli mai ita no ida nebe mak pronto atu partilha nafatin ho ita iha ita nia terus, susar no ita nia ksolok, la’os de’it atu hahi Maromak nia di’ak nebe hatudu iha Na’in Feto da Graça maibe iha pedido ida katak buat ida de’it mak ami husu ba ita atu bele hatene, la’o tuir Maromak nia vontade ida ne’e mak hanesan ohin iha oração dehan atu ha’u bele coragem funu hasoru sala no moris nu’udar sarani nebe los. No atu habadak ho liafuan karik dehan”Santidade”, Na’in Feto ninia harohan atu ita hotu bele sai santo hanesan ita nia amo papa ninia exortação dehan Santidade é visto mais velha da Igreja.

Iha conclusão documentos joventude ninia mos reconhece katak educação hot-hotu nia hun mak atu ita bele sai santo, hetan Santidade, masque iha forma oi-oin hanesan balu kaben, balu la kaben, balu sai padre, balu sai madre maibe sarani consagrado-consagrada ita hotu hodi ita nia baptismo iha vocação comum ida atu ita hotu sai sant. Tan ne’e mak maluk doben sira ohin Na’in Feto convida ita hotu atu hanoin fali kona ba vocação ninia murak,vocação ninia di’ak, vocação sarani ninia, ita hotu husi kiik to’o boot, feto-mane atu hafutar uma kreda ho ita nia moris ho ita nia hahalok sarani ninian, la to’o atu hafutar ho ita nia matenek ho sasan sira nebe ita iha maibe sarani sira nia moris santo mak halo kreda furak. Hanesan São Francisco de Assis wainhira sei joven nia ba iha capelinha ida hodi halo oração, wainhira nia reza nia rona lian ida mai husi cruz dehan Francisco hadia Ha’u nia uma kreda no Francisco hanoin kona ba físico, semente, kalen, fatuk, badaen no hanoin kona ba projeto maibe Maromak continua repete katak la’os kreda físico ka kreda material maibe kreda moral no espíritual.

Tempo muda, maibe Maromak ninia hakarak hanesan nafatin, sai santo hanesan imi nia Aman iha lalehan nebe santo. Atu realisa missão ida ne’e Na’i Maromak continua bolu sira nebe hakarak atu la’o tuir dalan ida ne’e, halo sira nia moris tuir misterio Na’i nia cruz nian, ida ne’e mak centro ba celebração dader ida ne’e nian. Comemoração festa Na’in Feto da Graça nian ne’e, convida ita hotu atu halo buat nebe nia dehan “halo buat nebe Nia dehan ba imi”, ida ne’e mak liafuan nebe Na’in Feto dehan ba sira nebe haré mesa no ohin nia dehan ba ita hotu iha ne’e atu halo tuir Nia no Nia mak Jesus.  Tan ne’e maluk doben sira husi dialogo entre Jesus ho Nia Inan, ita barak admira evento ida ne’ebe mak Jesus nia inan de’it mak dehan “sira nia tua laiha ona”. Ida ne’e buat ida ema la hein buat kiik oan ida maibe importante mak inan ne’e fo informação ba nia oan Jesus, nia hakarak nia oan rasik hatene kona ba situação ida ne’e maibe Na’in Feto la husu buat ida ba Jesus, la’os katak nia liafuan sira descreve situação nebe ladun di’ak maibe Na’in Feto la husu Jesus atu halo milagre, nia hein buat ruma husi nia oan mak força comunicação nian, importância comunicação iha ita nia moris.

Uluk nana’in Na’in Feto hanorin ita atu iha sensibilidade katak iha abilidade atu comprende di’ak liu ema seluk nia situação iha ita nia familia, iha grupo no iha fatin nebe de’it. Atitude ida ne’e ohin loron la facil atu haburas tanba cultura U BOOT mak buras los, vocabulario ida nebe sai ameaça ba ita nia valor sira wainhira koalia kona ba domin. Na’in Feto nia husu no hein, característica ida seluk kona ba Na’in Feto nia fiar katak Jesus iha kbiit atu bele halo buat ruma iha situação ida hanesan ne’e. Na’in Feto hanorin ita hotu atu hatene haraik an, atu confia Na’i Maromak, la’os ita moris ho ema nia matenek to’o iha nebe de’it ita sei la halo buat hot-hotu maibe wainhira ita hatene loke ita nia an, ita nia plano, ita nia projeto sira ba Maromak di’ak liu confia Maromak doque ema, basá Maromak seidauk confu ita ema. Tanba ne’e ba nai-lulik foun na’in tolu (Pe.Abito, Pe.Cirilio no Pe.Juliano) nebe tur iha ita nia oin ida-idak ho nia moto nebe fo expressão ba sira ida-idak nia experiência fiar ninian liu-husi experiência naruk ida ikus mai koko atu hametin liu tan confiança ida ne’e hanesan Pe.Abito dehan iha nia moto katak “HA’U NUNCA HALUHA O, (Is.49;15)”, Pe.Cirilio ninian dehan”HA’U MAK HA’U,(Ex.3;14)”, no Pe.Juliano ninian dehan”HA’U FO DE’IT JESUS NAZARE NIA NARAN,(Act.3;6)” . Ba Pe. Abito, Pe. Cirilio no Pe. Juliano, wainhira koalia kona ba zelo pastoral, paixão ba ita nia kna’ar nu’udar amo lulik ninian liafuan sira husi evangelho nian bolu ita nia atenção, sarani sira bolu ita no desejo la’os atu haré evangelizador pastor nebe triste no desanimado ka pastor evangelizador ida nebe laiha paciencia no ancioso maibe ministro sira evangelho nian nakonu ho espírito moris, nakonu ho ksolok nebe mai husi Jesus Cristo. Liu husi ordenação ida ne’e atu configura imi nia an tuir Cristo amo-lulik boot no aas liu hotu iha maneira nebe especial. Vocação ida ne’e aas tebes, tanba mediente consagração sacramental, amo-lulik simu dom ida poder espíritual nian, ne’e mak participa iha autoridade nebe Jesus Cristo cria ninia kreda no kbiit espírito ninian. Zelo apostólico ne’e caracteriza ho domin ida nebe apaxionado laiha fronteira nebe dudu no encoranja ita atu concretiza acção ida ne’e iha uma creda hamutuk ho uma creda no percisa iha próprio dicernimento ida, iha zelo apostólico ida ne’e, maibe percisa iha próprio dicernimento, katak percisa haraik an, hatene rona tanba ba escolante la hatene saida mak tem que halo basá nia la’os mestre. Ita hotu mesak instrumento Maromak ninian atu hatudu dalan. Rona mak disponível la’os resposta, ida ne’e mak comunidade discípulo missionário nebe hakarak atu rona Na’i nia lian ho espírito unidade ninian nune’e hatene saida mak tem que halo no halo oinsa. Comportamento iha Jesus ninian no Jesus convida ita abandona, tau ita nia an, husik buat hotu atu bele livre hodi halo tuir Maromak ninia hakarak

Molok atu taka reflexção ida ne’e, ha’u hakarak taka ho citação ida husi sínodo foinsa’e sira nian nebe serve ba imi na’in tolu (Pe.Abito, Pe.Cirilio no Pe.Juliano) atu hanoin no convida ita, amo-lulik sira hotu atu hader halo mundo ho ita nia Santidade, ita mak tem que santo uluk nune’e bele lori sarani sira liu-liu foinsa’e sira atu sai santo. Foinsa’e sira husu de’it buat ida ba ita Amu-lulik sira kona ba creda ida nebe autêntica, uma creda ida nebe nabilan, uma creda ida ne’ebe trasparente no uma creda ida nebe ksolok tanba iha foinsa’e barak fiar malirin tan deit sira lahetan Santidade husi uma creda tan sira haré dala ruma iha mediocridade no iha buat oi-oin mosu iha uma creda. Tan ne’e uma creda percisa ema santo atu forma santo foun sira. Mai ita harohan ba Santidade tanba ho Santidade mak ita hafutar ita nia uma creda iha ita nia diocese no iha ita nia rai doben Timor Leste. Tanba Santidade mak rosto ka oin uma creda ninian. Mai ita harohan liu husi interceção ita Na’in Feto ninian hodi renova ita nia an, no acompanha ita nia maun-alin na’in tolu ne’e, nebe ohin sama sira nia an hakarak la’o iha dalan Santidade ida ne’e, atu liu husi sira nia moris santo sira mos bele lori joven no sarani barak liu tan ba sai santo iha ita nia uma creda.

Leave a Reply

Your email address will not be published. Required fields are marked *