shadow
Diocese de Dili > NOTÍCIAS > LETURA DIÁRIA > Quarta-Feira, XXXIV Semana Tempo Comum (Ano B)

Quarta-Feira, XXXIV Semana Tempo Comum (Ano B)

Primeira Leitura                                                                                                                                                                     Ap. 15. 1-4

Lia housi Livro Apocalipse:

Ha’u, João, iha lalehan, ha’u haré sinal bo’ot no kmanek: anjo nain hitu lori susar bo’ot hitu ne’ebe ikus liu, basá sira ne’e hato’o ona Maromak nia laran nakali hotu. Ha’u haré tasi ki’ik hanesan vidro nakonu ho ahi, no besik tasi vidro ne’e mak sira hotu ne’ebe halo funu hasoru monstro hodi manan, no hasoru nia estátua no número ne’ebe hatudu nia naran. Sira hotu kaer harpa housi Maromak; sira hananu knananuk ida Moisés, Maromak nia atan, nian no Bibi oan nian dehan: “Na’i Maromak kbi’it wain, Ita bo’ot nia hahalok sira bo’ot no furak. Liurai nação sira nian, Ita bo’ot nia dalan sira lós teb-tebes. Oh Na’i, se mak la ta’uk no fó glória ba Ita bo’ot Nia naran? Basá, Ita bo’ot mesak mak santo, no nação sira hotu sei mai hodi hana’i Ita bo’ot tan hahalok justiça nian ne’ebe Ita bo’ot hatudu.”

Maromak Futar Lia.

 

Salmo Responsorial                                                                                                                Sal. 97(98).  1-3ab, 7-9(R. Ap. 15. 3b)

Refrão : Ita liman fatin, bo’ot no kmanek tebes, Na’i Maromak kbi’it na’in!!! Repete-se

Hananu ba Na’i knananuk foun ida, basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Na’i fó hatene Nia maksoin;

Nia hatudu justiça ba nação sira hotu.

Nia hanoin Nia domin no laran lós,

Ba Israel uman. Refrão  

 

Tasi halian no buat tomak iha tasi;

Mundo tomak no buat hotu be horik iha nia.

Mota sira basa liman ba,

No foho sira hotu hamutuk hananu ho ksolok. Refrão

 

Iha Na’i futar oin,

Be mai atu tesi lia ba mundo

Nia sei ukun ho justiça

No ukun povo hotu hanesan. Refrão

 

Aclamação                                                                                                                                                                                  Ap. 2. 10c

Refrão : Aleluia, Aleluia Aleluia!! Repete-se

Laran metin ba to’o mate no

Ha’u sei fó ba ó coroa moris nian. Refrão

 

Evangelho                                                                                                                                                                             Lc.  21. 12-19

Na’i Jesus Cristo nia Evangelho nu’udar São Lucas haktuir:

Iha tempo ne’eba, Jesus lia tun ba Nia escolante sira hodi dehan: “Maibe uluk liu buat ne’e hotu, ema sei kaer imi, sei haterus imi, sei lori imi ba sinagoga no hatama imi iha dadur laran. Ema sei saran imi ba Liurai no ema bo’ot sira tan Ha’u nia naran; no imi sei fó sasin. Ne’e duni, hametin imi laran hodi lalika hanoin uluk atu hatan oinsa; basá Ha’u sei fó ba imi lia no matenek, ne’ebe imi nia funu baluk sira hotu sei labele hatan tahan eh ko’alia hasoru. Imi nia aman inan, maun alin, parente no belun sira sei saran imi. Ema sei oho imi balun. Ema hotu sei ódio imi tan Ha’u nia naran. Maibe imi nia fuuk lahan ida mós sei la monu lakon. Ho paciência, imi sei soi imi nia klamar.”

Lia Maksoyn.

Leave a Reply

Your email address will not be published. Required fields are marked *