shadow
Diocese de Dili > NOTÍCIAS > REFLEXÃO > NE’E HAU OAN DOBEN, IMI RONA NIA BA!

NE’E HAU OAN DOBEN, IMI RONA NIA BA!

Maun alin sarani doben sira,

Ohin ita celebra loron ita nain Jesus Cristo simu baptismo. Hodi celebra nunee halo ita hanoin mos loron nebe ita simu baptismo. Ita hamutuk ho Jesus Cristo simu baptismo nebe hanesan, baptismo ida deit, hodi Maromak ida deit nia naran.

Wainhira hateke itoan ba kotuk hodi compara ho realidade ohin loron nian kona ba baptismo nee’e ita hetan razão oioin deit kona ba ita nia baptismo, balun ninia historia hatudu katak baptismo sei kiik, balun booot ona mak baptismo ate balun katuas ou ferik ona, no balun fali tan besik atu mate mak simu baptismo no seluk seluk tan. Ne’e hotu mesak história ita ida idak nian, oras nee dadaun de facto ita hotu simu ona baptismo. Realidade ida nebe sei hela iha ita nia an nafatin ba nafatin. Ida nee katak sa ba ita ida idak? Baptismo nebe hau simu ona nee halo saida mai hau no lori hau atu ba halo saida?

Atu hatan ba pergunta basica sira ne’e Maromak ninia futar liafuan leno momos ita nia laran hodi bele hetan resposta no comprende realidade los kona ba batismo no kona ba graça tomak baptismo ninian nebe lori ba ema.

 

Primeira leitura hanorin ita kona ba natureza batismo nee nian nebe katak “hatan ba Maromak ninia bolu ho fiar ida nebe hatudu katak aceita lia bolu ida ne’e”. Haktuir mai ita iha apostolo sira ninia hahalok katak “Maromak bolu ema hotu, la fihir nia diak e at. Iha rai hotu hotu se mak hamtauk nia no moris tuir justiça, nia monu duni ba Maromak nia laran”. Baptismo mak odamatan boot no dalan dahuluk hodi hatan ba Maromak ninia lia bolu ne’e, Fo ita nia an ba simu baptismo hodi sai Maromak ninia oan no compromete ho Maromak atu moris tuir dalan moris justiça nian ka dalan moris los nian hodi bele moris nafatin ba nafatin iha Maromak ninia graça. Jesus Cristo fo sasain mai ita hanesan haktuir iha segunda leitura nee katak, sai Maromak ninia oan ne’e significa halo diak ba ema hotu no fo kman ba ema sira nebe terus. Laos halo diak ba ema balun deit, laos halo diak ba ita nia maluk ka belun deit.

Tamba sa mak Maromak bolu ita ema sira ba Nia? Ba halao moris ida hamutuk ho nia no hamutuk ho ema sira seluk. Hateten momos mai ita iha primeira leitura katak Maromak bolu ita ema sira tamba nia mak uluk nanain hadomi ita, nia fihir nanis tiha ona ita, Nia hili ita atu sai ninia oan fudin sira hodi fo sasin kona ba moris ida be hatur an iha justiça Maromak nian. Katak moris ida los no diak tuir Maromak hakarak, tuir Maromak husu mai ita. Hodi moris nune ita hatudu duni katak ita Maromak oan, ita fo sasin duni ba moris ida nebe folin iha ba ita.

Nai Maromak realiza ninia hakarak iha ita hodi concretiza ninia domin mai ita hahu husi kedas haruka ninia oan mane mesak mai iha ita leet, lao ka moris hamutuk ho ita hodi mos simu baptismo hanesan ita molok Nia hahu publicamente ninia missão salvadora, molok nia tatoli ba ema sira hotu Maromak ninia hakarak liu husi ninia hahalok moris nian sira nebe hatudu momos Maromak ninia domin rohan laek ba ita ema sira. Maromak ninia oan mane halo ida ne’e iha lao lemo rai tomak judeia nian hodi halo diak no hasai ema sira husi diabo ninia ukun. Hodi halo nune’e Jesus Cristo soi ema sira loron ba loron nafatin. Iha ne’e mak ita hetan salvacão ka ita moris iha domin ida hamutuk ho Maromak no ho maun alin sira. Atu tama hodi hetan moris ida hanesan ne’e uluk nanain ita hotu hotu tem que simu baptismo, no ita sira iha nee simu hotu ona baptismo ida ne’e. Hodi simu baptismo ita confessa katak ita fiar iha Maromak, ita fiar iha comunhão de vida domin nian iha ema sarani sira nian,  ita fiar iha mate sira sei moris hias no ita fiar iha moris foun ida rohan laek nebe sei mosu mai ita. Moris ida hamutuk ho Maromak tinan ba tinan ona.

Graça baptismo ninian uluk nanain halo ita sai Maromak nia oan no moris nundar Maromak oan. Moris nundar Maromak oan laos moris ida nebe ita esforço-an mesak mesak, maibe katak moris ida nebe ita halao hamutuk no halao ho Maromak. Ita buka moris tuir ninia dalan justiça nian deit no nia mak sei halo ita moris justo duni no halo nune ita sai duni Maromak ninia oan fudin sira. Hodi halo nune’e Maromak halo ita sai roman moris nian ba ema tomak, Maromak halo ita lori salvação ba ema hotu hotu. Ho Maromak nee ninia kbiit ita halo salvação nee sai concreto iha moris ida nebe bele tulun ema matan delek sira hare, dadur sira moris iha laran metin hodi sai husi cadeia, kbiit mrois nian ba ema sira be kbiit laek.

Maun alin sarani doben sira. Atu bele sai nafatin Maromak ninia oan lolos nundar ninia oan sira ita percisa Rona nafatin Maromak, Rona Maromak ninia Oan Mane mesak nebe mai moris hamutuk ho ita, nebe halo salvação ne’e sai concreto iha domin, dame, no ksolok be nakonu iha ita nia moris loro loron. Maromak Aman rasik lia tun mai ita hanesan ohin ita rona iha evangelho dehan “Ne hau Oan Mane nebe hau hadomi tebes, nebe fo ksolok tebes mai hau. Imi rona nia ba”. Nai ninia futar liafuan ida nee liafuan moris nian. Liafuan ida nebe hatudu ninia hakarak katak ita tem que rona nafatin ba Jesus Cristo, ita tem que lao tuir nafatin nia iha ita nia moris, ita tem que horik hamutuk nafatin ho Cristo Jesus iha buat hotu nebe ita koalia no ita halo. Hodi halo nune’e mak ita bele moris duni hanesan Maromak oan, ita bele halo ema wain sai Maromak oan hodi ikus mai ita hotu hotu hetan salvação Maromak nian ne’e iha ita nia moris tomak. Amen.

Bidau, Domingo Baptismo do Senhor, 13.01.2018, Pb.

Leave a Reply

Your email address will not be published. Required fields are marked *