shadow
Diocese de Dili > NOTÍCIAS > OPINIÃO > NATAL : MAROMAK MAI HASORU MALU HO EMA

NATAL : MAROMAK MAI HASORU MALU HO EMA

Natal nu’udar econtro domin ida entre ita ema ho Maromak. Nia nebe iha leten-as ba tun mai koko realidade ita ema nian, hasoru malu ho ita no koalia husi fuan ba fuan.

            Natal ne’e moris ida nebe lori moris foun no precisa celebra. Tamba nee mak natal sempre lori ksolok, dame, no liberdade. Experiencia konaba moris no moris foun hanorin ita valor ruma nebe ita precisa agradece tamba Nai haraik mai ita gratis. Nu’udar ema sarani Catolica, Natal katak sa?

Ema barak mak haluhan katak Natal nu’udar loron moris Jesus nian. Hanesan komik witoan wainhira tinan tinan ita repete koalia hela deit konaba Natal, maibe importante duni atu koalia nafatin tamba iha situacao mundo ohin loron, ita ema precisa moris foun. Iha parte seluk mos tamba natal quase lakon nia sacralidade hodi sai fali evento commercial, iklan consumerismo, sibuk ba mai, enfeites oi-oin nebe nabilan husi uma laran ba to’o loja sira, maibe ita ema nia fuan nafatin mamuk. Ema hot-hotu koalia konaba Natal, no ema sira nebe la fiar Jesus Cristo mos envolve iha evento ne’e ho preparação oi-oin, maibe barak mak la compreende katak Natal ne’e lalos presepio mamuk maibe Jesus nebe mai moris iha espaço de tempo ida nuudar ema iha rai Belem. Moris ida ne’e mak ita ema cristão celebra nuudar Aniversario boot husi ita nia Maksoyn maibe dala barak presepio nebe simples iha Belem sai tiha fatin lakan nabilan nebe nakonu ho papai Noel, ema han hemu too lanu didiak, fatin atu ema loke musica profano sira no seluk seluk tan, joga, dança, dahur no ikus mai remata ho conflito.

Ema barak mak preocupa teb-tebes ho Natal, hahu husi kiak ba to’o ema nebe riku teb-tebes, fakar osan hodi sosa enfeites oi-oin, roupa nebe modelo foun, sapatu nebe nabilan, ou hahan nebe saboroso maibe fuan nafatin dok malu, ema odio malu, trata aat malu, naok, bosok, halo corupção, no to’o oho malu, naiulun sira laiha unidade, jovem sira laiha dame, crise acontece iha aspecto hotu-hotu tamba labele koko Jesus nia Moris, la sente Natal nia furak. Será que soy duni ba ita atu celebra Natal iha rai Timor?

Wainhira reflete konaba realidade hirak ne’e, hamosu iha hau nia hanoin konaba moris nebe hanesan “viagem criminal” nebe naruk. Tamba sa? Iha moris lor-loron, wainhira ita hakas-an atu sente moris nia furak, sempre mosu realidade rua nebe paradoxal no susar atu ita halai ses. Realidade rua ne’e mak ida nebe fo segurança no ita nebe hamosu tauk.

Ita sente dame wainhira situação diak, hakmatek, iha unidade, iha serviço hamutuk no hadomi malu. Maibe ita mos sente tauk wainhira mosu situação odio, conflito, laran moras, bosok, hirus malu, funu no seluk-seluk tan. Parece que ita nia moris ohin loron domina teb-tebes ho situação tauk doque seguro. Tamba ne’e mak hamosu reflexão katak ita celebra natal maibe iha mos acontecimento iha ita nia moris nebe “ho oin criminal no ho hahalok criminoso”. Iha criminal politica, criminal economia, criminal tecnologia, criminal social etc, nebe hatudu ita ema nia fraqueza hodi lakohi husik Maromak atu ukun ita maibe uza fali ita nia egosime atu domina malu. Wainhira egosime mak domina ita mak ita nia moris sei sai nafatin nu’udar “viagem criminal” nebe naruk no laiha rohan. No se karik nune’e, religião Catolica mos sei lakon nia sentido ba ita nia moris, maske Religião nuudar meios atu bele orienta ita ema lao tuir ita nia consciencia hodi ba To’o ita nia Criador.

Realidade hirak ne’e hatudu katak ita ema seidauk compreende lolos significado husi Natal ou bele dehan mos katak buat hirak temi iha leten expressa ita ema nia fuan nebe continua mamuk, tamba la fo fatin ba Maromak atu bele moris iha neba, maibe ita hakarak sai Herodes nebe hamate moris no hakarak compete ho Maromak atu ukun.

Ita consciente ka lae, experiencia Jesus nian nebe la hetan fatin atu moris sei repete nafatin iha ita nia tempo, e sai aat liutan. Nai Maksoin nebe halo aniversario ba dala 2018, ita haluhan tiha, soe tiha ba kotuk ka ita uza deit nuudar mascra ka ‘topeng’ atu bele satisfaz ita ema nia desejo.

Iha natal ema bele lakon buat hotu, menus deit lakon nia tempo hodi hakat ba Igreja atu agradece ba moris nebe Maromak haraik ba nia iha tinan tomak. Indiferenca fiar sei dificulta liu tan ita ema nia moris tamba ita sente buat hotu iha moris ne’e bai- bain deit hodi dehan “U boot”. Ita nia liafuan sira nunee mos bele expressa ona ita ema nia mentalidade relaciona ho ita nia fiar, katak, ita lakohi depende tan ba Maromak.  Claro que Jesus la precisa presente nebe furak husi ita maibe nia precisa ita nia fuan.

Natal mos nuudar celebracao familia nian. Iha natal ita celebra ita nia relação nu’udar familia universal no fahe experiencia konaba domin no fraternidade. Tamba ne’e mak ambinte familiar nian sai forte liu tan iha tempo natal iha nebe ema halibur malu hodi celebra hamutuk.

            Iha natal ita mos celebra moris foun iha Jesus basa Maromak salva ta housi atan sala nian. Maksoin ne’e nafatin moris lor-loron, tamba ne’e mak natal lolos ne’e ita celebra lor-loron ka natal diário lalos natal annual ka tinan nian. Jesus nafatin moris lor-loron ho maneira oi-oin, experiencia oi-oin, iha ema no situacao oi-oin. Jesus nafatin moris iha ema kiak, simples, iha crise politica nebe naruk, iha avanços comunicação no tecnologia nebe domina ema, iha familia nebe fahe malu, iha jovem nele lakon esperança no iha realidade hot-hotu.

Natal lori it aba halo viagem nebe naruk hanesan ho liurai nain tolu. Visita husi Liurai nain tolu ba Belem hodi hasoru malu ho Jesus nebe moris iha neba, marca significado nebe boot ba sira nia moris, nebe mak halo sira brani fila hikas ba sira nia rai tuir dalan seluk, lalos dalan nebe bai-bain sira lao ona. Significa katak, ita nia encontro ho Maromak tenki lori transformação ka metanoiaiha situação hot-hotu. Ne’e la significa katak moris ida uluk nian la serve ka laiha folin maibe nia sempre sai nu’udar mestre nebe hanorin ita atu moris diak liu tan iha futuro. Encontro nebe lolos ho Nai Jesus Cristo bele renova ita ema nia moris basa experiencia Maromak nian sei la repete ho maneira nebe hanesan.

Ita ema sempre bele sai foun fila fali, no nafatin simu convite atu lao tuir Estrada foun, moris foun, nomos Maromak nia acção nebe foun.

Ita ema cristão nia moris depois de Natal, labele hanesan deit ida uluk nian basa, Jesus rasik mai hola isin hanesan ho ita atu hatudu dalan oinsa bele luta ba moris santidade nian. Ho haksolok ita bele sente iha ita nia moris katak buat foun acontece duni ba ita tamba Jesus moris iha ita nia le’et nuudar EMMANUEL.

Novidade ne’e lalos tamba deit ita repete celebra festa natal tinan-tinan, maibe liu-liu situação moris foun nebe ita enfrenta. Tamba ne’e mak ita precisa hakonu-an fila fali ho energia foun no fo significado ba ita nia kna’ar sira iha Igreja no sociedade. Se wainhira celebração Natal la contribui buat foun ba ita ita nia compromisso ho Jesus Maksoin no nia Evangelho, ne’e significa katak natal la acontece ba ita nia moris. Novidade ka buat foun ita sei hasoru iha ita nia viagem ba belem fuan nian, kadi fila fali ita nia cosciencia hodi la sai Herodes ba malu maibe sai netik bibi-atan ka anjo nebe lori liafuan ksolok.

Salmista reza ho fiar tomak:”Nai hatudu nia salvação, no nia hatudu justiça iha povo sira oin” (Sl 98,2).

Celebração natal nian fo hanoin mai ita konaba misterio ne’e, nomos lori ita ba simu convite ida, nebe sempre foun atu bele lao ba Belem, hasoru malu ho Menino Jesus.

Nia deit mak bele muda situação nakukun sala nian ba ksolok salvação nian. Nia mak bele hamos ita nia todan sira tamba sala nebe ita halo no hari’i fila fali moruk foun ida entre ita ema ho Maromak. Noticia ksolok ne’e mak merece duni atu ita celebra iha loron natal basa, Maromak rasik rona ita ema nia halerik, nia tun mai no muda ita ema nia historia ba nafatin.

Iha tempo natal mos, ita hetan oportunidade atu renova hikas ita nia compromisso missionario no apostólico hodi brani haklaken hanesan Anjo no Bibi Atan sira. Tempo atu ita bele hasoru hikas ita nia sentido moris nebe klean nu’udar ema sarani. Ne’e hotu husu mos ita ema nia fuan nakloke atu husik buat hotu nebe la garante ita nia felicidade iha mundo no lalehan. Katak, ita precisa esforço-an hodi husik moris nebe tuan no hari’i moris foun nebe metin iha fatuk inan mak Maromak.

Natal lori it aba reflete ita nia papel nuudar bibi atan sira iha kalan natal. Ita hatene katak bibi atan hirak nebe hare Maksoin, mesak ema simples no ema Judeu sira ladun fo importancia ba sira, maibe sira sai sasin primeiro ba Maksoin nebe mai moris iha bibi luhan” (Lc 1,12). Hanesan Nain feto nebe ba lalais servi nia prima Isabel iha foho, nune’e mos bibi atan hirak ne’e la lakon tempo hodi halai lalais ba hasoru Maksoin iha Belem, hodi fiar katak buat hotu sai tuir lolos saida mak Anjo fo sai ba sira.

Nuudar ema cristão, Ita mak bibi atan sira nebe tau ain iha dalan nakukun, ho ajuda husi fitun naroman hodi ba buka  Menino Jesus, ita nia Maksoin nebe moris dook husi palacio no templo Jerusalem. Manjedoura ka balada han fatin nebe enfeita ho duut, kiak, iha bibi luhan, foer no dois nuudar simbolo husi realidade mundo ohin loron nian nebe make ma barak sei moris kiak no mukit, laiha ai-han, laiha ema atu tau matan, terus ba necessidade hot-hotu. Ohin loron, Ita mak sai nuudar bibi atan hodi ba buka sira, liu-liu ba kiak sira nebe ‘Herodes’ barak iha tempo moderno nian buka atu hamate.

Laiha buat seluk nebe mak bele fo coragem mai ita nia viagem iha mundo ne’e; somente domin deit mak bele transforma buat hotu. Tan domin nebe extremo no radical husi Maromak ba ita mak Nai Jesus ita nia Mestre nebe mai moris nu’udar ema, hodi hatudu mai ita dalan ba to’o Maromak.

Reflexão ne’e lori hau ba imajina katak dalan ba Belem lalos dalan nebe facil maibe kleuk no dificil. Tamba sa? Ita hatene katak dala barak, iha fim do ano sai nu’udar tempo nebe ita preocupa liu, sente kolen ho serviço nebe tenki halo hotu, no laiha momento diak atu bele expressa ita nia espiritulidade nebe klean. Preparação ba celebração natal nian ladun hatudu nia sentido trancedental maibe nakonu ho propaganda profana nebe mak ema barak buka lucro ba moris diak mundo nian. Familia sira quase gasta osan no tempo atu prepara buat nebe superficial, hatasi nebe furak, presepio modern nebe nabilan maibe haluhan atu hafoun-an ho sacramento sira. Buat barak iha moris nebe mak dificulta ita ema nia vivencia moris espiritual hodi la hetan significado klean husi natal. Ho realidade hirak ne’e mak maske ita lakon tempo, lakon osan no gasta energia atu celebra natal maibe la fo impacto positivo ba moris iha tinan foun. Buat hotu lao normal no ema sente bai-bain deit, hanesan karik ita la halo viagem durante semana haat ba hasoru Nai Maksoin iha Belem fuan nian.

Ita bele husu ba ita nia-an, se los mak bele sai nuudar fitun hodi hatudu dalan ba Belem?

Mosu perguntas ida mos ba ita, salos mak ita sei halo? Ita bele sura ita nia serviço, sucesso riku soin no buat seluk tan nebe ita consegue halibur iha tinan 2018. Maibe será que ita hetan duni sentido husi natal ba ita nia moris?

Jesus rasik mak hatudu dalan, basa nia mak EMMANUEL, presente iha ita nia moris, mai hasoru malu ho ita hodi hase’e mos ita hanesan nia dehan ba Marta: “o la hakmatek liu no preocupa ho buat barak. Maibe buat ida deit mak folin liu…Maria hili parte nebe diak liu…”(Lc 10,38-42). Nuuar ema sarani, dalan atu ba to’o Belem mak ita hetan iha sacramento sira liu-liu Eucaristia. Ita precisa duni conhece no simu saida mak celebra iha liturgia no proposta ba moris nuudar comunidade cristão.

Reflexão konaba misterio da encarnação lori ita ba toma consciencia konaba cidade Belem, uma pão nian, basa Jesus moris iha fatin ne’e hodi sai ai-han ba nia emar sira. Iha Belem ne’e mak povo halo nia viagem, lori nia ksolok no susar ba oferece iha Maksoin nebe mai moris simples. Ita bele dehan katak Belem mak uma ai-han, fatin nebe Maromak rasik hakarak sai solidario ho ema kiak sira no convida ita atu bele ba descobre ita ida-idak nia belem, ita nia realidade kiak, mukit, terus no todan lor-loron nian.

Ita bele halo perguntas konaba saida mak fitun Belem bele hafoun iha ita nia moris? Buat foun saida mak ita hetan husi natal?

Jesus Cristo, Liafuan rohan laek Aman Maromak nian, marca presença nafatin iha momento fundamental iha ita ema nia historia moris. Liu husi nia mak Maromak hatudu nia mensagem Divina liu husi Lifuan humana. Jesus Nazare mai participa iha ita nia vida humana atu haraik mai ita vida divina nian ka moris santidade nian.

Buat hotu nebe Aman hakarak hanorin mai ita, hatudu momos liu husi nia oan mane mesak. Tamba ne’e mak celebração fiar nian hot-hotu nu’udar memoria pascal Maromak nia Bibi Oan, nomos nu’udar simbolo husi fitun Belem nian.

Celebra Natal katak hola parte iha Maromak nia domin. Emmanuel nebe mak Maromak hamutuk ho ita ema, mai hasantu ita ema nia historia. Maromak ida nebe mak ho haraik-an husu no buka fatin atu moris iha ita le’et, agora haraik mai ita horik fatin rohan laek, hamutuk ho Nia no Aman iha domin Espirito Santo nian. Cantico natal nian nebe furak, poesia no hino liturgia nian, harmonia husi salmo natal, oração no cantico creda nian nebe ita hananu sempre fo hanoin mai ita konaba milagre moris nian, kmanek wain, surpresa no novidade nebe ita ema simu gratis husi Maromak.

Maromak rasik mai hela hamutuk ho nia povo no hari’i nia tenda iha ita leet hanesan expressa iha prólogo Sào João nian. Buat hotu nebe ita experiencia sai razão atu celebra nuudar festa boot natal, moris foun nian ba ita. Tempo nebe ohin loron sei sai rohan laek mai ita.

Misterio natal nian mak: liu husi labarik kiik oan ida nebe fraco, Maromak visita nia povo, Maromak tama iha humanidade maibe la husik nia-an nuudar Maromak. Maromak halo-an ba ema, mai koko ita ema nia realidade, lao tuir dalan ita ema nian, mai koko terus no ksolok nuudar ema. Nia mai hadomi ho fuan ema nian, tanis ho matan wen ema nian, sente tauk ho sentimento nu’udar ema, maibe nia nafatin nuudar Maromak rohan laek nebe hakarak salva nia povo. Nia sai hanesan ho ita ema iha ita nia moris temporal atu ita ema bele sai eternidade ka rohan laek iha Maromak.

Tansa ita sei tauk nafatin Maromak? Nia la mai atu condena ema ida. Nia lalos moris atu condena, tamba ne’e mak nia mai nu’udar labarik, no lalos nu’udar liurai nebe kaer kilat no kroat. Nia mak Menino Jesus nebe ita sei hasoru iha bibi luhan, no lalos iha trono ka palacio. Nia tanis iha Belem nebe furak, lalos hakilar ho lian makas hanesan terorista nebe halo tauk ema. Nia la mai ho kilat atu condena maibe Nia mai nu’udar labarik fraco atu bele hela hamutuk ho ita, no halo ita bele descobre ita nia fraqueza nuudar ema hamutuk ho ita nia Maromak nebe Emmanuel.

Me. Maria da Graça Maia, SSpS

Hela iha Atabae

Leave a Reply

Your email address will not be published. Required fields are marked *