shadow
Diocese de Dili > NOTÍCIAS > LETURA DIÁRIA > Sexta-Feira, I Semana Iha Tempo Advento (Ano C)

Sexta-Feira, I Semana Iha Tempo Advento (Ano C)

Primeira Leitura                      Is. 29. 17-24

Lia housi livru Isaías nian:

Na’i Maromak lia tun nune’e: uitoan tan de’it ona, Líbano la’os atu sai jardim ida? Jardm ne’e la’os atu sai ai-laran ida? Iha loronn ne’eba, ema tilun diuk sira sei rona liafuan housi livro Maromak nian; sai tiha housi kalan no nakukun laran, matan delek sira sei haré.

Ema ki’ak sira sei haksolok fali iha Na’i. Sira be ki’ak liu iha ema sira le’et, sei haksolok iha Santo Israel nian. Ukun na’in laran áat sei la iha tan. Ema be toman hakribit maluk sira sei lakon mohu. Ema laran makerek sira sei la iha tan, ema ne’ebe hateten áat malu sei lakon tiha no sira be hanoin atu halo áat, sei mate hotu. Sira be, hodi liafuan, dada malu bab salan, sira iha odamatan oin buka halakon juíz, no sira be, tan buat folin laek, hasusar ema di’ak. Tan ne’e dun mak Na’i ko’alia nune’e ba uma kain Jacob nian, Na’i be haraik liberdade ba Abraão: “housi ohin ba oin, Jacob labele moe, nia oin la bele kamutis tan, basá wainhira nia haré iha nia oin sira Ha’u liman nia hahalok, nia sei dehan ha’u naran santo”. Sira sei fó hatene Jacob nia santo nia moris santo, hodi hamta’uk Israel nia Maromak. Sira be neon la metin, sei hetan matenek; sira bemamun hasoru, sei simu lia haklaken.

Maromak Futar Lia.

 

Salmo Responsorial                                                                                                                                               Sal. 26(27). 1, 4, 13-14

Refrão : Na’i mak ha’u nia roman no Maksoyn!!! Repete-se

Na’i mak ha’u roman no maksoin;

Ha’u sei ta’uk fali sé?

Na’i mak tahan ha’u nia moris;

Sé lós mak bele halo ha’u nakdedar? Refrão

 

Buat ida de’it ha’u buka hodi husu ba Na’i,

Horik iha Nia kadunan iha ha’u nia moris tomak;

Koko Na’i Nia graça

Hodi hateke ba Na’i Nia uma lulik. Refrão

 

Ha’u hein atu haré Na’i nia laran luak

Iha ema moris sira rain.

Aten barani! Hein iha Na’i!

Laran metin ba! Hein Na’i Maromak! Refrão

 

Aclamação                                                                                                

Refrão : Aleluia, Aleluia!! Repete-se

 Na’i sei mai ho kbi’it liurai.

Nia sei haraik roman ba Nia emar sira matan.

 Ou

Lalehan sira, haruka maha wen housi leten áas ba;

kalohan sira, fakar justiça tun mai; rai nakloke ba, halo mosu maksoin. Refrão

 

Evangelho                                                                                                                                                                                      Mt. 9.  27-31

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus liu daudaun, wainhira matan delek na’i rua la’o tuir Nia  hodi hakilar maka’as: “David nia Oan, sadia ami”.

Wainhira Nia tama tiha iha uma laran, matan delek sira hakbesik ba Nia. Jesus husu ba sira: “ Imi far katak Ha’u bele halo buat ne’ebe imi husu?” sira hatan: “Na’i ami fiar”. Ne’e duni, Jesus tau liman ba sira matan, hodi dehan: “sai diak fali ba tuir imi fiar”. Hafoin sira matan nakloke. Jesus lia tun ba sira: “Haré ba, ema ida la bele hatene buat ne’e!” Maibe, sai tiha, sira haklaken Jesus nia naran ba rai tomak ne’eba.

Lia Maksoyn.

Leave a Reply

Your email address will not be published. Required fields are marked *