shadow
Diocese de Dili > NOTÍCIAS > LETURA DIÁRIA > DOMINGO DO BAPTISMO DO SENHOR (ANO C)

DOMINGO DO BAPTISMO DO SENHOR (ANO C)

Primeira Leitura                     Is. 42, 1-4, 6-7

Lia housi Livro Profeta Isaías:

Ha’u nia atan mak ne’e, atan nebé Ha’u tahan, Ha’u fihir, Ha’u hadomi. Ha’u tau laran ba nia, atu nia bele tesi lia-lós ba povo tomak. Nia sei la hakilar, la foti lian resin; Nia lian sei la rona iha lurón. Fafulu nakfera ona, nia sei la kona; ahí-oan kibu-kibu, Nia sei la huu mate. Nia sei haklaken lolós justiça, nia sei barani nafatin, sei aten-boot bei-beik, to’o ema hotu iha rai-klaran hetan justiça, basá, ema sira iha tasi balu mós titu nia doutrina. ha’u, ó nia Na’in mak bolu ó atu tuir justiça; Ha’u sée Ha’u liman ba ó, fó matenek ba ó, atu ó bele halibur no fó naroman ba ema tomak. Ha’u fihir ó, atu halo matan-delek sira bele haré, atu hasai dadur sira housi cadeia, no fó naroman ba sira bé moris iha nakukun.

Maromak Futar Lia.

 

Salmo Responsorial                                                                                        Sal. 28 (29). 1a, 2; 3ac-4; 3b. 9b-10

Refrão : Na’i haraik bensa ba nia povo iha dame!!! Repete-se

  • Maromak oan sira, hahí imi Na’i

          Hawelok nia naran;

          Hana’i Nia iha kadunan laran. Refrao

 

  • Na’i lian rona housi leten áas ba,

          Na’i lian makáas liu laloran;

          Na’i lian bele buat hotu,

          Na’i lian kmanek liu tomak. Refrao

 

  • Maromak kbiit wa’in, lia makáas liu rai tarutu;

          Lian ne’e tarutu, namolik alas-alas!

          Na’i hatur nia kadunan iha wé inan:

          Nia mak Liurai tinan ba tinan. Refrao

 

Segunda Leitura                                                                                                                                      Act. 10, 34-38

Lia housi livro hahalok Apóstolo sira nian:

Iha loron hirak nebá, Pedro hahú ko’alia, dehan: “Tebes, ha’u hatene katak Maromak bolu ema hotu, la fihir diak eh áat. Iha rai hot-hotu, sê hamta’uk Nia no moris tuir justiça, nia monu duni ba Maromak nia laran. Ne’e mak lia tatoli ba Israel oan sira, wainhira hodi Jesus Cristo, ema tomak nia Na’in, Nia haklaken lia-foun di’ak, lia hakmatek. Liu baptismo nebé João fó, imi hatene ona, buat sá mosu iha Judeia tomak, hahú housi Galileia: katak Maromak haraik Espírito Santo no kbiit ba Jesus Nazaré, nebé la’o lemo-lemo hodi halo di’ak no fó kman ba sira nebé terus iha diabo nia liman, basá, Maromak hôrik ho Nia.

Maromak Futar Lia.

 

Aclamação                                                                                                                                                    Cfr. Mc. 9, 6 

Refrão : Aleluia, Aleluia!!! Repete-se

                  Lalehan nakloke: Aman Maromak lia tun mai:

                  “Ne’e Ha’u Oan doben! Imi rona Nia bá”. Refrão  

 

Evangelho                                                                                                                                           Lc. 3, 15-16. 21-22

Na’i Jesus Cristo nia Evangelho nu’udar São Lucas haktuir:

Iha tempo nebá, tan ema sira hein hela Maksoyn, sira hanoin sira laran, keta João mak Messias karik. Nune’e, João hateten ba sira hotu: “Ha’u sarani imi hodi wé, maibé, atu to’o mai Ema ida maka’as liu ha’u. Ha’u la soyn atu kore Nia sapatu talin. Nia sei sarani imi hodi Espírito Santo no áhi. Wainhira povo simu ona baptismo, Jesus mós simu baptismo; hafoin Nia hahú harohan. Iha oras ne’e, lalehan nakloke tiha: Espírito Santo tun ba Nia ho ílas ida nu’udar falur. Housi lalehan, lian ida tun mai, dehan: “Ó, Ha’u Oan-Mane doben teb-tebes! Ha’u haksolok teb-tebes ho Ó!”

Lia Maksoyn.

Leave a Reply

Your email address will not be published. Required fields are marked *