shadow
Diocese de Dili > NOTÍCIAS > LETURA DIÁRIA > Sexta-Feira, II Semana Iha Tempo Advento (Ano C)

Sexta-Feira, II Semana Iha Tempo Advento (Ano C)

Primeira Leitura                                                                                                                                                                          Is. 48. 17-19

Lia housi livru Isaías nian:

Na’i, ó nia maksoin, Santo Israel nian, lia tun nune’e: “Ha’u mak Na’i, ó nia Maromak, ne’ebe hanorin ó hetan rahun di’ak, ida be dada ó kona ó dalan atu tuir. Oh! Ó tuir karik Ha’u hakaran, ó nia rahun kmanek sai wa’in hanesan mota bo’ot ida; ó nia ksolok sai wa’in hanesan laloran tasi nian! Ó nia derasaan sai ema barak hanesan rai henek, ó nia bei oan sira sai wa’in hanesan rai henek musan sira. Ó nia naran ema ida sei la hasai,la lakon housi Ha’u nia oin.

Maromak futar lia.

 

Salmo Responsorial                                                                                                                                                          Sal. 1. 1-2, 3, 4, 6

Refrão : Na’i, ema be tuir Ita, sei la’o iha roman moris nian. Repete-se

  • Ksolok ba ema ne’ebe la tuir ema áat nia lia,

           La tuir dalan maksalak.

           Ksolok ba sira be la hadulur ho ema áat.

           Maibe haksolok ho Na’i Nia ukun fuan,

           Hodi hanoin  nia kalan loron.  Refrão

 

  • Nia hanesan ai kudan ida iha wé inan ninin;

          Nafuan tuir nia tempo, nia tahan la namlaik,

           Buat hotu ne’ebe nia halo, sai di’ak de’it. Refrão

 

  • Maibe, ema áat sira nia moris oin seluk,

           Sira hanesan háre kain be anin lori.

           Na’i hatene ema lós nia dalan,

           Dalan ema áat sira nian, lori ba rahun áat. Refrão

 

Aclamação                                                                                                

Refrão :  Aleluia, Aleluia!! Repete-se                                                                       

                   Na’i besik ona, sai ba hasoru Nia.

                   Nia mak liurai oan dame nian. Refrão

 

Evangelho                                                                                          Mt. 11. 16-19

Na’i Jesus Cristo nia Evangelho nu’udar São Mateus haktuir:

 Iha tempo ne’eba, Jesus lia tun ba ema lubun bo’ot: “Ha’u sei tanesan ema derasaan ne’e ba sé lós? Nia hanesan labarik sira be tur iha luron ninin ne’ebe soe lia ba malu, dehan: “Ami huu kfui ba imi, maibe imi la dansa; ami hananu knananuk taska metan nian, maibe imi la tanis”.

João Baptista mai tiha, la han, la hemu, sira dehan: ‘Demónio iha nia laran’. Mane maksoin to’o tiha, han no hemu, sira dehan: ‘Nia kanten no lanu ten, publicano no maksalak sira belun! Maibe Maromak nia matenek mosu mai duni ho Nia hahalok”.

Lia Maksoyn.

Leave a Reply

Your email address will not be published. Required fields are marked *