shadow
Diocese de Dili > NOTÍCIAS > LETURA DIÁRIA > IV Domingo Iha Tempo Advento (ANO C)

IV Domingo Iha Tempo Advento (ANO C)

Primeira Leitura               Miq. 5, 2-5ª (1-4ª)

Lia housi Livro Profeta Miqueias:

Na’i lia tun nune’e: “Belém, Efratá ninian, ó mak kiik liu iha uma kain Judá! Ó mak sei hahoris ba Ha’u, Ema ida nebé sei ukun Israel. Nia ábut sei mai housi tempo uluk liu, housi loron uluk liu. Tan ne’e, mak Na’i Maromak sei la haré Nia povo, to’o loron nebé atu tur-áhi. Nune’e, maun-alin lubun oan sei moris libur hikas ho Israel oan sira. Nia sei hanuba metin rai atu ukun Nia emar hodi Maromak nia kbiit no naran. Nia emar sei moris ho hakmatek, basá, Nia sei ukun rai tomak. Nia, dame Na’in”.

Maromak Futar Lia.

 

Salmo Responsorial                                                                                            Sal. 79(80) 2ac, 3b, 15-16, 18-19

Refrão : Na’i, ami nia Maromak, halo ami fila hikas ba Ita,

                 Hatudu Ita futar oin hodi soy ami!!! Repete-se

  •  Israel Na’in, rona netik ami,

          Ita be hatodan-An, áas liu Querubin sira,

          Hatudu Ita roman, hatudu Ita kbiit,

          Mai soy ami. Refrão

 

  • Maromak bele buat tomak,

          Hiit-An fila hikas mai!

          Housi áas hateke mai, hodi haré!

          Tau matan hodi bali Ita toos,

          Tan Ita futar liman rasik tau fini ba sira. Refrão

 

  • Ita futar liman tahan ema sira nebé Ita fihir,

          Ita liman bali ema Ita haraik kbiit.

          Ami sei la hadook-an teni housi Ita,

          Haraik ami moris atu hana’i Ita naran. Refrão

 

Segunda Leitura                                                                                                                                        Heb. 10, 5-10

Lia housi surat ba Hebreus sira:

Maun-alin sira: Molok atu hiit-An mai mundo, Cristo hateten ba Aman Maromak: “Ita la simu ona sacrificio no buat karan seluk; maibé, Ita halo isin ida mai Ha’u. Ita laran la monu ona ba balada ema oho atu selu salan nia tusan. Tan ne’e, Ha’u hamríik dehan: Ha’u mak ne’e! Nu’udar Escritura hateten nanis kona ba Ha’u dehan: “Na’i Maromak Ha’u mai ona atu halo tuir Ita hakaran!” Uluk liu Jesus hateten nune’e: “Ita la simu ona sacrificio no buat karan seluk; Ita laran la monui ona ba balada ema oho atu selu salan nia tusan. Ita la simu ona buat hirak ne’e hotu”. Maski ema sira hasa’e sira-an tuir ukun-fuan haruka! Maibe, oras ne’e fali, Jesus hateten: “Ha’u mak ne’e! Ha’u mai ona atu halo tuir Ita nia hakaran!” Nune’e, Jesus halakon ona ukun-fuan uluk nian, atu fo hikas ukun-fuan seluk. Tan ne’e Maromak hakarak ida ne’e, ita sai ona ema santo, basá, Na’i Jesus Cristo saran ona Nia Futar isin ba mate, dala ida de’it ba nafatin.

Maromak Futar Lia.

 

Aclamação                                                                                                                                                             Lc. 1, 38

Refrão : Aleluia Aleluia!! Repete-se

  Ha’u, Na’i nia atan feto, halo tuir de’it Ita liafuan. Refrão

 

Evangelho                                                                                                                                                        Lc. 1, 39-47

†Na’i Jesus Cristo nia Evangelho nu’udar São Lucas haktuir:

Iha loron hirak nebá: Maria hiit-an lais ba foho, ba cidade ida iha Judá. To’o tiha Zacarias uman, Nia cumprimenta Isabel. Rona Maria cumprimenta, kosok-Oan book-An iha knotak ho ksolok. Isabel neon nakloke tomak ba Espírito Santo, hawelok haksolok foti lian, dehan: “Ita rahun-di’ak liu feto hotu-hotu! Ita Oan kmanek liu! Be ha’u sé lós, atu ha’u Na’i nia inan hiit-an mai ha’u uman? Basá, ita cumprimenta tiha ha’u, kosok-oan book-an kedas ho ksolok iha ha’u knotak. Rahun di’ak ba feto nebé fiar katak lia hotu sei sai tuir nu’udar Na’i hateten: ”Nune’e, Maria hatán: “Ha’u klamar hahí Maromak! Ha’u neon haksolok tuir Maromak, ha’u Maksoyn, tan Nia haraik matan ba nia atan feto!”

Lia Maksoyn.

Leave a Reply

Your email address will not be published. Required fields are marked *