shadow
Diocese de Dili > NOTÍCIAS > LETURA DIÁRIA > Quarta-Feira, Loron daruak Oitava Natal nian Santo Estêvão, Primeiro Mártir

Quarta-Feira, Loron daruak Oitava Natal nian Santo Estêvão, Primeiro Mártir

Primeira Leitura                       Act. 6. 8-10, 7. 54-59

Lia housi livro haktuir Apóstolo sira nia hahalok:

Iha loron hirak nebá, Estêvão iha graça no kbiit nakonu, halo buat foun no milagre oi-oin iha povo nia leet. Maibe, ema balun housi grupo sinagoga nian be hanaran Libertos, housi Cirene, housi Alexandria, housi Cilícia no Ásia, sira mai haksesuk malu ho Estêvão, maibe sira la tahan nia matenek no Espírito Santo nebe nia hodi ko’alia. Rona tiha nia liafuan sira, sira laran hirus teb-tebes hodi hatatan nehan hasouru Estêvão. Maibe, nia nakonu ho Espírito Santo hodi hateke metin ba Lalehan, haré hela Maromak nia glória no Jesus hamriik hela iha Maromak Nia sorin kuana. Nia dehan: “Haré ba!. Ha’u haré Lalehan nakloke no Oan mane Maksoi hamriik iha Maromak Nia sorin kuana”. Rona tiha liafuan hirak ne’e, sira hakilar no taka tiha sira tilun. Hafoin, hamutuk tau liman ba nia hodi dada sai nia housi cidade; iha tiha liur, sira ho fatuk tuda mate nia. Sasin sira tau Estêvão nia hatais sira iha foin sa’e ida, naran Saulo, ne’e nia oin. Wainhira sira tuda hela nia, Estêvão harohan hodi dehan: “Na’i Jesus, simu ha’u espírito ba”. Hafoin, hakneak tiha hodi hakilar ho lian maka’as; “Na’i, keta tau todan sala ne’e nian ba sira”. Dehan tiha ne’e, nia iis kotu.

Maromak Futar Lia.

 

Salmo Responsorial                                                                             Sal. 30(31). 3cd-4, 6, 8ab, 16b-17 (R. 6ª)

Refrão : Na’i, iha Ita liman, ha’u saran ha’u klamar!!! Repete-se

  • Ita fatuk inan ha’u heli-an-fatin nian,

          Baki metin ha’u maksoyn nian.

          Basá, Ita ha’u kbiit no ha’u hôrik fatin,

          Tan domin ba Ita naran, dada ha’u no lori ha’u. Refrão

 

  • Iha Ita liman ha’u saran ha’u klamar;

          Maromak laran lós, soi ha’u.

          Ha’u sei hahi no haksolok ho Ita laran-luak,

          Tan Ita haré ha’u nia susar. Refrão

 

  • Ha’u moris iha Ita liman;

          Soi ha’u ba, housi ha’u funu baluk

          No ema áat sira liman.

          Halo nabilan Ita futar oin ba Ita atan;

          Na’i, ho Ita laran di’ak, soi ha’u ba. Refrão

 

Aclamação                                                                                                                                              Lc. 117. 26ª, 27b

Refrão : Aleluia, Aleluia!! Repete-se

                  Kmanek ba Ida be mai hodi Na’i nia naran!

                  Na’i Maromak mak ita nia roman. Refrão

 

Evangelho                                                                                                                                                     Mt. 10. 17-22

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba sira: “Matan moris ho ema sira. Sira sei lori imi ba tribunal no baku imi iha sira nia sinagoga laran. Sira sei kesar imi ba emboot no liurai sira tanba Ha’u, atu imi fó sasin ba sira no gentio sira. Maibe wainhira  sira saran imi, keta hanoin resin kona ba sá mak imi sei hatan, eh ko’alia oinsá; iha oras nebá sei haraik ba imi atu dehan sáida. Basá la’os imi mak ko’alia, maibe imi Aman nia Espírito mak sei ko’alia liu housi imi. Maun sei saran nia alin ba mate, aman sei saran nia oan; oan sira sei foti liman hasouru aman sira hodi oho sira. Ema hotu sei rai kunan hasouru imi tan Ha’u nia naran; maibe ema nebe hamriik metin to’o rohan sei hetan maksoyn.

Lia Maksoyn.

Leave a Reply

Your email address will not be published. Required fields are marked *