shadow
Diocese de Dili > NOTÍCIAS > LETURA DIÁRIA > Terça-Feira, 25-12-2018 Missa Natal-Rai hun mutin

Terça-Feira, 25-12-2018 Missa Natal-Rai hun mutin

Primeira Leitura              Is. 9, 2-7 ou 1-6

Lia housi Livro Profeta Isaías:

Iha loron hirak nebá, povo be la’o iha nakukun laran, haré naroman boot ida. Ba ema sira be tur iha nakukun laran, naroman boot ida mosu ba sira. Na’I, Ita mak halo nia di’ak sai wa’in, Ita mak halo nia ksolok sai boot. Ema sira ne’e laran ksolok iha Ita futar oin, nu’udar sira haksolok tebes wainhira sira hahe ba malu riku-soin funu nian. Basá, Ita halakon sira nia dadur, Ita silu tohar ema áat sira nia óe be hakanek povo nia kabás, hanesan iha loron Madian nian. Ema sei sunu  hotu botas funu nian, ema sei sunu hotu hena sira be ran hakonu: buat hirak ne’e, sei sai áhi-étun. Basá, kosok-oan ida moris ona mai ami, Oan-Mane ida to’o ona mai ami. Oan ne’e mak kaer óe. Ema hanaran Nia “Lia-na’in boot! Maromak kbiit wa’in! Aman, tinan ba tinan! Dame na’in!” Nia ukun sei boot, Nia dame sei la lakon iha David nia trono, iha David nia reino. Nia mak ho hahalok lós nian, sei halo David nia reino metin nafatin. Houri ohin ba oin nafatin, Maromak kbiit wa’in mak sei halo ida ne’e.

Maromak Futar Lia

 

Salmo Responsorial                                                                                                                         Sal. 95, 1-3; 11-13

Refrão : Ohin moris ona ita Maksoyn, Jesus Cristo ita Na’in!!! Repete-se

  • Hananu ba Na’i knananuk foun ida:

          Rai-klaran toman hananu ba Na’i!

          Hananu ba Na’i, hahí nia futar naran! Refrão

 

  • Kalan-loron hawelok Ita Maksoyn!

          Iha povo leet hananu nia kbiit:

          Tatoli ba nação tomak buat di’ak Nia halo. Refrão

 

  • Lalehan ho rai haksolok ba!

          Tasi namuruk ho buat hotu iha laran!

          Rai klês no ai-horis sei bok-an:

          Ailaran tomak haksolok hananu! Refrão

 

  • Hakasolok iha Na’i futar oin,

          Nia mai tesi lia ba mundo.

          Nia sei tesi lia lós ba ema,

          Tesi lia hanesan ba povo sira. Refrão

 

Segunda Leitura                                                                                                                                           Tit. 2, 11-14

Lia housi São Paulo nia Surat ba Tito:

Oan doben sira: Maromak nia rahun-di’ak mosu mai ona, lori Maksoyn ba ema hotu-hotu. Maromak nia rahun di’ak hanourin ita atu hatene hamta’uk, atu husik dalan áat, atu hatene moris tuir justiça no fiar, ohin loron, wainhira ita sei hein tempo kmanek ikus nian, no wainhira ita sei hein hela Jesus Cristo, ita nia Maksoyn, ita nia Maromak boot nia loron. Jesus Cristo saran-An ba mate tan ita, atu hasai ita housi buat áat hotu, atu halibur ba Nia, povo ida ninian rasik, povo ida badinas teb-tebes kona ba hahalok di’ak.

Maromak Futar Lia.

 

Aclamação                                                                                                                                                       Lc. 2, 10-11

Refrão : Aleluia Aleluia Aleluia!! Repete-se

                  Ha’u haklaken ba imi ksolok boot tebes ida: Ohin moris ona ita

                  Maksoyn, ita Na’in Jesus Cristo. Refrão

 

Evangelho                                                                                                                                                          Lc. 2, 1-14

†Na’i Jesus Cristo nia Evangelho nu’udar São Lucas haktuir:

Iha tempo nebám ordem mai housi César Augosto, atu arola ema hotu-hotu. Arolamento ida ne’e mak uluk liu, wainhira Quirino mak emboot iha rai Síria. Ema hotu-hotu, ida-idak ba fó naran iha nia cidade rasik. Tan José kona ba uma-kain David, nia mos husik cidade Nazaré iha Galileia atu sa’e ba Judeia, ba David nia cidade naran Belém, atu tau naran ho nia kaben Maria. Maria besik atu tur ona áhi. Wainhira sira sei iha Belém, Maria nia loron atu tur áhi to’o daudaun. Nia tur-áhi duni, nia Oan mane. Maria haneras no hatoba Nia iha balada han-fatin, basá, la iha fatin oan ida ba sira, iha uma laran. Iha fatin nebá, iha bibi-atan balun; sira toman ona kalan-kalan toba iha rai luan, atu hein bibi. Maromak nia Anjo mosu ba sira; Maromak nia roman nabilan iha sira leet; sira hakfodak teb-tebes. Anjo dehan ba sira: “Keta ta’uk, basá ha’u lori lia foun ida mai imi; Lia ne’e sei haksolok imi hotu-hotu. Ohin, iha David nia cidade, moris ona ba imi, Maksoyn ida, nia mak Messias, katak: “NA’I”. Sinal atu hatene hetan Nia, mak ne’e: “Imi sei hetan Kosok oan ida ho neras toba iha balada han-fatin”. Teki-tekil, libur hamutuk ho Anjo ne’e, Anjo rihun ba rihun, hananu hodi hana’i Na’i Maromak, hateten: “Hawelok Maromak iha lalehan tutun! Hakmatek iha rai-klaran ba ema sira be Maromak hadomi!”.

Lia Maksoyn.

Leave a Reply

Your email address will not be published. Required fields are marked *