shadow
Diocese de Dili > NOTÍCIAS > LETURA DIÁRIA > Quarta-Feira, II Semana Iha Tempo Advento (Ano C)

Quarta-Feira, II Semana Iha Tempo Advento (Ano C)

Primeira Leitura                                                                                                                                                                         Is. 40. 25-31

Lia housi livru Isaías nian:

Maromak Santo lia tun: “Imi hakarak tanesan Ha’u ba sé lós? Foti matan ba lalehan hodi haré didiak! Sé lós halo fitun sira ne’e? ida ne’ebe halo sira la’o tuir ordem hodi bolu sira tomak ho idak-idak nia naran. Nia kbi’it makas no ukun bo’ot duni; la iha sira ida la halo tuir Nia ordem. Jacob, tansá ó dehan, Israel, tansá hateten: “Na’i la hatene ha’u nia destino, ha’u nia Maromak haluha tiha ha’u nia direito?”

Maibe ó la hatene buat ne’e? ó la rona nia hateten? Na’i mak Maromak ida rohan la’ek, halo ona rai housi ikun to’o ulun. Nia la baruk, la kole, Nia matenek rohan la’ek, Nia haraik kbi’it ba ema kbi’it la’ek; ema ne’ebe fraco, Nia halo sai forte. Klosan sira sai baruk no kolen, ema bo’ot sira mós lakon sira kbi’it. Sira be hein Na’i, hetan kbi’it foun. Sira loke sira nia liras hanesan manu makikit sira. Sira halai maka’as , la kole; sira la’o, iis la kotu.

Maromak Futar Lia

 

Salmo Responsorial                                                                                                                                    Sal. 102(103). 1-2, 3-4, 8, 10

Refrão : Ha’u klamar hahi Na’i!!! Repete-se

  • Ha’u klamar hahi Na’i,

          Ha’u áan tomak haklaken Nia naran santo.

          Ha’u klamar hahi Na’i,

          La haluha nia kmanek. Refrão

 

  • Nia perdua ó salan tomak,

          Nia sadia ó nia áat hotu.

          Nia soi ó nia moris housi rate,

          Hafutar ó moris ho tulun no domin. Refrão

 

  • Na’i laran luak, laran maus,

           Kleur atu hirus, laran luak tebes;

           La haré áat ita tan ita salan,

            Nia la fó todan mai ita tuir ita salan. Refrão

 

Aclamação                                                                                                 

Refrão : Aleluia, Aleluia!! Repete-se

                  Na’i Nia loron besik ona;

                  Nia mai atu soi ita. Refrão

 

Evangelho                                                                                                                                                                                    Mt. 11. 28-30

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus lia tun nune’e: “Imi mai ha’u, imi hotu be kole no lori naha todan, Ha’u sei kasu imi nia naha. Imi simu Ha’u nia ai dadur iha imi nia kbás hodi hanorin áan housi Ha’u, tan Ha’u laran maus no haraik áan. Imi sei hetan ksolok ba imi nia klamar, tan Ha’u Nia ai dadur mamar; Ha’u nia naha kma’an”.

Lia Maksoyn

Leave a Reply

Your email address will not be published. Required fields are marked *