shadow
Diocese de Dili > NOTÍCIAS > LETURA DIÁRIA > Segunda, II Semana Iha Tempo Advento (Ano C)

Segunda, II Semana Iha Tempo Advento (Ano C)

Primeira Leitura                    Is. 35. 1-10

Lia housi livru Isaías nian:

Rai fuik maran no rai kles imi haksolok ba. Haksolok ba hodi fó funan rai tetuk maran, taka áan ho aifunan hanesan narciso; hahi haksolok hanesan ema foun.Nia simu glória Líbano nian, roman Carmelo no Sáron nian. Sira sei haré Na’i Nia glória, imi Maromak nabilan. Halo maka’as fali liman sira be kole, fó kbi’itn ba ain tur be nakdedar. Sei dehan ba fuan sira be taridu: “Barani! Keta ta’uk. Imi nia Maromak besik mai ona! Nia hi’it áan mai tesi lia lós, Nia Maromak be haraik kolen. Nia rasik mai soi imi”.

Iha loron ne’e, matan delek sira matan sei nakloke; tilun diuk sira sei rona mós; ema ain kudeik sira sei haksoit hanesan rusa, ema monok sira nanal sei hananu ho ksolok. Wé sei moris ihan rai fuik maran, wé inan sei suli iha rai tetuk maran; rai maran dekor sei sai hanesan kolan ida, rai kmarak lós sei nakfilak ba wé matan. Iha asu fuik sira subar fatin, sei burak onu no soko. Dalan ida sei terik rai fuik; ne’ebe ema sei hanaran dalan lulik; ema laran fo’er sei la liu housi nia, sira ne’ebe matan foun, sei lakon. Iha dalan ne’e, sei la iha asu fiuk leão, badala siak sira sei la liu housi ne’eba. Housi nia, sei la’o ema sira be hetan ona maksoin; hafoin sei fila fali sira ne’ebe Na’i hasai housi dadur laran. Sira sei to’o iha Sião ho hananu no hakilar haksolok; sira oin nabilan ho ksolok rohan la’ek. Neon contente no laran ksolok mak sei ukun; terus no halerik sei lakon.

Maromak Futar Lia.

 

Salmo Responsorial                                                                                                                            Sal. 84(85). 9ab-10,  11-12, 13-14

Refrão : Ita Nia Maromak hi’it áan mai soi ita!!! Repete-se

  • Ha’u rona lia ne’ebe Na’im hateten;

          Maromak haklaken hakmatek.

          Nia maksoyn besik ba ema hamta’uk Nia

          Nia glória sei horik iha ita rain. Refrão

 

  • Laran mós no domin sei hetan malu,

          justíça no hakmatek hakleher malu.

          Housi rai sei mosu laran mós,

          Justíça sei hakruuk housi lalehan. Refrão

 

  • Na’i sei haraik buat ne’ebe di’ak;

          Ita rain sei fó fuan.

          Justíça sei la’o iha Nia futar oin

          Paz sei la’o tuir Nia ain fatin. Refrão

 

Aclamação                                                                                                

Refrão : Aleluia, Aleluia!! Repete-se

                  Liurai hi’it áan mai daudaun, Na’i rai hotu nian,

                  sei hasai ita nia naha todan atan nian. Refrão

 

Evangelho                                                                                                                                                                                        Lc. 5, 17-26

Na’i Jesus Cristo nia Evangelho nu’udar São Lucas haktuir:

Iha tempo ne’eba, loron ida, Jesus sei hanorin daudaun, fariseu no doutor lei nian balun mos iha ne’eba. Sira mai housi knua tomak Galileia, Judeia no Jerusalém nian. Na’i nia kbi’it iha ne’eba atu Jesus halo di’ak ba moras sira. Ema balu mosu mai, lori iha hadak laran ema ida ain no liman tós; sira buka hatama nia hodi tau nia iha Jesus futar oin. Tan sira la hetan fatin atu bele tama ba laran,n basá ema barak, sira sa’e ba umam leten hodi hatun nia ho nia biti housi kakuluk nia le’et, mai iha ema sira klaran, iha Jesus futar oin. Wainhira haré ema sira ne’e nia fiar, Jesus lia tun ba ema ne’e. “Belun, ó hetan perdua ba ó salan|”. Escriba no fariseu sira hahu mumuk dehan: “Ema ne’e sé lós; nia hateten hasoru Maromak? La Maromak karik, sé mak bele perdua salan? Maibe Jesus hetene tiha sira nia hanoin, Nia hahu dehan ba sira: “Imi hanoin sá lós iha imi laran? Ida ne’ebe mak susar liu atu hateten: “ó hetan perdua ba ó salan”, ka hateten: ”ó hamriik hodi la’o?” ne’e duni, atu imi hatene katak mane maksoin iha rai klaran iha kbi’it atu perdua salan, Ha’u haruka ó”, Nia lia tun ba ema ain no liman tós: “hamriik ba, kaer ó nia biti, la’o ba ó nia uma”. Ema moras ne’e hamriik kedas iha sira hotu nia oin, kaer ba biti ne’ebe nia uluk latan ba, la’o ba uma  hodi fó agradeçe ba Maromak.

Ema hotu hakfodak, hahi Na’i Maromak. Sira hamta’uk wa’in tebes hodi dehan: “Ami haré ohin buat foun mesak kmanek!”.

Lia Maksoyn.

Leave a Reply

Your email address will not be published. Required fields are marked *