shadow
Diocese de Dili > NOTÍCIAS > LETURA DIÁRIA > I Domingo Iha Tempo Advento (ANO C)

I Domingo Iha Tempo Advento (ANO C)

Primeira Leitura                                                                                                                                                                       Jer. 33, 14-16

Lia housi Livro profeta Jeremias:

Na’i lia tun nune’e: “Sei to’o loron nebé ha’u sei halo tuir liafuan nebé ha’u hakotu ona ho uma-kain Israel no uma-kain Judá. iha loron hirak nebá, tempo nebá, ha’u sei fo ba David, oan ida, justiça na’in. Oan ne’e sei tahan ema nia direito; Oan ne’e sei hatudu dalan lós iha rai-klaran. Iha loron hirak nebá, tempo nebá, Judá sei hetan Maksoyn, Jerusalém sei moris ho hakmatek, ema sira sei hanaran: “Javé, ami nia justiça na’in”.

Maromak Futar Lia.

 

Salmo Responsorial                                                                                                                               Sal. 24(25) 4bc-5ab, 8-9, 10, 14

Refrão : Na’i, ba Ita boot ha’u klamar hasa’e!!! Repete-se

Hatudu mai ha’u, dalan inan

Dalan inan dalan ikun.

Dada ha’u hanourin tuir Ita lialós,

Tan ita Maromak ha’u Maksoyn.

Nai laran luak, tesi lialós,

Tan ne’e, hatudu dalan lós ba maksalak sira. Refrão

 

Dada kiik sira tuir justiça,

Hanourin ki’ak sira tuir nia dalan.

Na’i nia dalan tomak mesak domin, mesak lialós,

ba sira moris tuir Ni alia moruk, tuir Nia ukunfuan. Refrão

 

Ba ema hamta’uk Nia, hatudu nia laran,

Hatudu lia moruk. Refrão

 

Segunda Leitura                                                                                                                                                                   Tes. 3, 12-4, 1-2

Lia housi São Paulo nia surat ba ema sira iha Tessalónica:

Maun-alin sira: Ba imi, ami hakarak atu Maromak halo imi hadomi malu, no fo laran di’ak tebes ba ema tomak nu’udar ami hadomi imi no fo laran ba imi. Ami hakarak, atu Na’i Maromak hametin imi nia laran, halo imi laran ho neon mós to’o rohan, iha Maromak ita Aman futar oin, iha loron ita Na’in Jesus Cristu fila hikas ho nia emar santo sira hotu. Maun-alin sira; ami husu, ami hameno ba imi, hodi Na’i Jesus Cristo nia naran, atu imi moris tuir liafuan nebé imi simu tiha ona housi ami kona ba lisan imi atu moris tuir, atu bele fo ksolok ba Na’i Maromak, nu’udar ami moris tuir daudaun ona. Imi sei haka’as –an atu la’o ba oin nafatin. Imi hatene ukun fuan, ha’u fo ona ba imi hodi Na’i Jesus Cristo nia naran.

Maromak Futar Lia.

 

Aclamação                                                                                                                                                                                    Sal. 84-85, 8

Refrão : Aleluia, Aleluia Aleluia!! Repete-se

Na’i, hatudu Ita laran luak mai ami,

Haraik mai ami Ita Maksoyn. Refrão

 

Evangelho                                                                                                                                                                       Lc. 21, 25-28. 34-36

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira dehan: “Sei mosu sinal oi-oin iha loron, iha fulan no fitun sira. Iha rai klaran sei mosu susar oi-oin ba nação hotu-hotu; nação sira sei hakfodak, tan tasi tarutu no si’ak teb-tebes; ho laran taridu, ema sira sei mate de’it tan la hatene lós sá ida mak sei mosu ba mundo, basá, lalehan nia kbiit sei nakdoko. Iha oras ne’e, mak ema sira sei haé Mane-Maksoyn tun mai ho kalohan ida ho kbiit no glória wa’in tebes. Wainhira buat hirak ne’e mosu daudaun, imi bele laran metin hodi foti matan ba leten, basá, libertação atu to’o daudaun ona. Neon  na’in, matan moris: Buka, atu imi laran keta todan resin tan hahalok aat, tan lanu, tan fo neon resin ba soin; buka, atu loron susar ne’e, keta toman sala imi, nu’udar hani ida, basá, susar ne’e sei kona ema hotu nebé moris iha rai klaran. Tan ne’e, neon moris hodi hamulak nafatin atu bele hetan kbiit hodi  dook tiha housi susar hotu atu to’o daudaun; nune’e, imi bele mosu ho laran metin iha Mane-Maksoyn nia oin.

Lia Maksoyn.

Leave a Reply

Your email address will not be published. Required fields are marked *