shadow
Diocese de Dili > NOTÍCIAS > LETURA DIÁRIA > Terça-Feira, depois da Epifania (ANO C)

Terça-Feira, depois da Epifania (ANO C)

Primeira Leitura                      Heb. 2. 5-12

Lia housi surat ba Hebreu sira:

Maun alin sira: La’os ba Anjo sira mak Maromak fó kbiit atu ukun mundo iha loron ikus, nebe ita ko’alia daudaun ne’e. Ema ruma fó sasin ona iha Escritura hodi hateten: “Sá mak emar atu Ita bele hanoin nia, eh ema nia oan atu Ita bele sadi’a nia? Iha tempo balun nia laran, Itaboot halo  nia uitoan kiik liu fali Anjo sira, Ita hafutar nia ho honra no glória, buat tomak Ita tau iha nia ain okos!” Atu halo nia ukun sasán tomak, Maromak saran sasán tomak ba nia. Maibe, oras ne’e, ita seidauk haré nia ukun buat hotu. Maibe, Jesus be iha tempo ruma nia laran, kiik liu ba Anjo sira, oras ne’e, ita haré Nia simu honra no glória, tan Nia terus to’o mate. Nia saran-An ba mate, tan Maromak Nia tulun, atu ema hotu  hetan di’ak.

Maromak be buat hotu nia Hun no Rohan, hakarak lori oan sira barak ba Nia glória. Tebes duni, Maromak hafutar Jesus ho glória tomak housi Nia terus hodi sai Hun maksoyn. Nune’e Ida nebe halo ema sai santo no sira be sai santo sai housi  hun ida de’it. Tan ne’e, Jesus la moe bolu sira, maun-alin sira, uainhira hateten: “Ha’u sei haklaken Ita naran ba Ha’u maun-alin sira, hodi hananu Ita glória iha ema hotu nia leet”.

Maromak Futar Lia.

 

Salmo Responsorial                                                                                                Sal. 8. 2ª, 5, 6-7, 8-9 (R, cf. 7)

Refrão : Ita haraik kbiit ba Ita Oan hodi ukun buat tomak Ita halo!!! Repete-se

  • Na’i, ami nia Maromak,

           Ita Naran boot tebes iha rai-klaran tomak.

           Sá mak ema atu Ita hanoin nia,

           Ema nia oan, atu Ita tau matan ba? Refrão

 

  • Ita halo nia uitoan kiik liu fali anjo sira,

           Ho glória no rahun di’ak Ita hafutar nia;

           Ita fó kbiit ba nia atu ukun sasan hotu be Ita liman halo,

           Ita tau buat hotu iha nia ain okos. Refrão

 

  • Bibi sira no balada maus sira,

           No mós balada fuik sira hotu,

           Manu sira be semo iha lalehan

           No ikan sira be moris iha tasi

           No buat hotu be nani iha tasi. Refrão

 

Aclamação                                                                                                                                                        1Tes. 2. 13

Refrão : Aleluia, Aleluia!! Repete-se

                  Simu ba ho laran tomak lia menon nebe Na’i hato’o ba imi;

                  La’os hanesan ema nia liafuan, maibe, nu’udar Maromak Futar liafuan. Refrão

 

Evangelho                                                                                Mc. 1. 21-28

Na’i Jesus Cristo nia Evangelho nu’udar São Marcos haktuir:

Iha tempo neba, Jesus hela iha cidade Cafarnaum. Iha loron sábado ida, Nia tama iha sinagoga, hahu hanourin. Ema hotu hakfodak ho nia doutrina, basá, nia hanourin hanesan ema nebe iha autoridade, la’os hanesan ema escriba sira.

La kleur mosu iha sinagoga, mane ida diabo iha laran, nebe dehan ho lian maka’as: “Ó hakarak sáida ho ami, Jesus Nazaré nian? Ó mai atu halakon ami? Ha’u hateten Ó sé: Maromak Nia Santo!” Jesus lia tun ba nia ho siak: “Nonok, sai housi ema ne’e”. Diabo doko maka’as tiha ema ne’e, hakilar maka’as, hodi sai tiha housi ema ne’e.  Ema hotu hakfodak teb-tebes hodi husu ba malu: “Ne’e sáida mak ne’e? Doutrina foun ida ho autoridade! Nia haruka mós diabo sira, sira halo tuir nia haruka!” Jesus nia naran boot lalais kedas iha fatin hotu, iha Galileia tomak.

Lia Maksoyn.

Leave a Reply

Your email address will not be published. Required fields are marked *