shadow
Diocese de Dili > NOTÍCIAS > REFLEXÃO > II Domingo Advento Ano C

II Domingo Advento Ano C

Maun alin sarani doben sira, rona tiha Maromak ninia futar liafuan ita sente ba katak Maromak koalia duni mai ita iha tempo nebe naton atu oinsa ita halao ita nia moris ne’e ou oinsa ita tem que moris loro loron, liu liu iha tempo sira advento nian ne’e. Oras ne’e ita tama ona iha II domingo advento tinan C tuir tinan liturgico ba tinan ida ne’e. Tempo ida naton lolos atu ita fila ita nia oin ba Maromak no ba maun alin sira hodi buka atu moris nafatin iha dalan moris diak no los ida be ita hotu buka no Maromak rasik mos hakarak mai ita.

Tuir roman Maromak futar liafuan ba domingo ida ne’e Maromak husu atu durante tempo advento ne’e, liu liu iha semana ida ne’e ita buka hakasan atu hakribi salan, moris loos iha justiça, iha oração, iha laran metin hodi hahi hanai no adora lolos Maromak mesak ida deit. Nune’e wainhira Maromak nia maksoin to’o mai ita ita la lakon Maksoin ne’e maibe ita hetan duni Maksoin ne’e ba ita nia moris tomak.

Nundar ema sala nain São Lucas fo hanoin ita iha ninia evangelho katak ita percisa hakribit ita nia salan sira atu ita keta lakon Maksoin be mai husi Maromak. Hakribi salan mak dalan uluk liu nebe ita ema sala nain sira halo nundar hahalok preparação ida ita ida idak nian hodi ba hasoru Maromak ninia Maksoin nebe sei halo mai ita hotu. Hodi hakribi sala nune’e ita buka fila fali ba Maromak, loke fila fali ita nia neon no laran ba Maromak, hametin fila fali ita nia fiar no laran metin iha Maromak hodi hakasan lao fila fali iha dalan los ka dalan justiça Maromak nian.

Iha primeira leitura liu husi ninia profeta Baruuc Na’i Maromak convida ita atu ita buka haklean ita nia moris iha dalan justiça ka dalan los Maromak nian hodi nune’e ita bele moris ksolok lolos iha ita nia moris no ita nia rain ka ita nia cidade sai rain ou cidade ida justiça, dame no ksolok nian. Nia dehan “Keta laran susar …Falun o an ho Maromak ninia justiça…Nune’e Maromak sei hanaran fatin nebe o horik ba fatin justiça nia damen, domin nia nabilan.” Maun alin sira atu bele moris nune’e ita la halo mesak maibe ita tem que lao hamutuk nafatin ho Maromak iha ita ninia moris ne’e, basa justiça ka moris los, domin no dame ne’e Maromak nian, tan domin mai ita mak Nia haraik mai ita ema sira, laos ita ema sira nian. Ema hotu nebe buka justiça, buka dame, no domin maibe lao dok husi Maromak hodi hakas-an mesmesak deit sei la hetan, no nunca se atu hetan, maibe sira hotu nebe buka no lao hamutuk ho Maromak hodi tau fiar no laran metin iha Maromak sei hetan justiça no moris justo, sei hetan dame no sei moris dame, sei hetan domin no moris nakonu ho domin nafatin. Na’i Maromak be justiça, dame no domin nain no hun mak koalia no realiza duni ida ne’e iha ema nia an wainhira ema ne’e fiar hodi moris tuir Maromak ninia futar liafuan sira. Maromak hatudu momos tiha ona ida ne’e mai ita iha ita nia experiência ba domin, dame no justiça ne’e.

São Paulo iha segunda leitura hateten katak ita ninia relaçào ida be hari metin nafatin ba nafatin ho Maromak mak sei garante moris ida nune’e mai ita. Relação ne’e ita hari iha ita nia oração sira. Iha ita nia oração nebe laos halo deit iha momento balun, laos halo deit iha momento ita iha susar laran ka iha momento ita percisa, laos halo deit iha tempo sira nebe ita kuran ba domin, dame no justiça maibe ita nia oração nebe ita halao nafatin iha momento, iha tempo, iha fatin no iha sircumstãncia hotu hotu. Hodi halo oração nune’e mak Maromak horik hamutuk nafatin ho ita, Maromak halo hamutuk ho ita buat sira nebe ita halo loro loron, Maromak tulun nafatin ita iha tempo nebe ita fraco, iha tempo nebe ita susar no hakonu duni ita nia moris ho domin, dame no justiça.

Maun alin sira oração sai moris ida nebe fundamental no essencial tebes iha ita ema sarani sira nia moris iha buat hotu nebe ita halo. São Paulo dehan tan katak ita  precisa harohan ka halo oração nafatin iha kalan ka iha loron atu nune’e ita bele hakonu nafatin ita nia uma laran ho Maromak ninia domin no Maromak ninia justiça hodi nune’e ita mos bele hetan kbiit hodi bele hatene didiak buat sa mak diak no los liu hodi bele mos hatene hakribit ita salan, bele hadomi lolos no moris tuir lolos dalan moris justiça nian be ikus mai bele lori ita ba to’o iha Cristo ninia justiça be maksoin lolos mai ita nia moris.

Maun alin sira, ohin Maromak halo ita conciente ho situação moris be ita moris hela dadaun ba, katak fulan sira ikus ikus ne’e ita sente duni lakon ba domin, dame no justiça iha ita nia cidade ne’e ou iha ita nia comunidade nia laran. Ita lao dook tebes husi justiça Maromak nian nebe haraik tiha ona mai ita hodi halo salan hasoru Maromak no maun alin sira iha ita ninia hahalok sira be nakonu ho violência no terror.

Oras ne’e iha tempo Advento ida ne’e mai ita hakribit hotu ita nia salan sira ne’e hodi fila ita oin, fila ita nia neon no laran, ita nia fuan ba Maromak hodi moris buka fo perdua ba malu nundar Maromak perdua ona ita. Atu nune’e ita hotu ho Maromak nia tulun hamutuk bele hahu moris fali iha dalan los dalan moris los ka moris justiça, moris nakonu ho damen mai ita ida idak nia-an, mai ita nia familia, mai ita nia comunidade no ita nia cidade. Amen.

Bidau, 09. 12. 2018

Pb.

Leave a Reply

Your email address will not be published. Required fields are marked *