shadow
Diocese de Dili > NOTÍCIAS > LETURA DIÁRIA > Quinta-Feira, depois da Epifania (ANO C)

Quinta-Feira, depois da Epifania (ANO C)

Primeira Leitura                     1Jo. 4. 19-5.4

Lia housi São João  nia primeira Surat:

Doben sira: Ita sei hadomi Maromak, tan Maromak hadomi uluk ita. Ema ruma dehan karik: ‘Ha’u hadomi Maromak’, maibe rai kunan ba nia maun-alin nebe nia haré, nia la bele hadomi Maromak nebe la haré. Ida ne’e mak ukunfuan nebe ami simu housi Nia: Ema nebe hadomi Maromak, hanesan ne’e mós nia hadomi nia maun-alin. Ema nebe fiar katak Jesus mak Cristo, moris housi Maromak, no ema nebe hadomi Maromak ida be hahoris Nia, hadomi mós  ida be moris housi Nia. Ita hatene katak ita hadomi nafatin Maromak Nia oan sira, uainhira ita hadomi Maromak no moris tuir lolós Nia ukunfuan sira; basá Maromak Nia domin mak buka rai didi’ak Nia ukunfuan sira. Buat hotu nebe moris housi Maromak manan mundo. Ida ne’e mak manan mundo, ita nia fiar.

Maromak Futar Lia.

 

Salmo Responsorial                                                                                    Sal. 71(72). 2, 14, 15bc, 17 (R. Cf. 11)

Refrão : Na’i, povo tomak rai-klaran sei hahi Ita!!! Repete-se

  • Maromak, haraik ba liurai kbiit atu tesi lia,

          Ita justiça ba liurai oan.

          Ita sei ukun Ita povo ho justiça,

          Ita kiak sira ho lialós. Refrão

 

  • Nia sei soi sira moris housi ema áat sira,

          Basá kiak sira ran kmanek tebes iha Nia matan.

          Tan ne’e, sira sei hanoin nafatin iha nia harohan;

          Sei hanoin nafatin ba nafatin. Refrão

 

  • Nia naran rahun di’ak ba nafatin,

          Sei hanoin nafatin hanesan loron nia roman.

          Iha nia, povo tomak sei simu bensa;

          Ksolok ua’in sei halekar iha nação hotu. Refrão

 

Aclamação                                                                                                                                                             Lc. 4. 18

Refrão : Aleluia, Aleluia!! Repete-se       

                  Na’i haruka ha’u haklaken Lia-foun ba kiak sira

                  no fó hatene libertação ba dadur sira. Refrão

 

Evangelho                                                                                                                                                     Lc. 4. 14-22a

Na’i Jesus Cristo nia Evangelho nudar São Lucas haktuir:

Iha tempo neba, hodi Espírito Santo Nia kbiit, Jesus fila hikas ba Galileia; Nia naran boot iha fatin hot-hotu; Nia hanourin iha Sinagoga. Ema tomak hahi Nia. Nia mai to’o iha Nia rain Nazaré. Tuir Nia lisan, iha sábado ida, Nia tama iha Sinagoga, hamriik atu lê. Sira fó ba Nia, livro profeta Isaías nian. Nia loke, haré kona fatin nebe hakerek, dehan: “Na’i Nia Espírito hela ho ha’u, tan Nia foti Ha’u. Nia haruka Ha’u atu haklaken Lia-foun di’ak ba kiak sira, atu fó hatene loron libertação ba dadur sira. Fó hikas matak di’ak ba matan delek sira, liberdade ba ema sira be iha kloot laran. Nia haruka Ha’u atu fó hatene sai tinan ida rahun di’ak mai housi Maromak”. Taka hikas tiha livro, Jesus fó fali ba ema hein Sinagoga. Hafoin Nia tur tiha. Ema sira nebe iha Sinagoga laran  hateke hotu ba Nia. Nune’e, Jesus hahu hateten ba sira, “Liafuan Escritura, imi foin rona ohin, sai tuir lolós ona”. Sira hotu fó sasin di’ak kona ba  Nia no hakfodak tebes ho liafuan hirak be ksolok ua’in nebe sai housi Nia ibun.

Lia Maksoyn.

Leave a Reply

Your email address will not be published. Required fields are marked *