shadow
Diocese de Dili > NOTÍCIAS > LETURA DIÁRIA > Sexta-Feira, depois da Epifania (ANO C)

Sexta-Feira, depois da Epifania (ANO C)

Primeira Leitura                          1Jo. 5.5-13

Lia housi São João  nia primeira Surat:

Doben sira: Ema nebe mak manan mundo? La’os ema nebe fiar katak Jesus mak Maromak Oan? Jesus Cristo be mai housi ué no ran; la’os de’it ho ué, maibe ho ué no ran. Espírito mak fó sasin, basá Cristo mak lialós. Tebes duni, na’in tolu mak fó sasin: Espírito, ué no ran; sira na’in tolu lia tuir malu. Ita sira karik sasin ema nian, Maromak Nia sasin mak boot liu, basá Maromak Nia sasin mak fó sai kona ba Nia Oan. Ema nebe fiar iha Maromak Oan, sasin ne’e hôrik iha nia. Ema nebe la fiar iha Maromk, nia dehan Maromak hanesan bosok-ten, tan nia la fiar iha sasin nebe fó housi Maromak kona ba Nia Oan. Sasin ida ne’e duni mak Maromak haraik mai ita moris rohan laek no moris ne’e hôrik iha Nia Oan. Ema sé iha Oan, nia iha moris; ema sé la iha Maromak Oan, nia la iha moris. Ha’u hakerek buat hirak ne’e hotu ba imi, atu imi hatene katak imi iha moris rohan laek, imi nebe fiar iha Maromak Oan Nia naran.

Maromak Futar Lia.

 

Salmo Responsorial                                                                                       Sal. 147. 12-13, 14-15, 19-25 (R. 12)

Refrão : Jerusalém, hahi ba ó Na’i!!! Repete-se

  • Fó glória ba Na’i, Jerusalém!

          Sião, hahi ó Maromak!

          Nia hametin tan ó odamatan,

          No fó bensa ba ó oan sira. Refrão

 

  • Nia hari damen iha ó nia rain-ketan sira,

          Habosu ó ho trigo di’ak liu.

          Halo monu maha-uen hanesan bibi-mala’e fulun,

          Halekar tiha maha-uen hanesan ahi –kdesan. Refrão

 

  • Haklaken Nia liafuan ba Jacob,

          Nia lei no ordem ba Israel.

          Nia la halo povo seluk nune’e;

          Ba povo seluk, Nia la hatudu Nia justiça. Refrão

 

Aclamação                                                                                                                                                             Mt. 4.23

Refrão : Aleluia, Aleluia!! Repete-se       

                  Na’i Jesus haklaken Lia-foun-di’ak reino nian

                  No fó isin di’ak ba moras sira iha  povo nia leet. Refrão

 

Evangelho                                                                                                                                                        Lc. 5. 12-16

Na’i Jesus Cristo nia Evangelho nu’udar São Lucas haktuir:

Iha tempo neba, Jesus iha hela cidade ida, uainhira ema moras lepra ida mosu mai. Uainhira nia haré Jesus, nia hamonu-an hodi taka oin ba rai no harohan nune’e ba Jesus: “Na’i, Ita hakarak karik, bele sadi’am ha’u”. Jesus halolo liman, kona nia, hodi dehan: “Ha’u hakarak, hetan isin di’ak ba”. Iha oras ne’e duni, moras lepra ne’e husik nia. Jesus hateten ba nia atu keta fó hatene ba ema ida no dehan teni: “Maibe, ó ba hatudu-an ba na’ilulik hodi hasa’e sacrificio tan ó hetan isin di’ak, tuir buat nebe Moisés dehan nanis, atu hela sasin kona ba nia”.

Jesus nia naran sai boot ba daudaun, ema lubun ua’in halibur-an, atu rona Nia no atu bele hetan isin di’ak housi sira moras. Maibe Jesus hadook-An tiha hodi la’o mesa-mesak atu harohan.

Lia Maksoyn.

Leave a Reply

Your email address will not be published. Required fields are marked *