shadow
Diocese de Dili > NOTÍCIAS > Notícias > Mensagem Amo Bispo Nian Ba Natal ho Tinan Foun

Mensagem Amo Bispo Nian Ba Natal ho Tinan Foun

Dala ida tan ita agradese ba Maromak no haksolok basá bele celebra Natal; celebração ida nebé iha nia significado unico teb-tebes mai ita sarani iha mundo rai klaran; atu hanoin fila fali iha rai Belem, Jesus, “Maromak oan”, moris housi Feto Virgem ida, naran Maria. Nia moris mai duni, laos tanba ema ida nia hakarak, maibé tanba Maromak Aman ”hadomi tebes haruka Nia oan mane mesak, atu nune’e se deit mak fiar iha Nia, sei la mate maibé hetan moris rohan laek (Jo 3:16)

Natal 2018 nian, bolu ita houtu atu hafoun nafatin ita nia an nudar Criatura Maromak nian nebé sei lao hela iha rai ne’e atu hatene moris nudar Maromak oan;  Maromak mai hasoru ita ema, mai ita ba hasoru Nia, keta fila kotuk ba ida nebé mai (cf.Jo 1:11); Maromak hadomi ita tan ne’e nia hakarak ita Nia diak, lakohi ita nia mate;

Mai ita fila fali atu ho liturgia  Natal nian, Maromak nebé mai, hola ita ema nia isin mortal, halo a’an ki’ik no kiak nune’e bele soi ita; Sira nebé ba dahuluk hare rasik ho sira nia matan Messias nebé moris mak bibi atan sira housi rai Belem. Sira hare no reconhece sinal nebé hat’o ba sira housi anjo sira. Hanesan Maria, sira fiar iha lia fuan Maromak nian no hare Maromak nia gloria; Ho Misterio Maromak halo An ba ema nian, sarani housi fatin oi oin tuku tur hodi hanai dehan.”

“Lia fuan ne’e halo an ba ema, no horik iha ita leet. Ami hare Nia Gloria, Gloria nudar Aman nia oan mane mesak nakonu ho graça no lia los” (Jo 1:14).

Ohin loron, anin foun democracia no liberdade nian nebé lori mai iha ita nia rai doben Timor Leste, hakiak no hafutar Timor nia indentidade sai nabilan liu tan iha Mundo maibé mos loke dalan ba cultura nebé dala barak sai ameaça ba valor no indentidade Timor no sarani nian; hare ba situação ida nebé mak.

Natal convida ita atu fila fali, fo atenção liu tan ba Sinal, “kosok oan nebé latan hela iha balada han fatin”, basa “laiha fatin ida ba sira atu hela ba.” (LK 2:7).

Ohin iha Timor, Natal convida ita atu hare Jesus iha labarik sira iha ita nia rain nebé seidauk hetan, ai han, ai moruk tanba familia nia kbiit seidauk to’o.

Ita hare Jesus iha labarik sira nebé kole tanba tenke lao dook atu to’o ba escola hodi buka matenek; ita hare Jesus iha labarik sira iha ita nia rain,nebé seidauk, assesu ba eletricidade nebé natal ne’e sei tur nafatin iha nakukun laran;

Ita hare Jesus iha labarik sira nebé seidauk bele hetan saude nebé diak tanba kuran ba be mos; ita hare Jesus iha labarik sira nebé labele Passa Natal hamutuk ho inan Aman tanba Inan aman sira fahe malu,Natal ida nebé la iha familia, la iha domin iha familia.

Ita hare Jesus iha labarik sira nebé iha Natal ne’e,labele halibur hamuuk ho familia tanba Inan Aman sira tenke husik hela sira hodi ba buka serviço,”buka moris”iha rai seluk,ou sira nebé ih hela cadeia,sira nebé moras hela iha hospital, no sst.

Ita hare Jesus kosok oan sira nebé hakarak atu moris maibé la bele tanba Inan no Aman, sira nia hanoin–an, obriga hemu aimoruk no dalan oi-oin atu estraga sira molok sira moris mai; ita hare Jesus iha kosok oan nebé wainhira moris mai duni maibé inan no aman sira husik hela sira iha luron ga iha lixo fatin tanba falta responsablidade.

“kosok oan nebé latan iha balada han fatin,” Convida ita atu hanoin no harohan ba labarik hot houtu nebé iha mundo liu liu iha rai doben Timor Leste nebé la bele goza sira nia direito no dignidade hanesan labarik ida nebé normal; ita harohan mos atu ita “inan aman /adulto” sira bele dame malu fali ho kosok oan sira houtu nebé tanba sira nia arogancia bele hakmatek, serano iha maromakc nia futar oin;

Nune’e mos convida ita atu hare Jesus iha foin sa’e Timor oan barak, nebé sei halerik hela ba educação nebé diak no hanesan ba Timor oan houtu, laos halo descriminação.

Hare Jesus iha foin sa’e sira nebé sai vitima ba droga,trafico human, no tipo Violencia oi oin nebé tanba pobreza sira nebé iha kbiit explora sira nebé kbiit laek.

Hare Jesus iha foin sa’e sira nebé halerik ba Justiça, verdade no interridade maibé sira nia lian ema la rona;

Mai ita tuku tur no harohan atu Natal ne’e kosok Oan Jesus bele penetra, no moris duni iha Timor oan sira nia fuan no laran atu bele cria ambiente ida familia nian hakiak dialogo, confiança no transparencia ba malu. Nune’e mak fundamento ba verdade, justiça no paz.

Iha Natal, ita adora Jesus nebé moris iha “Belem”. Belem mai housi Bethlehem, nebé consiste housi Beth-uma, lehem-paun; signfica “uma Pão nian”. Wainhira ita fahe pão ba malu sinal ida caridade, unidade no fraternidade nian. Tuir costume no tradição familia religioso sira lori verdade da fe ba uma ida ida, iha Timor iha mos tradição iha nebé loron Natal ita fahe ita nia ksolok hodi haruka postal natal nian ba malu, ita mos fahe presente ba malu nudar sinal ita nia ksolok no domin ba malu;

Presente nebé ohin loron Timor oan houtu, kiik eh boot feto e mane, katuas e  ferik, matenek eh beik hein mak PAZ! paz ba Timor oan houto; ita deseja Natal ne’e kosok oan Jesus bele loke ema hot-houtu nia fuan;Naromak Natal nian bele hasai duni nakukun nebé sei taka hela ita nia matan atu ita bele iha coragem hare ba ita nia an, ita nia moris, Papa Emeritus Bento XVI fo hanoin mai ita katak, “Sarani ida-idak nia vocação atu halo caridade tuir ida-idak nia função no papel iha comunidade no sociedade nia laran”. Papa Francisco nia mensagem ba dia mundial paz ba 52 nian liu liu ba politico sira nia dehan.

 

“Ema nia actividade iha rai ne’e, wainhira hetan inspiração no sustenta housi caridade, contribui ba contribuição Maromakc nia cidade universal, ida ne’e mak finalidade historia familia humana.”ida nebé mak programa ida ba politico sira, la importa housi região eh raça nebé nian deit, tenke aceita,se sira hakarak servico hamutuk ba ema houtu nia diak no precisa tau iha pratica vertude sira nebé bele promove actividade politica nebé forte:Justica igualidade respeito mutua,sinceridae, fidelidade”.

Nia mos fo hanoin kona ba “benanturanças politico sira nian” nebé Cardeal Vienmita ida, François Nguyen Vãn Thuãn:

Rahun diak ba politico nebé foti a’as nia nia dignidade no comprende didiak,nia papel;

Rahun diak ba politico nebé pessoalmente fo sasain kona ba nia credibilidade.

Rahun diak ba politico nebé servico ba bem comum laos nia intrese pessoal

Rahun diak ba politico nebé consistente nafatin

Rahun diak ba politico nebé servico ba unidade

Rahun diak ba politico nebé servico ba mundança nebé radical

Rahun diak ba politico nebé iha capacidade atu rona 

Rahun diak ba politico ida nebé la tauk

 

Maluk doben sira, sinal Natal nian haudu momos tiha mai ona mai ita: “kosok oan ida nebé haneras no toba hela iha balada han fatin”(LK 2:12).

Hanesan Virgem Santa Maria no São Jose, hanesan bibi atan sira nebé iha Belem, atu ita simu iha kosok oan Jesus Maromak nia domin nebé sai ema tanba ita. Ita compromete ita nia an, ho Maromak Nia graça, ita halo ita nia mundo ida nebé mais humano no soi duni ba labarik sira ohin loron no ba aban bain rua nian.

“Ho mensagem ne’e hau hakarak hato’o hau nia BOAS FESTA DO SANTO NATAL e Deseja ba 2019 tinan ida nebé nakonu  ho rahun diak oi oin ba Timor oan houtu”.  

Leave a Reply

Your email address will not be published. Required fields are marked *