shadow
Diocese de Dili > NOTÍCIAS > Notícias > IDENTIDADE NEBE FORTE MAK FESTA NATAL

IDENTIDADE NEBE FORTE MAK FESTA NATAL

DCDD, loron 24 fulan Dezembro tinan 2018, relaciona ona ho loron boot “Natal” nebe cada tinan uma creda católica mundo tomak celebra festa ne’e, bispo Dili D.Virgilio do Carmo da Silva SDB iha igreja Nossa Senhora Imaculada Conceição- Dili hateten katak, durante iha tempo advento nia laran, buat nebe ita hare iha cidade Dili laran comessa husi primeira semana advento ninian to’o ohin kalan ida ne’e, ita la’os celebra arvoré natal, musica natal,  liu-liu riku soi natal ninian nebe iha fatin hot-hotu nune’e mos ho mesangem natal ninian nebe ita haruka ba malu durante tempo hirak nia laran, ida ne’e mak ita hanaran natal maibe keta halo ita reduz natal ne’e ba acontecimento ida nebe simplesmente social nian de’it basá ita hare iha media, ema wa’in iha mundo celebra natal ida ne’e, atu fiar na’in nune’e mos ida nebe la fiel, hotu-hotu haksolok.

Bispo D.Virgilio iha homilia hateten, Sinais sira ne’e mak dala ruma hamosu no halo particularmente buat lubuk ida mak natal bele sai de’it hanesan momento ida ba ema atu halo apelo no valor ruma iha moris no valor nebe importante mak hanesan valor paz, familia, domin, solidaridade no seluk tan. La’os katak valor hirak ne’e importante maibe ita labele identifica natal ho de’it valor hirak ne’e. Iha ita nia situação hanesan ne’e maka hanoin, di’ak liu ita fila fali ba uma abut sarani ninian nune’e ita bele descobre buka hatene di’ak liu tan identidade nebe forte mak festa nebe ita celebra daudaun. Ne’e duni liturgia natal ninian convida ita atu contempla, hanesan ita rona iha leitura sira katak “Kosok-Oan ho neras toba iha balada han fatin”. Ida ne’e novidade boot no furak no ema hotu hana’i ho naran NA’I, MESSIAS, SALVADOR.  

Bispo D.Virgilio esplica katak, Kosok-Oan ida latan hela iha balada han fatin, Nia moris kiak iha kiak sira nia leet, halo an kiak atu hakbiit kiak sira no vida Na’i Maromak tau atu hafoer Nia an nune’e bele hamos ita, foti ita atu ita mos bele sai Maromak oan. Bibi atan sira hakfodak ho Anjo sira nian no sira hotu reconhece katak Kosok-Oan nebe haneras no toba iha balada han fatin ne’e Maromak Oan, Salvador, Messias. Ita husu ba bibi atan sira katak tanba sá temque bibi atan sira? La’os tanba espíritualmente sira ne’e mak bele hamanas preparado atu apoio, atu simu Messias. Avontade bibi atan sira ne’e, se la’os sira ne’e ema simples, ema di’ak no sente  ema publico istima sira.  Ema considera sira nafatin hanesan puro tanba sira nia moris loron kalan mak lao tuir animal sira, laiha tempo ba sira atu tama iha templo uma oração ninian atu rona Maromak nia liafuan atu hadi’ak sira nia moris maibe sira loron kalan iha de’it foho ho animal sira hodi moris tuir sira nia hakarak, hakiak la’os valor maibe haburas bisnis oi-oin. Maibe ba sira hirak ne’e, masque hanesan ne’e, sira ne’e mak ohin sai nu’udar simbolu dame murak ida tanba Maromak haruka nia mensagem atu keta ta’uk ohin Ha’u hato’o ksolok boot ida ba imi no ba ema hotu katak moris ona SALVADOR, CRISTO, MESSIAS. Mensagem ida ne’e, ohin encoraja ita atu ita mos sente katak natal se la folin buat ida se ha’u la haka’as an atu simu no atu hasoru Messias no Nia mai tanba ha’u.

Bispo Virgilio mos dehan, hahu kedas Nia moris iha rai, ita haré Jesus oferece  Nia an nafatin ho sira nebe ikus liu, la’os ida nebe Jesus Cristo no la’os ida nebe ema los mak  hein hela husi Maromak nia liafuan domin nian, liafuan esperança nian, liafuan ksolok no liafuan naroman nian. Hanesan ohin iha primeira leitura, profeta Isaías fanu ita hodi dehan: Ba sira be tur hela iha nakukun laran, naroman boot ida mosu ba sira, sira be la’o hela iha nakukun mate nian maibe mosu naroman boot ida ba sira. Naroman mak liafuan Maromak nian dahuluk nebe pronuncia iha biblia. Liafuan nebe hahu fó inicio ba criação iha livro Génesis nebe hahu husi neba kedas, wainhira Maromak haré katak naroman ne’e di’ak nune’e ema lakohi tan atu lakon naroman ida ne’e. Ema buka maka’as no ta’uk tebes atu  lakon naroman ne’e  no atu fila fali ba nakukun laran.

Bispo Virgilio reforça liu tan katak, wainhira ita celebra liturgia natal nian iha kalan, atu fó hanoin nafatin mai ita katak nakukun halakon tiha ona ho liafuan criador ninian no buat hotu nebe moris iha nakukun laran, hetan  ona iluminação boot, naroman husi ita nia Salvador, ita nia Messias nebe halo an ba ema. Ida ne’e mak ita nia novidade, Maromak ida nebe iha kbiit atu cria no hakbiit ema nia matenek no capacidade atu bele halo buat oi-oin  liu-liu atu hatene hadomi. Naroman ne’e mak iha natal hatudu mai ita atu ita bele haré, Maromak sempre iha fazidão labarik oan sira nian, masque sira nebe seidauk moris no sira nebe ita abandona, Maromak presente gratuitu sira nebe ita  haksolok nune’e mos menus sira nebe ita nia laran susar liu-liu wainhira ema lakohi ita no la simu ita. Hanesan são José, Na’in Feto ho kosok oan Jesus nebe la hetan fatin, terus tanba ema la simu, nune’e oinsa wainhira ema la simu ita iha ita nia familia, iha ita nia kolegas, iha ita nia instituição  ka iha ita nia comunidade. Se karik wainhira ita sente ida ne’e ita la contete. Maromak nebe Nia ukun na’in ba buat hotu maibe Nia oan rasik la hetan fatin iha rai ne’e. Ema mos dala ruma la fo fatin ba malu maibe Maromak sempre iha fatin-fatin hamutuk ho ita.

Bispo Virgilio salienta katak, ba ita nebe ohin haksolok iha kalan natal no kalan murak ida ne’e, fitun natal nian hatudu dalan atu ita sai coragem hare Jesus ho labarik sira nebe labele passá natal hamutuk sira nia inan aman tan inan aman sira fahe malu, natal ida ne’e familia la hamutuk nune’e domin ladun sente. Natal ita koko hare Jesus iha kosok oan sira nebe hakarak atu moris maibe labele tanba ita inan aman sira la hanorin oan, obriga hemu ai moruk, fo dalan oi-oin atu estraga sira molok sira moris mai. Ita hare Jesus, Nia kosok oan nebe wainhira Nia moris mai duni maibe inan aman sira husik hela iha luron, iha lixu fatin tanba falta de responsabilidade.

Bispo Virgilio mos declara katak, celebração ohin nian fo hanoin mai ita atu haksolok no naroman natal nian la’os mehi ida nebe sei fila fali ba katuas maibe realidade ida tanba ho Maromak buat hotu possible laiha buat ida nebe impossible masque ita ema iha dificuldade maibe Maromak sempre ho ita, ida ne’e mak novidade nebe iha susar maibe hakarak hafoun wainhira ita sarani celebra loron natal. Mai ita ba simu Maromak basá Nia mai buka ita. Dala ruma ita husu mos ba ita nia an katak oinsa mak ksolok natal nian no naroman natal nian bele hetan iha ha’u nia moris, se ha’u la consege hasoru malu ho Maromak? Oinsa mak ksolok natal nian no naroman natal nian bele hetan iha ha’u nia moris, se ha’u la realiza encontro ida ne’e ho Maromak? Tanba Maromak rasik hatudu no hakbesik mai ita hanesan são Paulo dehan: wainhira to’o nia tempo masque ita ema sala na’in maibe Na’i Maromak loke odamatan lalehan hodi haruka Nia Oan Mane mesak ho imagem perfeito. Iha kalan natal ita hananu Glória a Deus Nas Alturas e Paz na Terra aos Homens. Liafuan rua nebe ita precisa rona ho atenção katak husi lalehan tun mai rai, lalehan ho rai, Maromak ho ita ema. Glória e Paz. Ida ne’e hatudu katak wainhira ita ema Maromak nia glória iha ita ema, nune’e mos ita bele dehan se Maromak moris duni iha ita nia leet paz sei buras tanba ita buka. Hanesan santo Agostinho dehan Maromak mak Dom ba paz fo ba ema ida-idak no fo ba ema hotu-hotu nebe hadomi Nia. Dom ida nebe fo saugate ba ema hotu. La’os ita ema mak conquista, masque ita ema iha boa vontade maibe paz oferta, presente ba ita ema husi Na’i Maromak mai ita.

Bispo Virgilio dehan tan kata, celebração natal ohin ninian, hakarak dehan mai ita ida-idak atu koko no haraik an atu reconhece no simu katak moris hanesan fatin Maromak ninian. No natal apela mai ita atu renova ita nia an, hametin ita nia fiar no haburas ita nia domin nune’e wainhira nu’udar ema moris ho esperança nafatin, moris la’os nahak ida nebe nakonu ho tristeza maibe ho esperança atu ba oin nafatin. Tanba ne’e iha ita nia santa missa ohin natal ninian, mai ita harohan atu fitun natal ninian hamanas liu tan ita ida-idak nia fuan, loke ita nia tilun no ita nia fuan, hanesan bibi atan sira iha Belém no banati tuir são José no Na’in Feto Maria masque la contente ho buat barak maibe sira hatene atu rona. Mai ita harohan atu ita mos iha natal ne’e liu husi kosok oan Jesus fo espasso ba ita nia fuan atu bele rona no Nia  bele fiar nafatin ita ho lian mai ita atu bele la’o iha dalan lia los no dalan Santidade nian. (Afoan)

Leave a Reply

Your email address will not be published. Required fields are marked *