shadow
Diocese de Dili > NOTÍCIAS > LETURA DIÁRIA > Segunda-Feira, depois da Epifania (ANO C)

Segunda-Feira, depois da Epifania (ANO C)

Primeira Leitura             Heb. 1. 1-6

Lia housi surat ba Hebreu sira:

Maun alin sira: Maromak nebe ko’alia ba ita dala barak housi dalan oi-oin, houri uluk ko’alia ba ita bei-ala sira, housi profeta sira. Tuir mai, iha tempo ikus liu, Nia  ko’alia mai ita, housi Nia Oan-Mane-Mesak, nebe Nia foti hodi halo sasán tomak nia Na’in, no mós housi Nia, hakiak mundo tomak. Nia mak Maromak Nia glória nia naroman no Maromak Nia Ílas. Nia hametin buat hotu nebe iha, hodi Nia futar liafuan kbiit ua’in. Uainhira hanahas tiha serbisu maksoin, Nia sa’e ba leten áas tur iha Aman Maromak Nia sorin kuana, housi fatin áas liu Anjo sira nian. Naran nebe haraik ba Nia, kmanek liu naran hot-hotu.

Lós duni, ba Anjo sira nebe mak Na’i Maromak dala ruma lia tun: “Ó, Ha’u Nia Oan, ohin duni Ha’u hahoris Ó?” Se la’e dehan: “Ha’u sei sai ba Nia Aman no Nia sei sai Ha’u Oan”? Uainhira atu haruka Nia Oan Mane-Mesak mai iha mundo ne’e, sei dehan tan: “Maromak Nia Anjo sira hotu, imi adora Nia ba”.

Maromak Futar Lia.

 

Salmo Responsorial                                                                                            Sal. 96(97). 1, 2b, 6, 7c, 9 (R. 7c)

Refrão : Adora Na’i ba, imi hotu be Nia Anjo sira!!! Repete-se

  • Na’i mak liurai, rai tomak haksolok ba;

          Nusa lub-lubun haksolok ba.

          Nia hatais kalohan no nakukun,

          Justiça no direito mak Nia trono nia hun. Refrão

 

  • Lalehan sira haklaken Nia justiça;

          Povo tomak haré Nia glória.

          Iha Na’i Nia futar oin

          Maromak sira hotu takrabat ba rai. Refrão

 

  • Itaboot, Na’i, iha leten áas liu rai hotu,

          Iha leten áas liu maromak hot-hotu. Refrão

 

Aclamação                                                                                                                                                            Mc. 1. 15

Refrão : Aleluia, Aleluia!! Repete-se

                  Maromak Nia reino besik ona; imi hakribi imi salan

                  no fiar iha Evangelho. Refrão

 

Evangelho                                                                                                                                                      Mc. 1. 14-20

Na’i Jesus Cristo nia Evangelho nu’udar São Marcus haktuir:

Iha tempo neba, uainhira ema dadur tiha João, Jesus ba Galileia, hahu haklaken Maromak Nia Lia-Foun-Di’ak, dehan: “Tempo to’o ona rohan, Maromak Nia reino besik ona. Imi hakribi imi salan ba hodi fiar Lia-Foun-Di’ak”.

Liu housi taswi ibun Galileia nian, Nia haré Simão ho nia alin André soe namanas dai ba tasi, basá, sira hakail-na’in ikan. Jesus lia tun ba sira: “Imi tuir Ha’u mai; Ha’u sei halo imi hakail-na’in ema nian”. sira husik kedas dai hodi tuir Nia.

Liu tan uit-oan ba oin, Nia haré Tiago, Zebedeu nia oan, ho nia alin João iha ró laran, hadi’a hela dai; Nia bolu kedas sira. Sira husik sira aman Zebedeu iha ró, hamutuk ho ema sira, hodi tuir Nia.

Lia Maksoyn.

Leave a Reply

Your email address will not be published. Required fields are marked *