shadow
Diocese de Dili > NOTÍCIAS > REFLEXÃO > HA’U NE SE LOS ATU HA’U NA’I NIA INAN HIIT AN MAI TO HAU UMAN

HA’U NE SE LOS ATU HA’U NA’I NIA INAN HIIT AN MAI TO HAU UMAN

Maun alin sira,

Oras ne’e ita iha ona Domingo ba dala ikus tempo advento nian, ita hakbesik-an besik liu tan ona ba celebra buat kmanek liu hotu nebe Maromak hakarak halo mai ita ema sira. Buat kmanek kona ba ita ema sira nia salvação ka ita ema sira nia maksoin nebe hahau ho anuncio kona ba Maksoin nebe sei hola an hanesan ita ema iha isin ida ita ema nian hodi realiza Maromak ninia Maksoin iha ninia povo sira nia leet.

 

Primeira leitura haktuir mai ita kona ba realidade ida ne’e iha kosokoan ida nebe sei moris mai no sei ukun Maromak ninia povo ho kbiit Maromak ninian. Nia sei ukun ho kbiit dame no domin nian. Kona ba ida ne’e segunda leitura halo ita compreende diak liu tan katak kosok oan nee mak ema hanaran Cristo. Nia mai atu halo tuir Maromak ninia hakarak. Maromak ninia hakarak atu hamos ka halakon tiha pecado, salan husi ita ema sira.

Iha ne’e Aman Maromak fo hatene kedas ona mai ita mistério páscoa nian nebe sei sai ponto ikus liu no ass liu Maromak hatudu ninia domin, ponto nebe sai natureza ba ita ema sarani sira hotu ou ba ema no rai tomak.

Uluk liu ita beiala sira hamos sira salan ho toman ida hasae sacrificio iha forma animal no sasan sira ba Maromak. Maibe ohin loron sacrificio atu hamos sala ne’e ka atu kasu salan ne’e hetan deit iha Jesus Cristo mesak, la hetan iha fatin seluk ka iha buat seluk tan. Segunda leitura hakturi mai ita katak hodi halo tuir Aman Maromak ninia hakarak Jesus troka sacrificio tuan iha animal ka sasan ou naan sira ne’e ho sacrificio foun mak Ninia an nebe nia hasae ba Maromak to’o mate iha Cruz tutun no moris hias fali. Jesus ninia futar isin no ran nebe ita simu iha eucaristia mak sai sacrificio foun lolos no ida mesak los liu hotu. Sacrificio be Cristo hasae mak ninia an rasik nee dala ida deit no ba nafatin. Katak Jesus kasu ita ema sira nia salan dala ida no ba nafatin, katak Maksoin Maromak realiza iha ita ema sira dala ida no lao ba nafatin rohan laek, Maromak la soi ita ema sira dala ida deit maibe nafatin ba nafatin.

Ne’e duni maun alin sira wainhira fiar ona iha Jesus Cristo sacrificio sira seluk nee laiha ona, laiha tan hare naan teen, hare manu aten, laiha tan oho manu mean ka manu mutin hanesan sacrificio ida. Iha deit mak ida mak sacrificio Jesus Cristo nian be concretamente ita hetan iha missa ka eucaristia. Iha neba Jesus Cristo hasae ninia an hanesan sacrificio ida no los liu atu kasu salan sira hotu. Sacrificio sira seluk ne’e la percisa ona tamba Cristo nia Sacrificio mak sacrificio foun nebe troka buat sacrificio tuan sira nee hotu.

 

Iha tempo advento nian nee Maromak fo hanoin mos mai ita katak Maromak la halo ida nee hodi fo ksolok ba ninia an, la halo ida ne’e hodi halo matan helik ka halo finzi deit. Maibe Maromak halo ida ne’e ba ita ema sira, liu husi ita no ho ita ema sira. Hodi halo nune’e mak ita ema sira bele sente duni ksolok no paz lolos Maromak ninia maksoin nian nebe realiza iha ita ema sira nia leet.

Nai Maromak halo ida ne’e concretamente iha ita ema sira liu husi Virgem Santa Maria. Ema ida nebe loke ninia fuan no laran hodi hatan ba Maromak ninia plano liu husi ninia dehan “Nai hau mak ne’e halo tuir deit ita boot nia hakarak bae”. Hahu husi neba Maia sai ema dahuluk nebe coopera ho obra Maksoin nian.

Maun alin sira ita bele hare concretamente Maromak ninia maksoin hahu lao iha ita ema ninia an nee liu husi kedas Nain Feto. Nain feto ba visita ninia feto Maluk ninia visita ne’e lori ksolok, lori Maksoin. Ninia visita halo Isabele ho ninia oan be sei iha knotak haksolok tebtebes. Sira haksolok basa Maromak presente iha sira nia le’e, basa Maromak hahu realiza ninia Maksoin iha sira nia leet. Ksolok ne’e obra maksoin be Mai husi Maromak, paz be Isabel ho ninia oan sente ne’e Mai husi Maromak. Nune mos paz interior no ksolok be Nain Feto sente hodi halo nia hananu ho ksolok tebes buat diak kmanek sira kona ba Maromak ninia Maksoin nebe Maromak halo ona ba ema sira no ba mundo tomak hahu kedas husi ninia an.

 

Maun alin doben sira Maromak ninia Maksoin halo ba ema no ba mundo hahu kedas husi ita ida idak ninia an hanesan nia halo ba Nain feto. Nunee mos Maromak ninia maksoin nee sei realiza duni iha ita ida idak ninia an wainhira ita mos loke neon no laran ba Maromak hodi hatan ba Maromak hanesan Nain feto hatan tiha ona ba. Hahu husi neba mak ita mos foin bele lori ksolok no paz ba ema seluk no ba mundo rai klaran hanesan Nain Feto lori ba Isabele no ba rai juda.  Belun doben sira ita labele moris iha Maksoin nia laran la ho Maromak, ita labele hetan moris ida nakonu ho paz no ksolok nundar sinalo maksoin nian wain hira ita lao dook no lao sees husi Maromak. Ita nia maksoin no ita nia moris mai husi Maromak tamba ne’e hakarak ka lakohi atu bele hetan moris ida nakonu ho maksoin lolos nian hodi halo ita sente duni moris nee ninia folin ita tem que lao iha moris nee hamutuk nafatin ho Maromak.

Mai maun alin sira ita prepara an didiak liu tan iha ita nia neon no laran hodi bele ba hasoru Nai Maksoin no selebra hamutuk ho maun alin sira no ho Maromak Nai Maksoin ninia moris iha natal ida ne’e. Amen.

 

Becora, 23 de Dezembro 2018, Pb.

Leave a Reply

Your email address will not be published. Required fields are marked *