shadow
Diocese de Dili > NOTÍCIAS > LETURA DIÁRIA > Domingo Dentro da Oitava do Natal FESTA SAGRADA FAMILIA NIAN (ANO C)

Domingo Dentro da Oitava do Natal FESTA SAGRADA FAMILIA NIAN (ANO C)

Primeira Leitura                 Sir. 3, 3-7. 14-17a ou 2-6. 12-14

Lia housi Livro Ben Sirá:

Na’i hahí aman sira iha oan sira nia oin; Na’i tahan inan sira nia ukun kona ba oan sira. Ema nebé hamta’uk nia aman, sei hetan perdua ba nia salan; ema nebé hahí nia inan, sei halibur soin barak teb-tebes. Ema nebé hahí nia aman, sei haksolok ho nia oan sira; wainhira nia hamulak, Na’i sei rona duni nia harohan. Ema nebé hahí nia aman, nia moris sei naruk. Ema nebé tuir Maromak futar-lia, sei fo ksolok ba nia inan. Ha’u nia oan, tulun ó nia aman, wainhira nia katuas; keta halo nia neon sala, wainhira nia sei moris. Maski nia neon la hanoin tuir ona, ó sei hanoin nia, keta hakribit nia, basá, ó foin sa’e. Di’ak nebé ó halo ba ó nia aman, Maromak sei la haluha. Nia sei kasu tebes ó nia salan.

Maromak Futar Lia.

 

Salmo Responsorial                                                                                                                      Sal. 127, 1-2. 3. 4-5

Refrão : Rahun di’ak ba ema sira nebé hamta’uk Na’i!

                 Rahun di’ak ba sira nebé la’o tuir Na’i nia dalan. Repete-se

  • Rahun di’ak ba ema be hamta’uk Maromak,

          no la’o tuir Na’i nia dalan!

          Ó kosar-wén la turu leet ba rai,

          riku-soy no ksolok sei horik ho ó! Refrão

 

  • Ó káben nu’u-malus nadiki iha uma laran;

          Ó oan nu’u-bua nasare iha ó sorin. Refrão

 

  • Bensa ba ema be hamta’uk Na’i,

          housi Sião Na’i hahí nia;

          “Ó sei haré Jerusalém di’ak liu tan

          wainhira ó sei moris”. Refrão

 

Segunda Leitura                                                                                                                                          Col. 3, 12-21

Lia housi São Paulo nia surat ba sarani sira iha Colosso:

Maun-alin sira: Imi, Maromak fihir ona, nu’udar ema santo no doben, imi sei laran luak, sei laran di’ak, sei haraik-an, sei laran maus, sei paciência ba malu. Imi sei terus malu, perdua malu, wainhira imi ida iha lia ruma hasouru nia maluk. Nu’udar Maromak perdua imi, nune’e mos imi sei perdua malu. Maibé, kmanek liu ida ne’e, hadomi malu. Basá, domin mak hahalok kmanek liu hotu. Ha’u hakarak Cristo nia dame, horik iha imi laran; Tan dame ne’e mak Maromak bolu imi atu sai isin ida de’it ho Cristo; hatudu ba Maromak imi nia laran di’ak. Husu barak Cristo futar lia-fuan horik ho imi, atu imi hatene hanourin malu, hatene fo lia di’ak ba malu ho neon. Ho laran tomak hananu ba Maromak hodi hatudu imi laran di’ak: Hananu dadolin, hananu hahí, hananu ho lia santo. Ko’alia ka halo buat seluk, imi sei halo hotu hodi Na’i Jesus naran; sei fo agradece ba Maromak Aman hodi Na’i Jesus naran. Feto sira,  sei  haraik-an iha laén sira oin; ne’e mak  lós  iha Maromak futar oin. Mane sira, hadomi imi nia káben; keta hateten lia króat ba sira. Oan sira, halo tuir aman sira, kona ba buat hotu. Basá, ne’e fo ksolok Maromak. Aman sira, keta fo terus imi oan sira, atu sira keta neon salan.

Maromak Futar Lia.

 

Aclamação                                                                                                                                                 Col. 3. 15ª-16ª

Refrão : Aleluia, Aleluia!! Repete-se       

                  Cristo nia dame haksolok imi;

                  Nia futar lia fuan hela iha imi. Refrão

 

Evangelho                                                                                                                                                       Lc. 2, 41-52

Na’i Jesus Cristo Nia Evangleho nu’udar São Lucas haktuir:

Tinan-tinan, Jesus nia aman sira ba Jerusalém, iha Pascoa. Halo tiha tinan sanulu resin rua, Jesus ho nia aman sira sa’e ba Jerusalém, tuir lisan festa páscoa nian. Festa hotu tiha, sira fila hikas ba uma, maibé, Jesus hela tiha iha Jerusalém; Nia aman sira la hatene buat ida. Sira hanoin katak, Jesus la’o hamutuk ho maluk sira; La’o tiha  loron tomak ida ona, mak sira foin buka Nia, iha parente no maluk sira seluk leet. Tan la hatene Nia, sira fila hikas ba Jerusalém buka Nia. Loron tolu liu tiha, sira hetan fali Nia,  tur hela iha Templo, ho Doutor sira, hodi rona sira, husu sira. Ema hotu-hotu nebé rona Nia ko’alia, sira hakfodak ho nia matenek no nia lia-fuan. Haré tiha Jesus, Nia aman sira hakfodak teb-tebes; Nia inan hateten ba Nia: “Ha’u Oan, tan sá Ó halo nune’e mai ami? Ó nia aman ho ha’u, ami neon sala teb-tebes hodi buak Ó”. Jesus lia tun dehan: “Tan sá imi buka Ha’u? Imi la hatene katak, Ha’u sei hôrik iha Ha’u Aman nia uman?” Maibé, sira la hatene liu lia hirak ne’e katak sá. Jesus tun fila hikas ho sira ba Nazaré: Nia moris halo tuir lolós sira nia hakaran. Nia inan simu lia hirak ne’e hotu, hanoin tuir de’it iha nia laran. Iha Maromak no ema sira oin, Jesus matenek ba daudaun, boot ba daudaun, kmanek ba daudaun.

Lia Maksoyn.

Leave a Reply

Your email address will not be published. Required fields are marked *