shadow
Diocese de Dili > NOTÍCIAS > REFLEXÃO > EPIFANIA : MAROMAK HANORIN ITA HARAIK-AN

EPIFANIA : MAROMAK HANORIN ITA HARAIK-AN

Ita foin festeja Natal no tinan foun iha loron hirak liu ba, ksolok no susar balu ita hakat liu oan. Semana nee, ita sei reflecte hamutuk kona ba festa solenidade EPIFANIA DO SENHOR. EPIFANIA DO SENHOR ho lia fuan seluk dehan; NAI NIA HATUDU-AN.

Evangelista são Mateus sei lori ita ba conhece klean liu tan kona ba oinsa Maromak la husik ita lao mesak iha mundo ida nee (Emmanuel=Deus Conosco). Husi Maromak nia hatudu-an, mundo tomak mai hahi adora Nai Maromak ida deit nebe halo-an ba mane iha Jesus Cristo Maksoin. Lian ida nee, haktuir lolos iha refraun salmo nian be dehan;”povo tomak rai klaran sei mai hahi Maromak”.

Evangelho são Mateus nian, Capítulo 2, versículo 1-12, lori ita ba haklean fiar sobre sentido Haraik-an eh Humilde. Figura protagonista haraik-an nebe ita bele banati mak liurai nain tolu, nudar Evangelho tenik:Sira hasae ba Nia, sira nia buat ksolok: osan mean, ai-wen ho mina morin (Mat,  2,11).

Em princípio, celebração EPIFANIA implicitamente sai hanesan mos celebração Nai nia Moris mai iha mundo ou Emanuel (Mt 1,18-23). Lia fuan EPIFANIA iha lian Grega (Yunani) significa hatudu-an ou mosu. Husi sorin seluk, celebração EPIFANIA mos conduz ita ba hanoin hikas presença Liurai nain 3 husi Lorosae; Melquior, Balthazar no Gaspar nebe consegue ba haree hetan kosok oan Jesus (Cf Mt 2,1-12).

Uma Creda Católica iha mundo tomak celebra solenidade ida nee hodi conclui ka taka tempo Natal nebe cristandade tomak foin celebra dadaun durante fulan dezembro nia laran. Iha Natal, ita hotu celebra kona ba mistério encarnação; Maromak OAN hola isin ida hanesan ema hodi soi duni emar hirak nee tomak.

Natal ida nee continua no taka iha Domingo EPIFANIA nebe ita celebra. Solenidade EPIFANIA nee dala ida tan fo atenção ba ita nobun hodi hateke no fihir Nai liurai Jesus Cristo nebe hatudu-An ona iha ema nia moris.

Kona ba Liurai nain tolu nia haraik-an, profeta Isaías iha primeira leitura hakerek:”Ema sira sei tuir o nia nabilan; liurai sira sei hakat ba o nia rai hun mutin….o nia oan mane sira sei too mai husi dook…..husi Sabá, ema tomak sei mai, lori osan mean no ai wen morin, hodi hahi hananu Nai nia naran boot” (Is 60,1-6). São Paulo mos iha nia carta iha segunda leitura dehan:“Tan Maromak hatudu, hau hatene Cristo nia mistério…ema gentio simu mos liman rohan hanesan ema Judeu”. Passagem nee fanun ita nia fuan no bolu ita nia atenção hodi ba aprende hosi hahalok Jesus Cristo nian nebe hola isin hanesan ema hodi mai moris iha mundo no mos figura liurai nain tolu nebe haraik-an hasae sira nia riku soin hanesan oferta ida ba Jesus kosok oan nebe moris lerek iha balada nia luhan.

Iha livro Levítico Testamentu Tuan nian, Maromak bolu israelita sira halo sacrifício ho haraik-an (Cf Lev. 16,29). Atu nunee, ema hotu bele banati tuir lalaok haraik-an nudar Jesus Cristo halo. Jesus husik nia trono iha lalehan aas hodi haraik-an, hatudu nia solidariedade no ikus liu hatudu sacrifica-an no haraik-an too mate iha Kruz. Nee mak sacrifício kmanek liu iha sacrifício sira hotu. Ida nee mak provas Nai Maromak hatudu nia domin ba ema hotu iha Jesus Kosok Oan nia figura.

Iha sorin seluk, Maromak mos sei fo perdão ba ema nebe arrepende hodi hakribi nia salan sira ho haraik-an nudar haktuir iha livro daruak Liurai sira nian dehan;”tan o arrepende no haraik-an ona iha Maromak nia futar oin ho mata-wen turu, Maromak rona ona o”. Maromak haraik-an atu ema hotu sente hakmatek no seguro wainhira comunica ho NIA liu hosi oração no mos liu husi hahalok moris nian. Husi parte ita ema nian, lalaok haraik-an precisa hatudu liu husi sacrifício. Exemplo concreto Profeta Ezra hatudu duni hodi bolu no convida povo Israel hotu ba arrepende sira nia hahalok aat sira ho haraik-an, atu Maromak haraik dalan hakmatek ba sira, sira nia oan no mos sira nia riku-soin sira(Cf Ez 8,21).

Jesus Cristo nebe haraik-an sai hanesan naroman boot ida hodi haroman ema hotu iha nakukun laran. Profeta Isaías iha primeira leitura justifica afirmação nee hodi hakilar ba ema Jerusalem sira dehan:”ema sira sei tuir o nia nabilan;  liurai sira sei hakat ba o nia rai hun mutin(Is 60,3). Iha Evangelho ita hotu rona ona katak; liurai nain tolu mai husi dook tan deit sira hare fitun nabilan naroman iha lalehan leten. Sira tuku tur haraik-an nudar atan hodi hahi adora Nai Maksoin nebe haraik-an ba Kosok Oan hatoba iha balada luhan Belém. Ba ida nee, profeta Isaías dala ida tan hateten;”foti matan hateke lemo-lemo, ema hotu halibur too mai o, o nia oan mane sira sei too mai husi dook, o nia oan feto sira sei lori too mai (Is 60,4)”.

Iha livro Antigo Testamento nian, profeta Isaías halo ona ninia profecia ou previsão kona ba liurai nain tolu nebe sei hiit-an hosi rai dook mai haraik-an iha Jesus nia fatin moris Belem ho sira nia riku soin nebe valor boot tebes. Ba profesia nee profeta Izaías dehan;”hosi Saba, ema tomak sei mai, lori osan mean no ai-wen morin hodi hahi hananu Nai nia naran boot(Is 60,6).”

Maromak nia hatudu-an ho haraik-an ba humanidade tomak hanesan graça boot ida be Maromak hasuli. Maromak nia haraik-an mos sai hanesan momento oportuno ida atu ema hotu bele compreende liu tan Maromak nia mistério. Ba ida nee, São Paulo iha nia carta ba Éfeso hateten tenik;”tan Maromak hatudu, hau hatene Cristo nia mistério(Ef 3,2a)”. Wainhira Maromak hatudu nia mistério, nee sinal katak Maromak nia bensão tun ona ba ema hotu nebe tau fiar iha Maromak. Tanba nee mak iha livro números, Maromak haruka Abrão haraik bensa ba Arão nia oan sira be rona Maromak lian dehan;”Nai fo bensão ba o, Nai tau matan ba o, Nai hatudu nia oin mamar ba o, hatudu nia laran luak ba o. Nia fila oin ba o, fo dame ba o  (Num 6, 24-26)”. Maromak nia lian hirak nee fo sentido ida katak Maromak sei fo bensão ba ema sira be haraik-an iha Nai Maromak nia futar oin.

Buat nebe kmanek ba ita nobun mak; Maromak nia hatudu-an ho lalaok haraik-an laos ba povo israelita deit maibé, hanesan São Paulo iha nia carta ba Éfeso afirma lolos ona katak Maromak nia hatudu-an iha condição haraik-an hatudu mos ba ema hothotu inclui ema jentiu sira, inclui mos ema hotu nebe sente Maromak nia graça dook tebes husi sira. Nunee saun Paulo dehan tenik;”ema gentio simu mos liman rohan, hanesan ema Judeu(Ef 3,6)”.

Iha livro Eclesiastes Antigo Testamento nian, Maromak hatudu nia laran maus ba povo hotu nebe arrepende hodi hakribi salan no muda-an husi hahalok nakukun ba hahalok naroman nian no Maromak sei restaura fali sira nia rain (Cf Ecle. 7,14). Wainhira Maromak hatudu-An ba ema  haraik-an sira, nee significa katak rahun diak Maromak nian hasuli ona ba ema hotu.  Tanba nee mak São Paulo iha nia carta ba Tito hakerek dehan:”Maromak nia rahun diak mosu mai ona, lori maksoin ba ema hothotu (Tit 2,11).

Ema nebe haraik-an tebtebes husi fuan laran, Maromak sei la haraik tan susar wain ba nia tan nia hetan ona rahun diak iha Maromak futar oin. Livro Eclesiastes fo hanoin tenik;”tan o arrepende no haraik-an wainhira rona Maromak lian hodi les o hatais sira, Maromak sei rona harohan nee (Cf Ecl 34,27).

Husi sikun seluk, livro provérbio fo aten brani mai ita ho lian tuir mai;”diak liu haraik-an hamutuk ho ema haraik-an sira do que fahe sasan naok ho ema foti-an sira(Prov. 16,19)”. Maromak mos sei fo aten brani ba ema nebe haraik-an iha Maromak nia futar oin hanesan acontece ba profeta Daniel nebe fiel no haraik-an iha Maromak nia futar oin (Cf  Dan 10,12).

Mensagem principal nebe sai bukae mai ita iha semana nee mak; Maromak nia hatudu-an iha festa boot EPIFANIA, bolu fali ita nobun hodi ba aprende no koko bebeik oinsa haraik-an hanesan mos liurai nain tolu nebe maske riku maibé, sira haraik-an hakneak hahi adora Jesus Cristo kosok oan.

Iha qualquer situação, lalaok hirak nee bolu nafatin atenção atu ita imita Maromak nia haraik-an iha ita nia moris sarani nian. Se Maromak haraik-an ona atu soi ita. Tansa ita la bele koko haraik-an hodi hetan salvação gratis nebe Maromak oferese ho haraik-an? Keta haluha lia fuan nebe sempre temi: “Nai sei hatuun ema foti-an no sei foti (dignifica) ema haraik-an”. Uluk liurai nain tolu lao kole mai husi fatin dook, lori mos ho sira nia murak mean mina morin sira. Maibé, ohin loron Jesus Cristo so precisa deit ita nia fuan nebe moos hodi sai hanesan murak mean ba Jesus Cristo. (IgnasBAFS)

Ornai, 3/01/2019.

Leave a Reply

Your email address will not be published. Required fields are marked *