shadow
Diocese de Dili > NOTÍCIAS > Notícias > JESUS MAK REVELASÃO LOLOS

JESUS MAK REVELASÃO LOLOS

DCDD, loron terça-feira (25 de Dezembro 2018) sai hanesan loron importante ba uma creda católica iha mundo tomak, nebe cada tinan sempre celebra festa natal ho ksolok hodi simu Kosok-Oan nebe atu mai mundo. Relasiona ho loron boot ne’e amo paróco Nossa Senhora Imaculada Conceição Pe. José Antonio iha nia homilia hateten katak, durante semana ha’at nia laran iha tempo adventu nian atu celebra festa natal nian, la’os ho ksolok Na’i nian de’it maibe ho ksolok Espíritu nian. Lia hirak nebe ita rona iha liturgia loron ohin nian husi profeta Isaías nebe ko’alia ba povo Judeu nebe moris dook husi sira nia rai rasik iha tinan barak nia laran hodi hela iha cidade Babilonia, nune’e sira neon kraik no laran nakonu ho saudades hodi hanoin buat uluk sira iha molok monu iha susar laran maibe loron ida Maromak lia tun ba sira liu husi profeta Isaías nia ibun hodi hanoin kona ba Ninia domin, Ninia fidelidade ba povo Judeu ne’e, ba povo nebe Nia hili, povo nebe Nia tau naran mak povo Israel, hafoin Nia hakotu atu liberta povo husi moris susar iha nação seluk nia leet maibe tanba moris povo ninian iha susar boot laran sira simu profeta nia lian maibe la’os katak atu cumpri kedas ona maibe hanoin katak  ne’e profeta ko’alia no tempo oin nebe sei mai katak tempo nebe Maromak sei hakarak duni liberta povo iha tempo oin. Lia hirak ne’e hato’o iha igreja Nossa Senhora Imaculada Conceição- Catedral-Dili.

Amo paróco Nossa Senhora Imaculada Conceição esplica katak, Messias nebe ohin ita celebra Nia loron ne’e Nia mai tiha ona maibe buat nebe profeta fo hatene ba povo to’o ohin loron seidauk cumpri iha povo nia leet, iha nia historia. Maluk sira, ita mos moris iha sitação ida, hanesan povo Israel nebe moris iha tempo liu ba. Ita hare katak libertação nebe Messias mai atu hala’o missão ida ne’e, halo tiha ona buat balu maibe seidauk complete atu ita hetan relação ka libertação lolos nebe promete no hakotu kedas mai ita, hanesan povo Israel, ita mos continua fiar, ita mos continua hein hodi laran metin ba Maromak katak sei to’o loron ida no loron ida ne’e ita  bele dehan katak to’o tiha ona atu harii reino foun Maromak nian. Hanesan São Paulo iha nia surat ko’alia mai ita katak ita mak ko’alia ba malu ho liafuan sira nebe sai husi ibun de’it maibe ita  bele ko’alia ho buat oi-oin, ita rasik mos ho ita nia atetude expresão ita nia oin no ita nia matan, ema bele compriende kona ba saida mak ita hakarak hato’o no saida mak ita sente iha ita nia laran.

Amo paróco Pe. José Antonio reforça liu tan katak, leitura ohin dehan katak Maromak mos uza meios oi-oin atu hato’o ba ita ema katak Nia hadomi duni ita ema hanesan criatura Maromak nian nebe halo tuir ilas no lalatak Maromak nian katak iha neon no hakarak, Maromak ko’alia wainhira ita hateke ba criatura natureza nian, ita contempla hamatan ba buat di’ak sira nebe ita hare kmook, maibe ita la hatene katak Maromak iha. Nune’e mos ema gentiu sira no ema nebe laiha fiar iha sarani mos, husi acontecimento no fenómena natureza nian sira reconhece egisténcia  nebe bele ordena buat hot-hotu iha mundo raiklaran.

Pe. José Antonio mos dehan, ha’u hanoin imi sira balun nebe estuda boot, lê historia povo Tito nian no lê historia povo profeta nian, ita hare katak povo antigo sira ne’e ho sira nia kakutak ho sira nia neon, sira estuda buat barak maibe ita ho tecnologia ohin loron nian seidauk compriende oinsa sira halo ida ne’e? Tanba ita ema iha neon, iha kakutak mai husi Maromak. Nune’e mos ema gentiu sira, ita hare ita nia lulik sira, wainhira ita hare rai tarutu ka rai lakan ne’e ita dehan katak ne’e kbiit Maromak nian, ita dere besi ka baku kalen atu dehan katak ami sei iha  maibe ohin ita rona dehan katak povo Israel hetan premilegio boot ida husi Na’i Maromak rasik atu ita  bele hatene Na’i Maromak liu husi profeta sira nia ko’alia. Profeta sira ita  bele dehan katak povo Israel hanesan ascutador ida nebe Maromak ko’alia ho sira no sira rona hafoin hato’o mai ita maibe ohin ita rona katak wainhira to’o tiha tempo nia rohan Maromak haruka Nia Oan Mane rasik, Oan nebe ninia ilas lolos nian, Oan nebe ninia liafuan nebe dehan katak Jesus maka revelasão lolos nebe as liu no momos liu nebe hatudu mai ita mak Aman.

Amo paróco ne’e mos declara katak, evangelho ha’at nebe ita rona mak; Marcus, Lucas, Mateus no João, sira na’in ha’at ne’e hotu ko’alia kona ba Jesus maibe Marcus hahu ko’alia kona ba Jesus hodi haktuir ksolok nebe Jesus ba simu Baptismo husi João, Lucas ho Mateus ko’alia kona ba Jesus hodi hanoin loron moris Jesus nian no mos haktuir historia Jesus sei kiik moris hamutuk ho Nia aman nebe ita rona iha evangelho no João ko’alia kona ba evangelho ho afirmasão ida nebe ema ida la hanoin kona, nia foti liafuan husi buat nebe hahu husi hun mai katak ida be hola isin nu’udar ita ema, ida ne’e uluk kedas iha tiha ona, Nia mak ho Aman halo buat hot-hotu então Nia mak Maromak haruka mai, Nia mak liafuan nebe Maromak mai atu ko’alia ba ita ne’e duni ita atu rona Maromak no atu conhece Maromak ita la precisa estuda boot no buat oi-oin maibe ita atu hatene lolos Maromak se mak Aman ne’e ita precisa hakbesik ba Jesus.

Amo paróco Pe. José Antonio mos sublinha tan katak, tinan hirak liu ba ita rona liafuan katak wainhira ita ko’alia kona ba Maromak laran luak misericordia Maromak nian nebe dehan Jesus votus misericordia katak Jesus ohin Aman laran luak nian. Atu conhece Aman laran luak buka hakbesik ba Jesus tanba Nia mak bele hato’o ba ita kona ba se mak Aman no mos hatudu mai ita saida mak Aman ninia plano, ninia projetu kona ba ita ema. Atu dehan mos katak atu hatene Aman hateke de’it ba Cristo hare buat nebe Nia halo no rona buat nebe Nia hanorin, hare oinsa Nia hahalok sira, oinsa Nia han hamutuk ho ema sira, Nia la defende ema kaer ukun sira maibe Nia defende povo, buat ne’e hotu Nia Aman Maromak halo, ne’e duni Jesus halo de’it buat nebe Nia hare, Nia rona husi Nia Aman Maromak.

Amo paróco ne’e dehan tan, Jesus halo an ba mane atu hanorin ita katak Maromak hadomi ita. Ita seidauk hare Maromak maibe Jesus mak ilas lolos tanba Nia hare tiha ona Maromak. Liafuan ikus iha evangelho nian dehan katak Jesus naroman nebe mai iha nakukun laran maibe nakukun nakonu iha Nia. Nakukun ida ne’e refere ba ema lakohi loke an atu simu Maromak nia mensagem no nakukun katak sala, nakukun mak ita nia egoismo hanoin ba ita nia an rasik de’it no ita nia nakukun mak explorasão. Ida ne’e mak nakukun bele hasoru naroman nebe Jesus mai.

Ikus liu amo paróco mos dehan tan katak, maluk sira labele haluha katak Jesus Cristo ho nia hahalok ikus nian, Ninia paixão iha pascoa Nia  manan tiha ona nakukun ne’e iha ita sarani nia liman atu concretiza nakukun ida ne’e sai naroman houri uluk moris lolos tuir Maromak ninia hakarak. (Afoan)

Leave a Reply

Your email address will not be published. Required fields are marked *