shadow
Diocese de Dili > NOTÍCIAS > LETURA DIÁRIA > Sábado, III Semana Iha Tempo Advento (ANO C)

Sábado, III Semana Iha Tempo Advento (ANO C)

Primeira Leitura                  1Sam. 1. 24-28

Lia housi primeiro livro Samuel nian:

Iha loron hirak neba, Ana lori nia oan Samuel, hamutuk ho karau oan ida foin tinan tolu, farinha sasukat tolu, tua au ida, nia ba Na’i nia uma, iha Silo. Labarik ne’e sei nurak hela. Sira oho karau oan ne’e hodi hatudu kiikoan ba sacerdote boot Eli. Ana hateten nune’e: “Rona, ha’u Na’i, tebes duni hanesan ita ema ida moris, nune’e mós ha’u feto ida nebe uluk mai ona iha ne’e  besik ita, atu harohan ba Na’i. Atu hetan kiikoan ne’e mak ha’u harohan. Na’i haraik duni mai ha’u buat be ha’u husu ba Nia. Ha’u mós mai hasa’e fali nia ba Na’i; tempo hotu nebe nia moris, nia Maromak nian de’it ona”.

Maromak Futar Lia.

 

Salmo Responsorial                                                                                           1Sam. 2. 1, 4-5, 6-7, 8abcd (R. 1ª)

Refrão : Ha’u fuan haksolok iha Na’i, ha’u Maksoyn!!! Repete-se

  • Ha’u fuan haksolok iha Na’i,

          Ha’u nia biit iha Na’i Maromak.

          Loke ha’u ibun hodi sadik funu baluk sira,

          Ha’u haksolok tan Ita Maromak tulun. Refrão

 

  • Ema biit sira nia kroat tohar lakon,

          Ema biit laek sira sei hetan biit foun.

          Sira be iha sasan ua’in, buka aihan;

          Sira be hamlaha, bosu fali.

          Feto be la kô’us, hetan oan barak;

          Inan ba kô’us, la hetan tan oan. Refrão

 

  • Na’i mak haraik moris no mate,

          Nia mak lori ita ba rate no hasai ita housi rate,

          Nia mak halo ita kiak no halo ita riku;

          Nia mak hatun ema sira no mós foti sira. Refrão

 

  • Nia foti housi rai sira be moris hakru’uk,

          Hasai ema kiak sira housi asuknu’uk fatin.

          Halo sira tur ho boot sira rai nian,

          Haraik ba sira fatin ida oin na’in. Refrão

 

Aclamação                                                                                                    

Refrão : Aleluia, Aleluia!! Repete-se

                  Liurai povo hotu nian no fatuk inan Kreda nian,

                  hi’it-An mai soi ema be Ita halo housi   rai rahun. Refrão

 

Evangelho                                                                                                                                                       Lc. 1. 56-56

Na’i Jesus Cristo nia Evangelho nu’udar São Lucas haktuir:

Iha tempo neba, Maria hateten nune’e: “Ha’u klamar hahi Na’i Maromak, ha’u nia espírito hauélok haksolok iha Maromak, ha’u nia Maksoi, tan Nia haraik futar matan ba Nia atan feto haraik-an. Tebes duni, housi ohin ba oin derasaan tomak sei fó hatene sai katak ha’u hetan rahun kmanek. Ida be bele tomak halo buat boot tebes iha ha’u. Nia futar naran santo. Nia hatudu Nia laran luak housi derasaan ba derasaan ba ema hotu be hamta’uk Nia. Hodi Nia futar liman biit, halo ema fuan loko-an halai namkari. Nia hatun ema boot sira housi sira nia trono, Nia foti ema sira be haraik-an. Nia fó sasan ua’in ba ema hamlaha, Nia haruka ema riku sira fila ho liman mamuk. Nia tau matan ba Nia atan, Israel, hodi hanoin Nia laran luak, tuir lia hakotu ona ba ita aman sira, ba Abrãao no nia beioan sira nafatin”. Maria hôrik ho Isabel fulan tolu nia laran nune’e, hafoin fila hikas ba nia uma.

Lia Maksoyn.

Leave a Reply

Your email address will not be published. Required fields are marked *