shadow
Diocese de Dili > NOTÍCIAS > REFLEXÃO > MORIS NUDAR FAMILIA SARANI NIAN IDA

MORIS NUDAR FAMILIA SARANI NIAN IDA

Maun alin sarani doben sira,

Festa sagrada familia nian nebé katak festa hodi hanoin familia sarani nian be hetan ninia imagem iha familia São José, Virgem Maria no Jesus Kosok oan sai mos hanesan festa especial ba ita ida idak ninia familia. Festa ida ne’e halo ita lembra buat hotu kona ba ita nia familia, halo ita sente importância husi moris familia ninian iha ita ida idak ninia moris. Husi ne’e fo duni significado moris nian ida klean mai ita, liu liu ita ninia moris nudar sarani ida, nudar familia Cristã nian ida no nudar Maromak ninia povo ida.

 

Leitura sira ohin nian lori ita ba hatene vocação husi moris familia ninian. Concretamente iha ita ninia knar iha moris familia ninia nebé hatudu iha relação moris nian ida nudar Aman, Inan, Oan, Feton, Naan no belun ka maun alin sira.

 

Segunda leitura haktuir mai ita katak ita nia vocação moris familia ninian mak santidade. Santidade familia sarani ninian nebé hetan modelo iha familia Nazare nian: Comunhão de vida São José, Nain Feto no Jesus nian. Moris santo familia sarani ninian laos sai hanesan mehi ka ideal ida deit maibé tem que sai moris concreto ida nebé ita halao loro-loron.  São Paulo iha ninia surat ba sarani sira iha Coloso hanorin katak familia ninia moris santidade concreto nee hatudu iha inan ho aman, oan, maun alin tiun tian no belun sira ninia relação moris nian nebé nudar nia hateten “imi sei laran luak, se laran diak, sei haraik-an, sei laran maus, sei paciência ba malu. Imi sei hatene terus malu, perdua malu wainhira imi ida iha lia ruma hasoru maluk seluk. Nudar Maromak perdua imi nune’e mos imi sei perdua malu. Maibé kmanek liu ida nee mak imi hadomi malu. Basa domin mak hahalok kmanek liu hotu, domin mak sai razão ba ita nia moris hamutuk nudar familia ida.

Iha buat sira nee hotu no iha buat hotu nebé ita halo ba ita nia moris nudar familia ita buka nafatin atu halo hodi Nai Jesus ninia naran, fo agradece ba Aman Maromak hodi Nai Jesus ninia naran. Katak ita nia moris familia ninian temque sai ida deit ka hetan unidade iha Cristo, labele haketakan husi Cristo.

Sai klean no besik liu tan ita nia relação moris nudar Inan, Aman no oan sira iha dalan moris familia sarani sira ninian ne’e Tuir dalan moris santidade nian wainhira “Feto sira haraik an iha mane sira, mane sira hadomi ninia fen kaben sira, la hasai lia kroat hasoru sira, oan sira halo tuir aman no inan sira iha buat hotu no aman ho inan sira labele fo terus ba oan sira”. Hodi halo nunee mak familia nee sei hetan benção wain hanesan haktuir iha livro Ben Sira nebé ita rona iha segunda leitura:

Nai Maromak hahi aman sira iha sira ninia oan sira nia oin, Nai tahan inan sira nia ukun kona ba oan sira. Ema nebé hamtauk ninia aman, sei hetan perdua ba ninia salan, ema nebé hahi ninia inan  sei halibur soin barak tebtebes. Ema nebé hahi ninia aman sei haksolok ho nia oan sira, wainhira nia hamulak Nai Maromak sei rona duni ninia harohan. Ema nebé hahi ninia aman nia sei mori naruk. Ema nebé tuir Maromak ninia futar liafuan sei fo ksolok ba ninia inan.

Maromak dehan, tulun o nia aman wainhira nia katuas keta halo nia neon sala wainhira nia sei moris. Mas que nia neon la hanoin tuir ona o sei hanoin nia keta hakribit nia, basa o foin sae. Diak nebé o halo ba o nia aman, Maromak sei la haluhan. Maromak sei kasu tebes o nia salan sira.

 

Evangelho hanorin ita katak atu familia bele moris duni hanesan ne’e inan ho aman iha papel importante tebes, liu liu iha halao sira ninia knar no responsabilidade nudar inan ho aman hodi tulun malu no tulun oan sira atu nune’e buat hotu iha familia laran bele sai diak tuir Maromak ninia hakarak. Buat hotu nebé familia nee halo sempre hetan ninia abut iha Maromak, hahau ho Maromak, lao ho Maromak no hotu mos ho Maromak. Ne’e mak Nain feto ho São José halo, nee mos mak sira compreende husi Jesus ninia liafuan nebé dehan imi la hatene katak hau tem que horik iha hau aman ninia uman.

 

Wainhira hare ba realidade moris familia ita ida idak nian no familia sira seluk iha ita ninia sociedade nia leet ita bele descobre riqueza no beleza moris familia ninian nee wain tebes nebé fo ksolok tebes mai ita iha ita nia moris nudar familia ida familia sarani ka familia Maromak ninian. Mas que nune’e ita mos tem que reconhece katak iha ita nia familia barak tebes mak hetan terus no susar wain to’o familia balun naksobu rahun. Hirak ne’e hotu halo ita hanoin no hatene ho roman Maromak ninia futar liafuan katak los duni iha moris nudar familia ninian wainhira ita moris tuir dalan Maromak ninian nebé hatudu oan mai ita ita sei hetan duni buat diak tomak moris familia nian nebé ita hakarak, maibé dala barak ita la hetan tamba ita lao dook husi Maromak ninia dalan moris familia nian nebé nia hatudu no hakarak ona mai ita, tamba nudar inan, nudar aman no nudar oan sira ita la halo tuir ita ida idak ninia knar no obrigação moris nian iha ita nia moris familia nian, familia sarani nian.

 

Nune’e maun alin sira oras ne’e mai ita ho haraik-an no hakas-an tebes buka atu iha ita nia moris familia nian ne’e loro loron ita moris tuir dalan moris familia nian nebé Maromak hatudu no hanorin ona mai ita. Moris nudar Aman lolos, nudar inan lolos no nudar oan lolos, lao hamutuk hanesan familia no lao hamutuk ho Maromak nafatin iha buat hotu nebé ita halo. Hodi nune’e ita bele hetan duni ksolok, paz no domin familia nian nebé ita hotu hakarak. Amen.

 

Bidau, 30 de Dezembro 2018, Pb.

Leave a Reply

Your email address will not be published. Required fields are marked *