shadow
Diocese de Dili > NOTÍCIAS > LETURA DIÁRIA > II Domingo Iha Tempo Advento (ANO C)

II Domingo Iha Tempo Advento (ANO C)

Primeira Leitura                         Bar. 5, 1-9

Lia housi Livro Profeta Baruc

Jeruslém, hasai metan! Keta laran susar! Hafoun-an nafatin hodi murak Maromak nian! Falun-an ho Maromak nia justiça! Tau iha ó nia ulun Maromak nia ulu-suku mean. Na’i Maromak sei hatudu ó nia naroman ba sasán tomak iha lalehan okos. Na’i Maromak sei hanaran ó fatin nune’e: “Justiça nia damen! Domin nia nabilan!” Jerusalém, hamriik! Sa’e ba aas, hateke ba loron-sa’e; haré ó nia oan sira libur hamutuk housi loron-monu to’o loron-sa’e, tan Maromak hakarak sira haksolok tebes, tan Maromak hanoin tebes sira. Wainhira sira hadook-an housi ó, funu-baluk sira lulun hotu sira, halo sira la’o de’it. Maibé, oras ne’e, Na’i Maromak lori sira fila hikas ba ó, basá, Maromak hakarak hatun foho tuan sira, áas no badak: hatetuk rai klean sira, hodi halo rai sai tetuk hotu, atu Israel bele la’o di’ak to’o Maromak nia Reino, tan Maromak hakarak. Ai-laran no abat sira sei fó mahan ba Israel. Basá, Maromak rasik mak sei hatudu dalan ba Israel ho ksolok no kbiit wa’in, tan Maromak laran luak no justiça na’in.

Maromak Futar Lia.

 

Salmo Responsorial                                                                                                                             Sal. 125 (126) 2ab, 2cd-3, 4-5, 6

Refrão : Na’i halo kmanek oi-oin ba nia povo!!! Repete-se

  • Wainhira Maromak halo Israel oan sira fila hikas,

          ami haré hanesan mehi ida,

          ibun ami hamnasa, liana mi hananu. Refrão

 

  • Ema seluk hawelok haksolok,

          Na’i halo kmanek oi-oin ba sira.

          Tebes duni, iha ita leet Na’i nia kmanek oi-oin,

          tan ne’e ita hawelok haksolok. Refrão

 

  • Na’i, halo fila hikas ami dadur oan nu’u

          Wé-inan Negueb suli to’o ami;

          sé ho kolen tau fini ba rai,

          haksolok sei sohi ho hananu. Refrão

 

  • Nu’u sira tatanis lori mutuk sira fini,

          fila fali ho ksolok hatiu rai fulin. Refrão

 

Segunda Leitura                                                                                                                                                                    Flp. 1, 4-6, 8-11

Lia housi São Paulo nia surat ba ema sira iha Filipos

Maun-alin sira: Kalan-loron ha’u hamulak, ha’u hanoin nafatin imi, basá, houri uluk to’o horas ne’e, imi tulun nafatin ha’u haklaken Lia-Foun. Ha’u fiar katak; tan Maromak hahú ona halo di’ak ba imi, Nia sei lori to’o rohan, to’o Na’i Jesus Cristo nia loron. Na’i Maromak hatene katak ha’u hanoin tebes imi hotu nu’udar Na’i Jesus Cristo rasik hanoin imi. Tan ne’e, ha’u harohan ba Maromak atu imi hatene hadomi malu ho neon maka’as liu tan, atu imi bele fihir buat sá di’ak liu; nune’e, imi laran sei metin no mós duni to’o Cristo nia loron imi sei hetan rahun di’ak mai housi Jesus Cristo nia justiça atu hahí no hana’i Maromak.

Maromak Futar Lia.

 

Aclamação                                                                                                                                                                                            Lc. 34, 6

Refrão : Aleluia, Aleluia! Repete-se

                  Hadi’a Ita Na’in Jesus Cristo nia dalan, halós nia dalan inuk,

                  criatura tomak sei haré Maksoyn mai housi Maromak. Refrão

 

Evangelho                                                                                                                                                                                            Lc. 3, 1-6

Na’i Jesus Cristo nia Evangelho nu’udar S. Lucas haktuir:

Imperador Tibério ukun liu tinan sanulu resin lima, wainhira Pôncio Pilatos mak emboot iha rai Judeia, Herodes, liurai iha rai Galileia, Filipe, Herodes nia alin, liurai iha rai Itureia no Traconítide, Lisânias, liurai iha rai Abilena, wainhira Anás no Caifás mak hela hanesan ulun sacerdote sira nian. Na’i Maromak lia tun ba João, Zacarias nia oan, iha rai fuik maran. Hafoin, João la’o lemo rai tomak mota Jordão nian, hodi fo hatene sai ba ema hotu atu hakribit salan, hodi hetan perdua, nu’udar Profeta Isaías hakerek ona iha Escritura, dehan: “Lian ida mai housi rai fuik maran: Hadi’a Na’i nia dalan, Halós Na’i nia dalan inuk! Taka rai klean hotu! Hatun foho tomak, áas no badak! Dalan kleuk sei lós! Dalan aat seu tetuk hotu! Hafoin, criatura tomak sei haré Maromak nia Maksoyn.

Lia Maksoyn.

Leave a Reply

Your email address will not be published. Required fields are marked *