shadow
Diocese de Dili > NOTÍCIAS > LETURA DIÁRIA > Segunda-Feira, Loron dahitu (7) Oitavo do Natal nian, (ANO C)

Segunda-Feira, Loron dahitu (7) Oitavo do Natal nian, (ANO C)

Primeira Leitura                     1 Jo. 2. 18-21

Lia housi São João nia Primeira Surat :

Oan doben sira: Ida ne’e mak oras ikus liu nian. Imi rona tiha katak sei mai ida nebe hasouru Cristo. Basá oras ne’e mosu daudaun ona ema ua’in be hasouru Cristo. Housi ne’e ita hatene katak to’o ona nia oras. Sira sai housi ita leet, maibé sira la’os housi ita. Sira ita maluk karik, sira sei hela ho ita. Mosu tiha nune’e duni, atu hatudu lolós katak sira ida la housi ita. Maibé imi iha bensa nebé mai housi Santo, imi hotu iha matenek. Ha’u la hakerek ba imi tan imi taka lialós, maibé tan imi hatene lialós, basá lia bosok ida la mosu housi lialós.

Maromak Futar Lia.

 

Salmo Responsorial                                                                                          Sal. 95(96). 1-2, 11-12, 13 (R. 11ª)

Refrão : Lalehan haksolok, rai-klaran hahi!!! Repete-se

  • Hananu ba Na’i knananuk foun ida,

          Hananu ba Na’i, rai-klaran tomak.

          Hananu ba Na’i, hauélok Nia naran.

          Haklaken loron ba loron, Nia maksoin. Refrão

 

  • Lalehan haksolok ba, rai hananu ho ksolok ba,

          Tasi no buat hotu iha tasi laran,

          Rai luan ho buat moris tomak iha nia, haksolok,

          Bidu ho ksolok ai sira iha ailaran. Refrão

 

  • Iha Na’i be sei hi’it-An mai Nia futar oin.

          Nia mai atu ukun rai-klaran,

          Nia sei ukun mundo ho justiça,

          No Ninia povo sira ho fidelidade. Refrão

 

Aclamação                                                                                                                                                  Jo. 1. 14ª, 12ª

Refrão : Aleluia, Aleluia!! Repete-se       

                  Liafuan halo-An ba ema no hôrik iha ita leet. Ba sira be simu Nia,

                  Nia haraik kbiit atu sai Maromak nia oan. Refrão

 

Evangelho                                                                                                                                                           Jo. 1. 1-18

Na’i Jesus Cristo Nia Evangleho nu’udar São João haktuir:

Houri uluk kedas Liafuan iha nanis, Liafuan hôrik nanis hamutuk ho Maromak, Liafuan Maromak nanis. Houri uluk kedas Nia hôrik hamutuk ho Maromak. Maromak halo sasan hotu hodi Nia, la hodi Nia buat ida la moris. Nia mak moris-Na’in. Moris ne’e mak ema nia naroman. Naroman nabilan hela iha nakukun laran, maibé nakukun la tahan Nia. Mane ida mosu mai, Maromak mak haruka, nia naran João. Nia mai nu’udar sasin ida atu fó sasin kona ba Naroman.

Liafuan mak Maromak lolós, naroman ida be mosu iha rai-klaran, leno ema hot-hotu. Nia hôrik duni iha rai-klaran, rai-klaran Nia mak hakiak, maibé, rai-klaran la hatene Nia. Nia mai buka ninia rasik, maibé, ninian sira la simu Nia. Maibé, ema sira be simu Nia no fiar Nia naran, Nia haraik kbiit atu sai Maromak oan. Ema sira ne’e la’os moris housi ema nia ran, la’os moris tuir ema nia isin nia hakaran, la’os moris tuir ema nia hakaran, maibé sira moris housi Maromak. Liafuan ne’e halo tiha An ba ema, Nia moris duni ho ita. Ami haré tebes Nia Naroman, Naroman ida be Oan-Mane-Mesak simu housi Nia Aman. Nu’udar Oan-Mane-Mesak ida kmanek no lós tebes.

João fó sasin kona ba Nia, dehan: “Ema ida ne’e ha’u hatene nanis ona; Ema nebe sei mai tuir ha’u, Nia uluk liu tiha ha’u, basá Nia moris uluk liu ha’u”. Lós duni, housi Ninia di’ak barak tebes mak ita simu di’ak oi-oin tui-tuir malu. Basá, maski ukunfuan mai housi Moisés, graça no lialós mai housi Jesus Cristo. Ema ida la dauk haré Maromak. Oan-Mane-Mesak hôrik ho Maromak Padre, Nia de’it mak haklaken mai ita.

Lia Maksoyn.

Leave a Reply

Your email address will not be published. Required fields are marked *